Ny tranombakoka ao amin'ny trano Hamza ao Kokand. Sary an'i Zafar Atajanov, nampiasaina nahazoana alalana.
Ao Ozbekistana, ny tranon'ireo mpanoratra malaza dia tsangambato ihany koa ho an'ny maritrano anatiny nentim-paharazana Ozbeky.
Nivoatra nanodidina ireo tanàna malaza ao amin'ny Làlan'ny Lasoà, tahaka an'i Bukhara sy Samarkand, ny kolontsaina ozbeky. Hazavain'izany ny antony mampanan-danja lehibe ny fanaingoana anatiny eo amin'ny fiainana andavanandron'ny vahoaka Ozbeky, izay nanjary nifikitra amina toerana iray maharitra, taloha kokoa raha miohatra amin'ireo firenena mifanolo-bodirindrina hafa toa ny an'i Kyrgyz na Kazakh, izay nijanona ho mpifindrafindra monina hatramin'ny fiandohan'ny taonjato faha-20 ny ankamaroany.
Ny iray tamin'ireo fomba tsara indrindra ahitana ny lovan'ny fanaingoana anatiny mihaja tamin'ny faran'ny taonjato faha-19, dia ny fitsidihana ny tranon'ireo mpanoratra sy artista malaza. Nampivelatra ny fomba fanokafana ireo trano-tranombakoka (“дом-музей”) ny Firaisana Sovietika na ny efitrano-tranombakoka (музей-квартира, дом-квартира) an'ireo mpanoratra izay nankamamy na nanohana ny soatoavina Sosialista taloha sy nandritra ny vanim-potoana Kaominista (1917–1991). Amin'ny ankapobeny, ny karazana tranombakoka toy izany izay nipetrahan'ny mpanakanto tamin'ny fotoana iray dia mampiseho ireo fitaovana tamin'ny fiainany andavanandro, ny boky voatonta sy ny fandikana ny asan'ilay mpanoratra, sary sy fitaovana manokana tahaka ny akanjo, solomaso, penina, tahaka izay hita amin'ity lahatsary mampiseho ny tranon'i Konstantin Paustovsky , ilay Rosiana / Sovietika mpanoratra ity :
Taorian'ny fianjeran'ny Firaisana Sovietika dia nitohy ilay fomba fanao, nandray an'ireo mpanoratra voasivana taloha izay noheverina ho “mpanohitra ny Sosialista”, tany amin'ireo Fanjakana 15 taorian'ny Sovietika.
Any Ozbekistana, nankalazana ny olo-malaza sasany sy ary ny sasany kosa nogadraina, noroahina na novonoina tamin'ny taona 1930 noho ny filazana fa mpanohitra ny Kaominisma, malaza ihany koa ny trano-tranombakoka ary matetika misy zaridaina. Eny tokoa, manana fironana ho maro anaka sy ahitàna andian-taranaka maro ny fianakaviana Ozbeke, ary manana zaridaina goavana hamokarana voankazo sy legioma, nefa koa ho fanomezana toerana maitso sy mangatsiatsiaka ao amin'ny firenena iray fantatra amin'ny lohataonany lava, maina ary tena faran'izay mafana.
Iray amin'ireny tranombakoka ireny, miorina ao an-tanànan'i Kokand, ao amin'ny Ferghana Valley, any Atsimo-Atsinanan'i Ozbekistana ny tranon'i Hamza Hakimzade Niyazi, fantatry ny rehetra fotsiny amin'ny anarana hoe Hamza. Izy no azo heverina ho “maritiora mena” amin'ny lafiny politika : amin'ny maha-mpanoratra azy, notohanany tamin'ny fony manontolo ny fahefana Kaominista tao Ozbekistana Sovietika ary vokatr'izany dia nitora-bato azy ho faty ireo miozolomàna mpandala ny nentin-drazana. Noheverina ho sahala amin'ny lehibe indrindra amin'ireo mpanoratra tantara an-tsehatra izy teo amin'ny literatiora Ozbeky ary iray tamin'ireo tena mpanavao ny teny.
Kely ilay trano-tranombakoka saingy mampiseho ny fanaingoana anatiny mampiavaka ny faramparan'ny taonjato faha-19 sy ny fiandohan'ny taonjato faha-20, izay mbola heverin'ny sasany ao Ozbekistana ankehitriny ho loharanon'aingam-panahy. Eny tokoa, nandritra ny vanim-potoana Sovietika, ny 1920 hatramin'ny fiandohan'ny 1990, ny maritrano sy ny taotrano an-tanàndehibe sy ny tefiendrika Sosialista dia noheverina ho toy ny modely natao ho arahana, ary marobe ireo izay namela ny fandravahana nentim-paharazana, farafaharatsiny tany amin'ireo tranobe fonenana. Amin'izao fotoana izao, hita ny fiverenana mankamin'ny mari-pamantarana ara-kolontsaina ozbeky ary mihabetsaka kokoa ny olona, anisan'izany ny any afovoan-tanàna, mikasa ny haka tahaka ny tefiendrika (fanaingoana) anatiny nentim-paharazana.
Ny andian-tsary manaraka dia mampiseho ny sasany amin'ireo singa fototra amin'io maritrano nentim-paharazana io, aranty ao amin'ilay trano-tranombakoky ny literatiora Hamza ao Kokand.
Ity no fidirana amin'ilay trano-tranombakoka mampiseho an'ireo sary sokitra hazo be pitsony eo amin'ny varavarambe fidirana.
Fidirana amin'ny Hamza trano-tranombakoky ny literatiora ao Kokand. Sary an'i Zafar Atajanov, nampiasaina nahazoana alalana.
Eto Ity no efitrano lehibe natao handraisana ireo mpitsidika, ao anatin'ny kolontsaina izay tena sarotiny amin'ny fitsipiky ny fandraisana vahiny, mampiseho endri-javatra mampiavaka ny maritrano anatiny nentim-paharazana : ireo talantalana be pitsony miraikitra voahodidina fefy, matetika ampiasaina hampirantiana ireo kojakojam-pihinanana raitra kokoa, vilia sy fitaovana fandrosoana dite, boky sy fitaovana madinika. Araka ny fomban-drazana, ny rafitra ivelany dia vita amin'ny hazo izay lokoina hitovy amin'ny rindrina rehefa vita. Antsoina hoe “mehrob” izy ireny amin'ny fiteny ozbeky, ho fanondroana ny mihrab, toerana iray ao anatin'ny moskea milaza ny fitodika manandrify an'i Kaaba rehefa mivavaka.
Efitrano lehibe an'ny trano-tranombakoka ara-literatiora Hamza ao Kokand. Sary an'i Zafar Atajanov, nampiasaina nahazoana alalana.
Indro ohatra iray hafa mitovy amin'io talantalana rafitra nentim-paharazana io, nampidirina ho ao anatin'ny efitrano iray hafa ao amin'ilay tranombakoka :
Efitra fatoriana ao amin'ny trano-tranombakoka ara-literatiora Hamza ao Kokand. Sary an'i Zafar Atajanov, nampiasaina nahazoana alalana.
Singa iray hafa manan-danja amin'ny tefiendrika anatiny ny valin-drihana hazo nolokoina mampitambatra sary sikotra hazo sy loko mirenty. Ampiasaina be ihany koa izy io any Tajikistana :
Valindrihana voaloko ao anatin'ny trano-tranombakoka ara-literatiora Hamza ao Kokand. Sary an'i Zafar Atajanov, nampiasaina nahazoana alalana.
Ity efitrano ity dia mampiseho ny fomba fampiasana fanaka amin'ny tefiendrika nentim-paharazana : karipetra matevina mandrakotra ny tany ary eo amboniny no ipetrahan'ny olona, atao mifandimpatra ny tongotra. Eo ambonin'io karipetra io dia misy kidoro manify voasesika landihazo mba hampahazo aina kokoa ny fipetrahana. Antsoina hoe “to'shak” izy ireo amin'ny fiteny ozbeky, ary hita mifanongoa ao anatin'ny iray amin'ireo lavaka amin'ny rindrina eny amin'ny faran'ny trano. Latabatra kely nampiasaina natao indrindra hisakafoanana sy hisotroana dite. Vata hazo ngezabe iray vita amin'ny hazo natao hitehirizana ireo fitafiana na ireo zavatra sarobidy. Ny lavaka eo afovoan'ny rindrina dia natao handraisana ireo zavamaneno nentim-paharazana ampiasàna tady, izay anisan'ny tafiditra ihany koa amin'ny fanaingoana trano.
Efitrano ao anatin'ny trano-tranombakoka ara-literatiora Hamza ao Kokand. Sary an'i Zafar Atajanov, nampiasaina nahazoana alalana.
Ity dia ohatra iray hafa amin'ny fanakambanana karipetra, ny to'shak sy latabatra kely mirakotra Suzani , peta-kofehy nentim-paharazana iraisn'ny kolontsaina marobe any Azia Afovoany :
Efitrano ao anatin'ny trano-tranombakoka ara-literatiora Hamza ao Kokand. Sary an'i Zafar Atajanov, nampiasaina nahazoana alalana.
Ohatra iray hafa amin'ny sary sokitra hazo saropady mipetaka amin'ireo varavarana :
Varavarana ao anatin'ny trano-tranombakoka ara-literatiora Hamza ao Kokand. Sary an'i Zafar Atajanov, nampiasaina nahazoana alalana.
Ary ohatra iray hafa amin'ny sokitra hazo napetaka amin'ireo vata, antsoina hoe “javon” amin'ny fiteny ozbeky :
Vata hazo voasokitra ao anatin'ny trano-tranombakoka ara-literatiora Hamza ao Kokand. Sary an'i Zafar Atajanov, nampiasaina nahazoana alalana.
Koa satria mbola mitazona ny fomban-drazana fametrahana ireo tranombakokam-pianakaviana ny ao Ozbekistana, no sady manokatra tranombakoka vaovao, dia manana fijery tokamiavaka amin'ny ampahany sarobidy amin'ny tantara ara-kolontsaina ao amin'ny fireneny i Ozbekistana.
