Pikantsary nalaina tao amin'ilay lahatsary fampahafantarana, nozarain'ny TRT World tao amin'ny Youtube.

Ny 14 Janoary, nanomboka fampielezankevitra iray vaovao (#helloTürkiye) ny fitaleavan'ny fifandraisana ao Tiorkia, ezaka iray “hanairana ny sain'izao tontolo izao momba ny fampiasàna ilay anarana niandohan'ny firenena.” Tanaty fanambaràna iray navoakan'ny talen'ny fifandraisana ao amin'ny biraon'ny filoha, hoy i Fahrettin Altun, “Mino izahay fa zavadehibe ny fampiasàna ny voanteny ‘Türkiye’ eo amin'ny sehatra iraisampirenena mba hanamafisana bebe kokoa ny laza sy ny marika amantarana ny firenena.” Ilay fanomezana anarana vaovao dia natao taorian'ny 4 Desambra 2021 nanasoniavana ny teny miampita avy amin'ny fitondràna, mitaky ny hampiasàna ny hoe “Türkiye” fa tsy “Turkey” any anatin'ireo taratasim-pifandraisana rehetra ifanaovana amin'ireo firenena, andrimpanjakana ary fikambanana hafa.

Mivaky tahaka izao ilay teny miampita navoaka tamin'ny Desambra:

Ny voanteny ‘Türkiye’ dia maneho sy mivoy amin'ny fomba tsara indrindra ny kolontsaina, sivilizasiôna ary ny soatoavina Tiorka. Ao anatin'io, nanomboka nampasaina ny fehezanteny ‘Vita avy ao Türkiye’ fa tsy ‘Vita avy ao Turkey’ any amin'ireo vokatra aondranay; vokany, tamin'ny fampiasàna ny anarana ‘Türkiye’ no nampiroboroboana sy nampahafantarina an'izao tontolo izao ireo vokatray, izay reharehan'ny firenenay eo amin'ny sehatry ny fifanakalozana ara-barotra iraisampirenena. Ny tanjonay amin'izao fotoana izao dia ny hisolo tena ny firenena sy ireo traikefa an-taonany maro ananan'ny firenena eo amin'ny sehatra tsirairay, amin'ny fampiasàna ny marika ‘Türkiye’.

Araka ny lazain'ny Middle East Eye, sehatra iray fampahalalambaovao ety an-tambajotra, efa nanomboka sahady ny dingana nataon'ireo manampahefana Tiorka ho firaketana ilay anarana vaovao ao amin'ny Firenena Mikambana. “Mbola eo am-pandinihana ny tena fotoana hiovan'ny anarana ny ao amin'ny governemanta, saingy mitohy kosa ny dingana,” hoy ny tatitry ny Middle East Eye mitanisa Tiorka manampahefana ambony.

Raha nanantitrantitra i Altun sy ny filoha fa hanamafy ny lazan'ny firenena ilay fanovàna anarana, ny hafa indray mihanihany hoe fanentanana iray natao hanavahana ny firenena amin'ilay vorona iray mitovy anarana aminy io. “Tendreo ao amin'ny Google ny hoe ‘Turkey’, dia hahazo andiana saripika, lahatsoratra ary famaritana misafotofoto omen'ny rakibolana ianao, izay manafangaro ny firenena amin'ny Meleagris – fantatra ihany koa amin'ny anarana hoe ‘turkey’ (vorontsiloza), vorona iray lehibe avy any Amerika Avaratra – izay malaza ho fandroso ambony latabatra rehefa Noely na Thanksgiving,” hoy ny tatitry ny TRT World.

Koa satria miady amin'ny fidangan'ny vidim-piainana ny firenena, lazain'ireo manampahaizana fa tsy fotoana fanovàna anarana izao, ary tsy misy dikany ny fanaovana izany.

With what's going on inside Turkey, another branding campaign is the focus? https://t.co/XCrnW4sn9b pic.twitter.com/2Q7z4wEWDC

— Lisel Hintz (@LiselHintz) January 14, 2022

Miaraka amin'ireo zavamitranga ao anatin'i Tiorkia, dia fanentanana iray hafa ho fanovàna anarana ve no maha-matimaty anareo?

ICYMI, Turkey now insists on calling itself Türkiye in English, as it has no other problems to deal with https://t.co/n3t08UoLil

— Zia Weise (@ZiaWeise) January 14, 2022

ICYMI, Isisihan'i Tiorkia ankehitriny ny hiantsoana azy hoe Türkiye  amin'ny fiteny anglisy, satria tsy manana olana hafa tokony ho atrehany izy

Kianin'ny hafa ilay safidin'ny governemanta hampiasa ny volan'ny mpandoa hetra amin'ity fanovàna anarana ity ao anatin'ny fotoana mbola maha-maro tsy tambo ho isaina ny olana mamely ny fiarahamonina, toy ny fitontonganana, ny fahaverezan'ny asa, herisetra tsy voafehy, fanavahana noho ny maha-lahy na vavy, ary ny firongatry ny Omicron, ankoatra ireo maro hafa.

Another savvy method to spend $$$$! That is just what is needed in a recession! Bravo https://t.co/x62amipBv6

— Pinar Tremblay (@PinarTremblay) January 14, 2022

Fomba iray fetsifetsy handaniana $$$$! Izany indrindra no ilaina ao anaty vanimpotoana fitontonganana! Bravo

I hate to be the bearer of bad news but Turkiye and Turkey will be pronounced pretty much the same in English and foreigners will still call it Turkey anyway. Huge waste of taxpayers’ money https://t.co/r79MRkmwkd

— Steven H. Seggie (@Seggitorial) January 13, 2022

Halako ny ho mpilaza vaovao ratsy, saingy  mitovitovy ihany ny fanononana ny ‘Turkiye’ sy “Turkey” amin'ny fiteny anglisy, ary ny vahiny dia hiantso azy mandrakariva hoe “Turkey” na ho inona na ho inona. Fandanindaniam-poana ny volan'ireo mpandoa hetra