(Marihina fa tamin'ny volana Martsa 2010 no nivoahan'ny lahatsoratra teny Anglisy)

[Fanavaozam-baovao: Azo nidirana indray ilay vondrona Facebook izay noresahina eto andro vitsivitsy taorian’ny nivoahan’ity lahatsoratra ity tamin’ny teny Anglisy, araka ny fanamarihan’ireo fanehoan-kevitra. Afaka nanokatra kaonty vaovao ho azy tsy nisy olana ihany koa Kacem EI Ghazzali. Tsy namaly ny fangatahana fanazavana izay nalefa tany aminy ny Facebook.]

Nandritra ny taona vitsivitsy izay, nofafan’ny Facebook imbetsaka ny tsikera noho ny fihatsarambelatsihiny miharihary tamin’ny fomba namaritany ny vondrona Facebook izay heveriny ho ‘’tsy mendrika’’. Na dia mandrara ny fanehoana ny fitanjahana rehetra, ny fandrisihana fankahalana, sy ny fampiasana solon’anarana hanokafana kaonty, aza ny Fanambarana ofisialy momba ny zo sy ny andraikitra nataon’ny Facebook dia ampiharina amin’ny fomba voafantina izany. Tamin’ny tapaky ny taona 2009, nanapa-kevitra ireo mpitantana ny Facebook fa tsy hanala ny vondrona izay manda ny famonoana ny Jiosy, na dia teo aza ny fangatahana avy amin’ny fikambanan’ny Jiosy. Saingy tao anatin’ny volana vitsivitsy, nakatona ny kaontin’ireo mpisera izay namoaka ny sarin’izy ireo nampinono ny zanany. Maro ireo ohatra hafa.

Hita fa toa tsy mihatra ny fanambarana momba ny zo sy ny andraikitra raha tsy misy mpisera maro manohitra ny fisian’ny vondrona iray, ary rehefa nesorina izany dia matiteka mahatsikaritra ireo mpanorina fa tsy afaka manokatra izany intsony izy ireo. Matetika mamorona kaonty vaovao ireo mpisera izay manana kaonty manokana miara-voafafa amin’ny fotoana iray ary mahatsapa izy ireo fa voafafa indray izany fotoana vitsy aty aoriana.

Niharan’ireo fepetra fampiasana ny Facebook ireo ny mpikatroka Maraokana iray, Kacem EI Ghazzali, raha nesorina ny vondrona noforoniny, nantsoina hoe ‘’Tanora ho an’ny fisarahan’ny fivavahana sy ny fanabeazana’’. Nandefa mailaka ho an’ny Facebook i Kacem EI Ghazzali saingy tsy nahazo valiny. Roa andro taorian’izay, nakatona ihany koa ny kaontiny manokana (nanana bilaogy ihany koa ny hetsika, izay tao amin’ny sehatry ny bilaogy Blogger). Nilaza izy fa rehefa afaka hidirana ao amin’ny Facebook ny vondrona, dia maharay mailaka avy any amin’ireo Miozolomana izay mampiaka-peo manohitra ity vondrona ity izy, tahaka ireo manohitra ny vondrona hafa noforoniny talohan’izay.

Ny pejy fandraisana ao amin’ny tranonkalan’ny vondrona’’Tanora ho amin’ny fisarahan’ny fivavahana sy ny fanabeazana’’ ao amin’ny Facebook.

Tsy nanazava ny antony nanakatonan’ny Facebook ny vondrona i Kacem EI Ghazzali, saingy tsy tokony hahagaga izany fepetra noraisina izany. Tamin’ny taona 2008, rehefa nosamborina i Fouad Mourtada, ilay tanora injeniera Maraokana, noho ny fanokafana ny kaonty sandoka an’ny Printsy Maraokana Moulay Rachid tao amin’ny Facebook dia maro no niahiahy ny Facebook ho nampita vaovao tany amin’ny governemanta Maraokana ( sady tsy mbola nanamafy na nandà izany fiampangana izany anefa ny Facebook).

Toa nifanaraka tamin’ny lalàna any Etazonia [NdT : izay miankina amin’ny Facebook] sy ny fitsipika ampiasaina ofisialy ny kaontin’ny vondron’i Kacem EI Ghazzali sy ny azy manokana. Nahoana no nakaton’ny Facebook izany? Noho ny faneren’ny governemantan’ny firenena vahiny ve sa noho ny fisian’ny mpisera maromaro nangataka ny fanakatonana ny vondrona fotsiny ka nahatonga izany nikatona ho azy ? Na inona na inona antony, nahoana no tsy nanolotra ny fahafahana hitory ho an’ireo mpiserany sy ho an’ireo vondrona ny Facebook izay nikatona tsy nahy ny kaontiny, tahaka ny nataon’ireo sehatra hafa toa ny YouTube sy ny Blogger ?

Rehefa sady tsy nanitsakitsaka ny lalàna na ny fanambarana ny zo sy ny andraikitry ny Facebook noho izany ny kaontiny sy ny vondrony tao amin’ny Facebook dia toa hita fa nanaraka ny politikan’ny fanaraha-maso ny fanehoan-kevitra amin’ny Aterineto ny Facebook ankehitriny, ary inoana fa mety avy amin’ny fangatahan’ny governemanta vahiny izany.