Ao anatin'ny vanim-potoana vaovao, manoratra momba ny antsoina hoe demaokrasia sy ny fahalalahan'ny asa fanaovan-gazety ny olona sasany satria nahita sehatra hanehoana ny heviny amin'ny lohahevitra sasany !! Saika voaràra hatrany izany sehatra izany noho ireo antony antsoina hoe “antony ara-piarovana.” Mazava ho azy, fa raharaha ara-piarovana ho an'ny sasany izany! Ny governemanta, ohatra, dia tsy azo tononina raha tsy amin'ny zavatra tsara. Ny fanakianana azy io na ny fiampangany azy amin'ny zava-drehetra dia tsy ara-dalàna amin'ny heviny sivily ary fahotana amin'ny teny ara-pivavahana. Na dia vahoaka aza no mandrafitra ny governemanta, vahoaka izay manao ny marina amin'ny rafitra tranainy, manao ny marina izy ireo ary manao hadisoana ao amin'ilay vaovao.

Ao amin'ilay vaovao, nipoitra ny teny demaokrasia, ary tohanan'ny fanjakana iray, ny andrim-panjakany sy ny lalàna izany! Amin'izao vanim-potoana izao, ny zavatra rehetra ataonao dia tokony avy amin'ny fanapahan-kevitra, didim-panjakana na fanitsiana lalampanorenana !! Vao haingana, nisy tranga maromaro nifanohitra tamin'izany nitranga ampahibemaso. Nanjary enta-mavesatra ho an'ny governemanta amin'izao vanim-potoana vaovao izao ny fahalalahan'ny asa fanaovan-gazety, izay nanomboka nanao fanerena tamin'ny gazety. Nitarika fifehezana izay votoaty avoaka izany. Ohatra, mety mandrara famoahana lahatsoratra iray manontolo ny gazety iray; ny faharoa mety mamafa andalan-dahatsoratra; ary ny fahatelo mety manaisotra fehezan-teny na teny. Ny hafa, indrindra fa ny gazety antserasera, no hamoaka ilay lahatsoratra manontolo. Ny fanapahan-kevitra hamoaka na hanivana lahatsoratra dia miankina amin'ny fifandraisana misy eo amin'ny gazety sy ny sampana mpanatanteraka, solontenan'ny governemanta.

Vao haingana ny Minisitry ny Atitany any Bahrain no namoaka didim-panjakana mandrara ny famoahana fahazoan-dàlana vaovao hiasa ho an'ny Bangladeshita !! Izany dia noho ny heloka bevava mahatsiravina nataon'ny Bangladeshita iray !! Ary te-hanontany aho eto hoe: Inona no antony lehibe namoahana ity lalàna ity? Inona avy ireo antony ara-dalàna hamoahana azy io? Misy ny heloka bevava, ary misy ny fanadihadiana ary misy ny fitsarana sy ny rafi-pitsarana. Koa inona no anton'ity fandraràna ny vahoaka ao Bangladesh ity? Ary inona no anton'ity fanavakavahana ity? Ary amin'ny lalàna inona no voasazy ny firenena iray manontolo noho ny heloka nataon'ny olona iray na vondron'olona iray? Moa ve isika tsy ao amin'ny firenena misy andrim-panjakana sy lalàna? Ara-drariny ve izany fanapahan-kevitra izany? Mazava ho azy fa tsia ary fahadisoana lehibe izany. Androany, miresaka avokoa ny rehetra raha mpanao heloka bevava sy mpamono olona, ​​izay tokony horoahina ny Bangladeshita rehetra.