Akatòny

Fitia Tsy Mba Hetra Hampijoro Tsara Hatrany Ny Global Voices

Mila fanohanana avy amin'ny namana sy ny mpamaky toa anao ny fikambananay hitoerany ho mahaleotena, maimaim-poana, ary hahazaka miasa maharitra!

Manomeza anio

Hijery ny Tenim-Pirenena rehetra? Mandika ny tantaran'ny Global Voices izahay mba ho hitan'ny rehetra ny fitantaran'olo-tsotra manerantany.

Voalohany no nahitana katsatsaka leopara tany Nepal

Katsatsaka leopara. Sarin'i Matt Reinbold tao amin'ny Flickr. (CC BY-SA 2.0)

Noraketina vao haingana ho karazam-biby vaovao ho an'i Nepal ny katsatsaka leopara (Eublepharis macularius) ; Raha nanaiky tamin'ny fomba ofisialy ny karazana gecko (katsatsaka) faha 11 ao amin'ny firenena ny mpikaroka Nepaley sy ny mpankafy natiora dia nanomboka niahiahy ihany koa ny mpandala ny tontolo iainana sasany fa mety ho lasibatra amin'ny varotra biby an-tsokosoko anaty ala ity biby ity.

Nanolo-kevitra ilay manampahaizana momba ny biby mandady Karan Shah raha namoaka sarinà gecko (katsatsaka) hafahafa tao amin'ny Facebook i Yam Bahadur Rawat, fa mety ho karazany vaovao ho an'i Nepal ilay biby. “Nesoriny avy eo ilay lahatsoratra ary voamarina tamin'ny fikarohana fanampiny fa vaovao tanteraka izany ho an'i Nepal” hoy Shah, niresaka tamin'ny Global Voices.

Namoaka lahatsoratra tao amin'ny Facebook ny iray tamin'ireo mpikambana ao amin'ny ekipan'ny fikarohana, Jeevan Thapa:

Happy to share a new species of lizard recorded from Nepal. This documentation from Nepal added a new family, genus and species of herpetofauna from Nepal. Now, this species becomes the 11th gecko species for Nepal.

Faly aho mizara ny karazana androngo vaovao hita avy eto Nepal. Nanampy fianakaviana, karazana ary karazam-biby herpetofauna avy eto Nepal ity fanadihadiana avy eto an-toerana ity. Ankehitriny, lasa karazam-biby gecko faha-11 ho an'i Nepal io biby io.

Ny nahitana voalohany ny karazana katsatsaka leopara roa, izay tsy miseho afa-tsy amin'ny alina dia hita natory nandritra ny ririnina tany anaty ala ara-biolojika Kamdi any amin'ny Distrikan'ny Banke ao andrefan'i Nepal. Mampifandray ny Valan-javaboahary Nasionaly Banke ao Nepal amin'ny Valan-javaboahary Masina Suhelwa any Uttar Pradesh, India ny ala. Voalaza fa hita tany amin'ny faritra maina tany Afghanistan, avaratra-andrefan'i India ary Pakistan ireo geckos miafina anaty tany. Na izany aza, dia hita tao amin'ny faritra iray antsoina hoe sal (Shorea robusta)  tany anaty ala mihitsan-dravina mifangaro tany Nepal no voalohany nahitana azy ireo tamin'ny 30 Desambra 2016.

Nahita porofo hafa nahitana ny katsatsaka leopara niseho tany amin'ny toerana hafa ihany koa ny ekipa tatỳ aoriana. Tamin'ny 18 Aprily 2017, nisy katsatsaka leopara roa hafa hita tao amin'ny Distrikan'i Nawalparasi ary ny 10 Jona 2018 tany amin'ny distrikan'i Surkhet any andrefan'i Nepal.

Nanoratra tao amin'ny lahatsoratra mitatitra momba ny fikarohana ny ekipa:

Common Leopard Geckos remained undetected in Nepal until now. This could be attributable to the secretive nocturnal nature of the species or the limited research on the herpetofauna in western Nepal. These new records from three different localities indicate that the species is likely to have much wider distribution in Nepal, including Banke National Park, which lies between the sites of these observations.

Tsy mbola hita tany Nepal raha tsy amin'izao fotoana ny Katsatsaka leopara. Mety noho ny natioran'ity karazam-biby ity izay miafina amin'ny alina no nahatonga izany na noho ny fikarohana voafetra momba ny biby mandady sy anaty rano any andrefan'i Nepal. Manondro ireo fahitana vaovao avy amin'ny faritra miisa telo samihafa fa mety ho betsaka kokoa ny fiparitahan'ity karazam-biby ity any Nepal, anisan'izany ny ao amin'ny Valan-javaboary Nasionaly Banke, izay eo anelanelan'ireo toerana nahitana azy ireo.

Tsy toy ny katsatsaka hafa izy ireo fa mivezivezy ny hodi-masony fa saingy tsy mihazona amin'ny fihanihana kosa ny rantsany – midika izany fa afaka manokatra sy manakimpy ny masony mandritra ny torimasony izy ireo saingy tsy afaka mihanika ny toerana mijadona malama. Manana tongotra kely miaraka amin'ny rangotra malefaka izy ireo. Miaina hatramin'ny 20 taona izy ireo ary misy aza ny sasany hatramin'ny 30 taona raha ompiana.

Lafo sady be mpitady

Ireo katsatsaka tsara tarehy, na izany aza dia amidy amin'ny fomba ara-dalàna sy tsy ara-dalàna noho ny fangatahana maro avy amin'ireo mpitia biby anaty ala.

Gecko avy any Hardwick (NA katsatsaka leopara Indiana)
Fa maninona no tsy manana aho: SAROTRA tadiavina, ary TENA MAMPITENY NY MOANA ny halafony rehefa misy izy ireo noho izy be mpitady. Mitovy amin'izany ihany koa ny Eublepharis Sp hafa. TSY katsatsaka leopara izy io.

Araka ny tatitra nataon'ny gazetiboky Reptiles, mitentina 20 $ hatramin'ny 3 000 $ Amerikana ny katsatsaka leopara ompiana. Na  izany aza, araka ny notaterin'ny DC Nepal, nogiazan'ny mpitandro ny filaminana ao amin'ny sisintanin'i Nepal-India ny katsatsaka leopara miisa dimy izay mitombam-bidy 184 tapitrisa NRs (1,65 tapitrisa dolara).

Midika ny fivarotana tsy ara-dalàna ireo katsatsaka ireo na dia heverina ho avy any India aza izy ireo fa mety ho lasibatry ny mpivarotra ihany koa ny katsatsaka leopara avy any Nepal . Na izany aza, tsy ahitana ireo karazam-biby tsara tarehy ireo ny Lisitra Mena avy amin'ny IUCN mirakitra ireo karazam-biby tandindonin-doza. Noho izany, nanolo-kevitra ny hanisana antsipirihany ireo katsatsaka leopara ao Nepal ny ekipa mpikaroka mba hamantarana bebe kokoa ny fiparitahany ary hanampy amin'ny fiarovana ireo karazam-biby manintona olona ireo.

Atombohy ny resaka

Mpanoratra, azafady hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.