Chichimilá, Yucatán, izay hanatanterahana ny tetikasa fikatrohana nomerika. Sary nalain'i José Alfredo Hau Caamal. Nampiasaina nahazoana alalana.

Bix a beele'ex, in k'aaba'e’ Alfredo Hau. Táan in jo'olintik u meyajil: U chíikulil boonil úuchben maayats'íib yéetel u t'aanil maaya kaaj tu péepet boonil openstreetmaps.

José Alfredo Hau Caamal no anarako, 36 taona aho ary anisan'ny vondrom-piarahamonina X-Alau miteny Mayana ao amin'ny kaominina Chemax ao Yucatán. Mipetraka any Chichimilá, Yucatán aho amin'izao fotoana izao.

Mampianatra ny zanaky ny vondrom-piarahamonina ny fomba famakiana ny soratra hieroglyphs aho. Mpandika teny mahaleo tena avy amin'ny teny Espaniola mankany amin'ny teny Mayana amin'ny lohahevitra samihafa ihany koa aho, ary mamorona tetikasa mifantoka amin'ny fiteny sy kolontsaina.

Ny tetikasako

Mifototra amin'ny fampianarana ny soratra Mayana fahiny fantatra amin'ny anarana hoe úuchben ts'íib, fianarana sy ny fahaiza-mamantatra ny soratra fahiny, ny soratra hieroglyfika, ny vaninteny Mayana na, araka ny filazan'ny manam-pahaizana, ny rafitra fanoratana Maya mahazatra ity tetikasa fikatrohana nomerika ity. Zava-dehibe ny mihambo amin'ny lovanay ho toy ny ivom-pamantarana an'ity tetikasa ity mba hahafahan'ny teny Mayana ho azo ampiasaina amin'ny sehatra ifanakalozan-kevitra ary mba ho hitan'ny mpikambana ao amin'ny vondrom-piarahamonina amin'ny sora-baventy, peta-drindrina, soratra na amin'ny toerana hita maso rehetra izany.

Ahitana fananganana endritanin'ny fiteny amin'ny fampiasana ny asa soratra Mayana taloha sy ankehitriny amin'ny alàlan'ny OpenStreetMap ny tetikasako, sy fananganana toerana, lalana ary zotra amin'ny fampiasana ny endriky ny fitenin'ny vondrom-piarahamonina ho fanamafisana ny fiteny sy hamelomana indray ny asa soratra Mayana fahiny. Hita ao ihany koa ny fanazarana ny ankizy, ny tanora ary ny olon-dehibe amin'ny fampiasana ny rafi-panoratana hamoronana afisy, sary an-drindrina, marika, doka ary famantarana eny amin'ny toerana ho an'ny daholobe ary mampiditra azy ireo ao amin'ny OpenStreetMap mba hanasongadinana ireo sehatra fampiasa mahazatra, sy ireo toerana manan-tantara misy anarana nomenan’ny fiarahamonina.

Ny antony manosika ahy

Nanomboka tamin'ny taona 2003 aho no anisan'ny CONAFE (Vaomieram-pirenena Fampandrosoana ny Fanabeazana) amin'ny maha-mpampianatra vondrom-piarahamonina ahy. Nandritra izany fotoana izany, nanjary zava-dehibe tamiko ny asa nataoko tany tamin'ireo vondrom-piarahamonina Mayana. Nahatonga ahy hanova ny lalan'ny asako ny fampianarana, ka niala tamin'ny fianarana fizahan-tany aho ary nanolo-tena ho amin'ny hetsika ara-kolontsaina ho an'ny fiarahamonina. Niditra ho mpampianatra mamaky teny sy manoratra ho an'ny INEA (Ivotoerana Nasionaly ho an'ny Fanabeazana ny Olon-dehibe) aho. Anisan'ny nandray anjara tamin'ny tetikasa nanombanana ny mpampianatra tamin'ny teny Mayana aho, nandika ny Lalàmpanorenana Politikan'i Meksika, ny Lalàmpanorenana Politikan'i Yucatan, ny Rakipahalalana Yucatan, ary nampianatra ny úuchben ts'íib sy ny Mayana teo amin'ny sehatra samihafan'ny mponina aho. Mampahatsiahy ahy izany fa ny tena zava-tsarotra indrindra dia ny fitadiavana fomba hanehoana fa tena ilaina ny teny Mayana araka ny naseho azy, kanefa manana ny toetran'ny fiteny hafa rehetra izy.

Ny fahitako fa anisan'ny taranaka tsy miteny Maya ny zanako no iray amin'ireo antony lehibe indrindra nahatonga ahy hampianatra ny fiteny.

Afaka mampianatra, manamafy ary mitahiry ny fiteny isika amin'ny alalan'ny fanehoana fa azontsika ampitaina amin'ny zanatsika tsy voatery any an-tsekoly ny fiteny mayana, fa amin'ny fampiasana azy amin'izay efa ananantsika: hieroglyphs, lahatsoratra, fehezanteny, teny Mayana any amin'ny toerana ho an'ny daholobe, fivarotana, trano ary ny toerana rehetra ahafahan'ny olona manoratra sy mandeha an-tongotra, mijery sy mamaky maayat'aan toy ny zaza vao mianatra mamaky teny.