Pakistana: Mbola Arahina Maso Foana Ny Aterineto

(Fanamarihana: lahatsoratra anglisy nivoaka tamin'ny Jolay 2010)

Sary avy amin'i Mikey G Ottawa. CC BY-NC-BD

[Rohy amin'ny teny anglisy] Nanapaka hevitra ny Fitsarana Avo ao Lahore, any Pakistana, ny 16 jona fa tranonkala sivy sy tolotra aterineto mampiantrano votoaty ”maniratsira fivavahana” no tokony horaràn'ny PTA (Manam-pahefana Pakistaney amin'ny Fifandraisan-davitra). Na izany aza, mba hialana amin'ny tsikera iraisam-pirenena, nanapa-kevitra avy eo, ny tsy hampihatra ity fanapahankevitra ity ny fanjakana fa nampanantena ny hanara-maso ireo tolotra sy sehatra maro malaza toy ny Google, Youtube, Facebook ary Hotmail izay mety ahitana votoaty maniratsira fivavahana azo iadiana hevitra ho an'ireo silamo. Fanampin'ny didy tamin'ny volana Mey farany teo avy amin'io fitsarana io ihany izany fanapahan-kevitra izany, ny handrara tanteraka ny Facebook ary avy eo ny fanapahankeviny (noho ny tsindry avy amin'ny vahoaka) amin'ny fanalàna ny fanakanana ilay tambajotra sosialy malaza.

Tamin'ny famoronana ilay vondrona Facebook “Draw Muhammad Day” no nipoiran'ity fikorontanana ity, izay niteraka fanehoankevitra tena ratsy saika ho tany amin'ny firenena silamo rehetra manerana ny tany ary niteraka fanamelohana indraindray masiaka. Nikarakara fihetsiketsehana ny vondrona farany havanana tao Pakistana ary tena voasakana tanteraka tao ilay tranonkala, toy ny tao Bangladesh. Na izany aza, tsy ny hahafantarana ny hoe iza no manana ny rariny sy ny diso intsony olana. Misokatra ny boatin'i Pandore ho an'ny sivana ary mivoaka avy ao avokoa ny karazan-devoly rehetra mba hiditra ao amin'ireo haino aman-jery vaovao ary hanara-maso ny fihetsika an-tambajotra.

Mitatitra ny blaogy  Pak Point :

Aorian'ny fanombanana ataon'ny kaomity iraisan'ny vondrona ministera, mety ho voasakana avokoa avy ami'ny anaran-tsehatra na ny rohy vantany vao mahazo vaovao na fitarainana ny Ministeran'ny Fifandraisandavitra, na avy aiza na avy aiza izany,

Manamarika i Jenkin's ear fa fambara loza izany rehetra izany :

Indrisy mantsy, mety vao mainka hiteraka olana maromaro kokoa izany raha toa ka tokony hamaha ny sasany. Azo antoka fa manohitra ny silamo ny tranonkalan'ny Vatican saingy azo inoana fa tsy voasakana. Ny olana iray hafa koa dia tsy mazava ny fampianaran'ny finoana Silamo momba ny lohahevitra moahakasika izay azo ekena sy tsy azo ekena ao anatin'ny tranonkala iray.

Manontany i Sana Saleem ao amin'ny Mystified Justice:

Isika ve, amin'ny maha-mponina ato amin'ity firenena ity antsika, mba mananana ny zo hanan-kevitra? Afaka hanokon-dresaka tsy voaara-maso ve isika? Amin'ny maha firenena antsika, tsy mba ho afaka ny hifehy ny tenantsika ve isika? Toa ara-politika kokoa fa tsy ara-pivavahana ity fihazàna mpamosavy ato amin'ny aterineto ity. Fa toy ny ho an'ny rehetra, mahafatifaty antsika ny mampiasa ny karatry ny fivavahana mba hanohanana ny toerantsika ary hampangina ny mpanohitra.

Ho an'ireo sarotiny amin'ny filàna fanadiovana ny Aterineto amin'ny anaran'ny fivavahana, iangaviana ianareo, mba eritrereto ireo tranonkalan-dahatsary mamoafady miisa an'arivony maro ahitana ankizikely izay mbola afaka hidirana foana ao Pakistana, ary tsy tafiditra ao amin'ny lisitr'ireo tranonkala 10.428 ho sakanana. Rahoviana vao mba hianatra ny hanana laharam-pahamehana isika?
Raha ny marina, toa tonga saina ny Pakistaney nianatra fa tsy afaka mifaneresaresa amin'ny maha-firenena antsika isika ary hiasa miaraka amin'ny firenena hafa maneran-tany raha manala ny tolotra toy ny Hotmail, Google, sns . Fa lehibe amin'ny mponina sy ireo mpitondra izay maniry ny hanome fahafahampo azy ireo dia toa tsy mahatakatra ny mety ho fiantraikan'ny sivana atao ankapobeny.

Voaasa hizara lahatsoratra ao amin'ny blaogin'i  Teeth Maestro, Shaista Kazmi, i  Azhar Aslam:

Amin'ny maha-silamo tsotra ahy, mety tsy manam-pahefana azo atokisana kokoa aho raha hiresaka ny finoana Silamo, (na dia tsy nametra velively ny ‘manampahefana’ tsy hanana fanehoankevitra aza ny  finoana Silamo), fa ilay hevitra momba ny faniratsirana fivavahana dia toa mivilana, tsy ampy fiheverana ary vitako mihitsy ny milaza fa manohitra  ny zavatra azontsika amin'ny maha-silamo toy ny fampianarana avy aminà mpaminany mitovy ihany izay ezahintsika arovana ny voninahiny, raha ny heno ao Pakistana. Tsy mitovy amin'ny famaritana ny teny hoe ‘fihatsaram-belatsihy’ ihany ve izany?

Mitatitra i Asif Shehzad ao Taragana fa nanamarika ny mpandinika sasany hoe lasa lavitra kokoa noho ny firenena hafa i Pakistana tamin'ny fanakanana ny Facebook ary mamarana fa nampiseho ny fipoiran'ny finoana Silamo iray mpifikitra amin'ny nentindrazana ao amin'ny firenena izany. Noforonina tamin'ny 1947 mba ho firenena natao ho an'ny silamo, nisintaka tamin'ny fitaoman'ny finoana silamo soufi tonitony fihetsika kokoa i Pakistana, izay niparitaka tao Azia Atsimo, mba hanakaikezana karazany somary henjana kokoa amin'ilay fivavahana nindramina tamin'ny tontolo arabo.

Amiko, mipetraka aty Shanghai, mazava be ny zavatra hitranga raha toa ka hapetraka ny fanakanana ankapobeny ny  Youtube, Google, Hotmail, Facebook ary hafa koa, toy ireo vokadratsy efa nasehon'ny sivana tao Shina. Na dia mety hisy fiantraikany manimba ny endriky ny firenena any ivelany aza ireo hetsika ireo, mbola misy fomba hafa foana hahafahana miala amin'ireo fanakanana ireo ary, toy ny hitantsika tamin'ny volana Mey, tsy dia nihena firy ny fitsidihana ny Facebook na teo aza ny fandrarana azy. Amin'izao fotoana izao, lasa fitaovam-piadiana tanteraka ny fikorianam-baovao ary mampisalasala ahy ny ahafahan'ny olona, na iza na iza, hanakana azy.

Ny hany fomba hahafahan'i Pakistana mandroso mankany amin'ny fivoarana dia ny fahafahantsika hamela ny fahafahana maneho hevitra sy ireo adihevitra matetika miseho ao amin'ny aterineto. Hamono antsika ny tsy fanarahana izany lalana izany ary tsy afaky ny hamela izany isika olon-tsotra.

Atombohy ny resaka

Mpanoratra, azafady Hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.