Akatòny

Fitia Tsy Mba Hetra Hampijoro Tsara Hatrany Ny Global Voices

Mila fanohanana avy amin'ny namana sy ny mpamaky toa anao ny fikambananay hitoerany ho mahaleotena, maimaim-poana, ary hahazaka miasa maharitra!

Manomeza anio

Hijery ny Tenim-Pirenena rehetra? Mandika ny tantaran'ny Global Voices izahay mba ho hitan'ny rehetra ny fitantaran'olo-tsotra manerantany.

Ny tantaran'ny Biryani : Ny Biryani ve no sakafom-pirenena any Pakistana?

Biryani, iray amin'ireo foto-tsakafo Pakistaney. Sary avy amin'i Faizan Ashraf. CC BY-NC-ND 2.0

Ity no ampahany voalohany amin'ny andian-tantara: “Tantaran'ny Biryani” – topi-maso amin'ny kolontsain'ny nahandro mahazatra any amin'ny Firenena Aziatika Atsimo.

Ny Biryani no mpanjakan'ny lakozia Aziatika Atsimo sady sakafo ankafizin'ny rehetra. Ny fikarakarana ny lafika, matetika miaraka amin'ny vary manitra basmati na kalizira, dia norarahana safrona ary misy hena voatetitetika mampilendalenda. Ny fofony hamantarana azy no hamantaran'ny rehetra fa hisy ny fotoan-dehibe. Tena sakafo malaza any Pakistana izy ity ary matetika mipoitra ny fanontaniana hoe: “Moa  ve izy ity no sakafom-pirenen'i Pakistana”?

Raha sakafo natokana ho an'ny mpanjaka izy tany aloha, ankehitriny kosa ny biryani dia maneho ny tsiro sy ny fomban-drazana any amin'ny toerana tsirairay ary sakafo mahazatra any amin'ny toerana maro any Pakistana. Na dia izany aza anefa dia misy ny adihevitra raha ny Biryani no sakafom-pirenen'i Pakistana. Toa tsy mbola nanambara ny amin'izay sakafo atao ho sakafom-pirenena ny governemantan'i Pakistana satria tsy misy afa-tsy nahandro iray ihany no malaza any amin'ny faritra rehetra ary matetika dia tsy takatry ny Pakistaney maro ny sakafo matsiro toy izany. Na izany aza, iray amin'ireo tena mpifaninana matanjaka hisalotra izany ny Biryani.

Manana ny fiandohany ho an'ireo Miozolomana ao amin'ny zanakaontinanta Indiana ary malaza ao amin'ny faritra ny Biriyani .

Tsy sakafo fotsiny ny Biryani. Fa fihetseham-po .. Ny famoronana tsara indrindra teo amin'ny tantaran'ny olombelona !!

Ny teny hoe ” biryani” dia avy amin'ny teny Persiana hoe “birian” izay midika hoe “endasina aloha vao handroana.” Io sakafo vary mifangaro avy any Azia Atsimo io dia niandoha tany amin'ny Miozolomana ao amin'ny zanakaontinanta Indiana. Anisan'ny sakafo Mughlai izay mampalaza an'i India izy ity ary nivoatra nanomboka tamin'ny taonjato faha-15 ka hatramin'ny taonjato faha-19 nanjakan'ny ampira Mughal. Nanandratra ny fahandroan-tsakafo ho endrika fanehoana zavakanto ny Mughals, tamin'ny alàlan'ny fampidirina nahandro maro tao India toy ny biryani, pilaf, ary kebabs.

Tany avaratr'i India no nampidiran'ny Mughals ny Biryani voalohany. Fantatra tamin'ny anarana hoe pakka Biryani izy tamin'izany satria efa nahandroana mialoha ny ankamaroan'ny fangaro ary avy eo nafangaro tao anaty vilany (deg) sy napetraka teo ambony afo malefaka (dum) hamaranana ny nahandro. Nanafangaro ny Biryani tamin'ny Katcha (manta) ny Nizam avy ao Hyderabad (fanjakana) , izay ahitana ny ankamaroan'ny fangaro mbola manta ary hafangaro anaty vilany mifandanja tsara. Nohidiana ilay vilany ary napetraka eo ambony afo malefaka mandra-paha-masany tsara.

Punjabi Biryani. Sary avy amin'ny WIkimedia Commons avy amin'ny Miansari66. Sehatra ho an'ny daholobe.

Ny sasany amin'ireo tsiron-tsakafom-paritra Biryanis any Pakistana dia ahitana ny Sindhi Biryani, Punjabi Biryani, Bohri biryani, Afghani Biryani, na ny Mughlai Biryani nentim-paharazana na Hyderabadi amin'ny endrika Biryani.

Araka ny hevitry ny mpitsikera sakafo Bisma Tirmizi, ny Sindhi Biryani dia karazana pulao navadiky ny mughlai, niaraka tamin'ny tsiro mafilotra sy mifangaro kokoa.

The masala-seeped potatoes, the tangy alloo bukhara (dried plums/prunes), mint and khatta dahi (sour yogurt) render the Sindhi Biryani a different taste, it’s spicier than most regional biryanis and the proportion of the masala to the rice is a little more than of most biryanis on the sub-continental menu.

Ny ovy nosesehana masala, ny tangy alloo bukhara (paiso maina), solila sy khatta dahi (yaourt marikivy) dia manome ny Sindhi Biryani hanana tsiro hafa, masiaka kokoa izy noho ny ankamaroan'ny biryanis any amin'ny ankamaroan'ny faritra ary kely kokoa ny habetsahan'ny masala amin'ny vary noho ny ankamaroan'ny biryanis amin'ny sakafo any amin'ny zanakaontinanta Indiana.

Misy adihevitra hafa izay mahazatra any India sy Pakistana mikasika ny hoe tokony asiana Aloo (ovy) ve ao amin'ny Biryani sa tsia. Toa tian'ny olona sasany foana ny tsirony na miaraka na tsia amin'ny ovy. Tany am-piandohan'ity taona ity, nandefa fitsapan-kevitra tao amin'ny media sosialy i Manal Aijaz, bilaogera Pakistaney. Nandritra ny dimy andro manaraka, dia toa hita nandray am-pahamatorana ity fitsapan-kevitra ity ny tao amin'ny tranokalan'ny Twitter Pakistaney. Indro no valiny:

Na iza na iza mandresy, mametraka ny hafa ho lasa mandrakizay

Ary nisy hevitra vaovao nipoitra:

Hevitra: karakarao ny “FETIBE BIRYANI” izay ahitana tranoeva misy ny karazana biryani rehetra, miaraka amin'ny aloo, tsy misy aloo misy akoho, henan'omby ary henan'ondry. Izay tranoeva mahazo vola betsaka no mandresy. Tapitra.

Raha te hanandrana ny Biryanis Pakistaney ianao dia jereo ny nahandron'i Faatimah amin'ny Biryani Pakistaney tsiron'akoho mora sy nentim-paharazana. Azonao atao ihany koa ny mijery ny nahandron'i Ainy ho an'ny Punjabi Biryani , Biryani Pakistaney miaraka amin'ny henan'ondry sy ny hafa maro.

Amin'izao fotoana izao, toa tsy nisy ny fanapahan-kevitra ny amin'ny hoe sakafom-pirenena ao Pakistana tokoa ve  ny Biryani sa tsia.

Atombohy ny resaka

Mpanoratra, azafady hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.