(Fanamarihana: lahatsoratra anglisy nivoaka tamin'ny Desambra 2010)
Fotoana fohy taorian'ireo hetsi-panoherana niseho tamin'ny volana Septambra tany Maputo izay nokarakaraina tamin'ny alalan'ny SMS, navoakan'ny governemanta Mozambikana ny didy Ministerialy izay manery ireo mpampiasa finday naloa mialoha tao amin'ireo tambajotra nasionaly roa mba hanoratra ireo karatra SIM-ny ao anatin'ny volana iray taorian'ny namoahana ilay lalàna. Noraisina ity fanapahankevitra ity taorian’ny nampiharan'ny governemanta tsindry tamin'ireo mpanome tolotra ireo mba hameran'izy ireo ny tolotra ho an'ireo mpanjifa mampiasa fahana naloa mialoha, nandritra ny fotoana nisehoan'ireo herisetra.
Raha toa ka miresaka mikasika ny ”fanaovana heloka bevava” amin'ny ankapobeny ny governemanta, mandroso hevitra kosa ireo blaogera fa manempotra bebe kokoa ireo hetsi-bahoaka vaovao rehetra karakaraina amin'ny SMS ity fepetra ity. Nanoratra tao anatina fanehoankevitra teo amin'ny blaoginy i Reflectindo sobre Moçambique:
A pergunta que temos que fazer é porquê só depois de uma manifestação convocada por sms, o governo corre para bloquear os serviços da telefonia móvel? Porquê não fez isso quando o deputado José Mascarenhas foi ameaçado por sms e posteriormente assassinado?
Manana mpisoratra anarana amin'ny finday eo amin'ny 5,5 tapitrisa i Mozambika, amin'ny mponina miisa 21 tapitrisa. Tany am-boalohany, nandrahona ny hanapaka ny tolotra ho an'ireo olona tsy nisoratra anarana talohan'ny fetra farany tamin'ny 15 Novambra ireo manam-pahefana.
Tamin'ny faran'ny volana Novambra, kely dia kely ny isanjaton'ireo tonga nanoratra ny anarany, izay nilàna ny dika mitovy amin'ny karapanondro manankery. Tsy misy afa-tsy ireo orinasa roa mpanome tolotra ihany no afaka manao izany, Mcel et Vodacom, ary ireo masoivohony ara-barotra sy mpaninjarany ofisialy. Manana birao vitsivitsy ihany ny faritany sasany mba handray an-tànana ireo mpanjifa an-tapitrisa. Ankehitriny dia miaraka miasa amin'ny Biraon'ny Paositra sy Fifandraisandavitra ao Mozambika izy ireo mba hanakaikezana bebe kokoa ireo mpanjifa.
Nitaraina mikasika ny fetra andro tamin'ny faran'ny volana Novambra, tao amin'ny onjam-peon'ny maraina, i Benjamim Fernandes, Filohan'ny Fampandehanana Ara-barotry ny Mcel ary toa tao anatin'ny efatra ora, nivory ireo mpanana petrabola rehetra ary nangataka ny fialàny. Naneho hevitra ny Blaogera Chauque [Pt] fa nidaraboka noho ny ”fifanandrinana tamin'ny Biraon'ny Fitantanana sy ny fitapitaka ambadika i Fernandes”.
Naneho ny tsy fahafaliany manoloana ity fepetra ity i Vodacom, tamin'ny fihaonany tamin'ny DECOM, vondrona mpiaro ireo mpanjifa. Ao amin'ny tranonkalany, notanisain'ny DECOM ny filazana ara-dalàna avy ao amin'ny vondrona mpiady amin'ny kolikoly, Center for Public Integrity (CIP) tamin'ny fametraham-panontaniana mikasika ny maha-araka lalampanorenana ilay Didy
Nas competências, atribuições e funções do Ministério dos Transportes e Comunicações (…) unicamente compete regular as actividades sob sua tutela, mas não impor obrigações ou restrições de direitos aos cidadãos em geral
Nitarina ho hatramin'ny 7 Janoary 2011 ny farany fanoratana anarana ny SIM any Mozambika.
Raha toa ka mihamafàna any Etazonia ny fanontaniana mikasika ny ”tsy fitanilàn'ny aterineto”, mifono lanjany mitovy amin'izany any amin'ny faritra maro ao Afrika ambanin'i Sahara ny fanontaniana mikasika ny fidirana malalaka amin'ny finday. Ankoatra ny toekarena vao misondrotra toy ny an'i Afrika Atsimo sy i Nizeria, efa samy nanao ny fanoratana anarana ny SIM ho zavatra tsy maintsy atao avokoa ireo firenena hafa toa an'i Tanzania, Botswana, Kamerona. Firenena maro no mieritreritra ny hanao izany amin'ny 2011.
Any amin'ny firenena toa an'i Mozambika, nasehon'ireo hetsika niseho vao haingana ny fiatrehana famoretana ara-politika manjo ireo mpandrindra, ary noho izany, ireo mpandraharaha. Mbola aloha be loatra izao hanombanana ny fiantraikan'ny fanoratana ny karatra SIM eo amin'ny fahalalahana maneho hevitra, na koa hoe hahatonga ny fampiasana finday ho lafo be loatra na tsy natao ho an'ireo mahantra, indrindra fa ireo any amin'ny faritra ambanivohitra.