Saripika natolotr'i Faisal Ali

Fantaro i Faisal Ali, izay fantatra kokoa amin'ny anarana hoe DaSupremo ao amin'ny Wikipedia. Nanomboka tamin'ny  2014, mpirotsaka an-tsitrapo izy ao anatin'ny hetsika Wikimedia. Ny akaiky indrindra, natombony ny Ghanaian Pidgin Wikipedia, niaraka tamin'ireo mpikambana ao anatin'ny tarika: Maxwell Beganim (solonanarana:Xibitgh) sy Stephen Dakyi (solonanarana:NanaYawBotar). Tamin'ny Aprily 2023, nankatoavin'ny Vaomieran'ny Teny ilay tranonkala mba ho azon'ireo mpamaky atao ny miditra aminy.

Mandritra ny vanimpotoana 22 – 28 Jona , i Faisal no hitantana ny kaonty Twitter @DigiAfricanLang, hizaràny ny tantarany momba ny fampiasàna ireo sehatra ao amin'ny  Wikimedia ho fanapariahana fahalalàna ao amin'ny Pidgin Ganeàna.

Rising Voices (RV): Ahoana izao no toerana misy ilay fiteninareo ety anaty aterineto sy ivelany?

Faisal Ali (FA): Ireo tanora ao Ghana no tena mampiasa be ny Pidgin Ganeàna. Na tsy mbola mipetraka aza ny foto-pitsipika ho an'ilay fiteny, izahay ao anatin'ilay vondrom-piarahamonina dia namokatra rafitra iray izay ahafahan'ny tsirairay manolotra hevitra momba izay tsipelina hanoratana ny voanteny sasantsasany. Araka izany dia miasa ho amina fomba fanoratra manokana ny vondrom-piarahamonina. Amin'izay tranga izay, ezahanay ny hametraka azy ho fenitra ao amin'ny Wikipedia. Amin'izao fotoana izao izahay dia manana lahatsoratra mihoatra ny 600 voasoratra tsara, nataon'ireo mpirotsaka an-tsitrapo, amin'ny Pidgin Ganeàna ao amin'ny Wikipedia.

RV: Inona no manosika anao hanao izay hahitàna ny fiteninareo eny anaty habaka nomerika?

FA: Ny faharisihako dia nanomboka tamin'ny nahitàko ny Pidgin Nizeriàna fantatra amin'ny hoe Naija tao amin'ny Wikipedia. Nifandray tamin'ilay Nizeriàna mpitarika aho, i Olushola, ary nifampiresaka taminy ny amin'izay fomba ahafahanay ‘mampitambatra’ ireo fiteny roa ireo. Sosokevitra nomeny ny hoe misy fahasamihafàna midadasika be amin'ny Pidgin Ganeàna sy ny Pidgin Nizeriàna, noho izany, azonay atao ny mitrandraka ny anay manokana ao amin'ny Incubator. Dia tamin'izay aho no nifandray tamin'ireo namana vitsivitsy toa an'i  NanaYawBotar, Xibitgh ary Jesse Akrofi-Asiedu (solonanarana:JWale2) ary dia notohanan-dry zareo ilay hevitra. Tantara sisa ny ambiny.

RV: Farito ny sasantsasany amin'ireo fanamby manakana ny fiteninao ho tsy afaka ampiasaina feno ety anaty tambajotra

FA: Voalohany indrindra dia ny fahitàna olona hiasa an-tsitrapo no tena fanamby satria izay natoninay dia, na nitaky karama kely, na ilay iray mahazatra “Inona no tombony ho azoko amin'io?” Ary koa, ny fahazoana ireo loharano ho an'ilay fiteny dia tena fanamby tokoa mandra-pahatongan'i Amir Aharoni [Stratejista zokiolona ao amin'ny Wikimedia Foundation]  nanolotra hevitra ho ahy mba hikaroka ireo loharano toy ny poezia, boky, tantara, sns… voasoratra amin'ny Pidgin Ganeàna.

RV: Inona no dingana mivaingana heverinao fa azo atao mba handrisihana ny tanora hanomboka hianatra ny fiteniny na hanohizany hampiasa ny fiteniny?

FA: Izaho mihevitra fa tokony raisina matotra ho any an-tsekoly ireo fiteny eny an-toerana, satria maripamantarana anay ireny no sady kolontsainay ka ilaina tahirizina. Ary koa, tokony ho ampianarintsika an'ireo tanora ny fitenintsika, ary tokony hifampiresaka amin'ireo fiteny eo an-toerana rehefa any an-trano miaraka amin'izy ireny fa tsy amin'ny fiteny vahiny.