Niteraka adihevitra momba ny fiafenana anarana an'aterineto ny fikatonan'ny “Diary of an ex-NEET who works overseas” (Diarin'ilay NEET niasa ampitan-dranomasina) tampoka. (Ny NEET dia ilazana ny olona tsy ao amin'ny fanabeazana, asa na fanazarana.)
Amin'ny alalan'ny solon'anarana “Overseas NEET” na “NEET ampitan-dranomasina” no itsikeran'ny mpamaham-bolongana mandavataona ny etika fomba fiasan'ny Japoney sy ny foto-pisainana iraisana milaza fa ny asa hatrany no tokony ho voalohan-daharana miohatra amin'ny zavatra hafa rehetra amin'ny fiainana andavanandro. Tsy nanana asa maharitra ny tenany tany Japana noho ny fankahalany ny tontolon'ny asa any. Rehefa niampita an-dranomasina ny tenany dia nahita asa tamina orinasa vahiny iray ary nahafa-po azy ny fomba fiasa tao. Nanintona olona maro izay tsy mahazoazo aina loatra amin'ny fihetsika ifaneken'ny besinimaro manoloana ny asa ny bolongany izay manana lohateny kely manao hoe “Diky ilay Asa”. Betsaka ihany koa ny fanehoan-kevitra mameno azy.
Nahazo izao haftra manaraka izao ny olona nanomboka ny faha-7 ny volana Aogositra:
@terrakei:Nakatona ny bolongan'i Overseas NEET. Matetika mitsikera ny fomba fiasa Japoney sy ny rafi-piaraha-monina ny mpamaham-bolongana manoratra momba ny asa ampitan-dranomasina. Mitady ho betsaka ny mpankahala azy ireo.
Rehefa hoe hanova ny fomba fisainan'ny Japoney no tanjon'ny bolongana dia tsy azo ialana ny resaka fampifandraisana ny fanakatonana sy ny fomban'ny Japoney mikombokombona. Miaiky amin'ny fahasarotan'ny fidifiana ny tsindry mitambesatra i @nasu_tea:
@mae_htmsr: Ny hafatra farany nataony, “Nakatoko ny bolongako fa mahatsapa fisiana fandrahonana ara-batana aho.” Manontany tena aho raha mitady ny hikasi-tanana azy ny tia tafahoatra ny “fiasana”. Mahatsiaro ny raharaha HAL aho izay namaham-bolongana amin'ny maha-vao nahazo diplaoma miasa any Slovakia azy, izay nisiokantsera indray maka hoe “Niantso ny tany amin'ny Masoivoho ny mpankahala iray hamotopototra ny mombamomba ahy.”
Navoitran'i @d_sapi ny ahiahiny amin'ny fahafahan'ny Japoney miafina tsy mitonona anarana rehefa any ivelany:
@d_sapi: Izay rehetra miasa any ampitan-dranomasina dia tsy tokony hiteny ny firenena misy azy. Hevero hoe iray alina ny isan'ny Japoney miaina ao amin'ilay firenena vahiny. Amin'izay fotoana izay dia miala avy any amin'ny zato tapitrisa, isan'ny mponina any Japana, mankany amin'ny iray alina ny isan'ny olona itadiavana azy. Amin'izany iray alina izany dia zato no mety manana asa. Koa satria maro no miasa amin'ny orinasa lehibe na iraisampirenena dia tsy sarotra ny mitady hoe iza ilay orinasa. Ampio amin'izany ny fahafantarana ny mahalahy na vavy azy sy ny fototr'asany fa tonga dia misy anarana mivoaka avy any. Mitandrema ihany azafady.
@d_sapi: Azon'ny hovitra aho raha namaky ity resadresaka ity: Nisiokantsera ilay mponina any ivelany iray hoe “ ** degre androany”, ary dia manontany izay mihatra aminy ny olona, miteny hoe “Afaka mamantatra azy amin'ny alalan'ny toetr'andro any Eoropa aho. Paris io, tsy izany ve?” Angamba milalao fotsiny ry zareo saingy mba ratsy izany fihetsika izany!
Tsikera
Misy ny olona sasany no mieritreritra fa tokony hanohy ny famahanam-bolongana hatrany ny mpanoratra raha tena tiany hoporofoina fa mendrika hohenoina ny heviny. @shi3z_bot misedra ny haja maha-mpieritreritra malalaka (afaka) azy:
@shi3z_bot: izy ilay lehilahy manindrahindra ny asa ampitan-dranomasina raha ataon'ny mpiasa manaja ny asany any Japana fanalan'andro ny lahatsorany miverimberina. Eritreretiko ho mora noho izany ny mamantatra ny tena anarany sy ny orinasa iasany. Ny fanakatonana dia midika fa tsy nahazoany fahafaha-mieritreritra ny nivoahany nakany ivelany.
Izany ilay mandondòna ny fihetseham-pon'olona amin'ny fehezanteny tahaka ny “Miala ny orinasa mpanandevo” sy “Ambany ny Japoney”. Ary dia nakatony ny bolongany satria nisy nivoaka ny mombamomba azy? Rainitetaka!
Mieritreritra aho fa nanohy namaham-bolongana i “Overseas NEET” raha tsy nanambady. Fa efa manambady izy izao – efa nanoratra ny momba ny fanambadiany iraisampirenena izy indraindray, tadidy? Raha nahatezitra ny hafa ny teniny, ka mety miantraika any amin'ny olo-tiany izany, mazava loatra fa hitsoaka izy. Tsy afaka miady amin'ny olona tsy hitanao maso ianao.