“Quand le village se réveille”: Bilaogin-Kolontsaina Maliana Vaovao
«Quand le village se réveille …(Rehefa mifoha ny tanàna)» dia tetikasa hanangonana sy hizarana ny kolontsaina sy ny fomba amam-panao amin'ny alalan'ny teknolojiam-baovao sy ny fifandraisana ao Mali izay ahafahana mizara lahatsoratra, lahatsary, feo, sy fijoroana vavolombelona avy amin'ireo zokiolona – mpiambina ny fomba amam-panao nentim-paharazana, ny kolontsaina, ary ny fahatsiarovana iombonana eo amin'ny fiarahamonina Afrikanina.
Ny hitahiry ny lovantsofina ara-kolontsaina Maliana sy hananganana marika famantarana hoan'ny tanora no tanjon'ny tetikasa, ary ny mba ahafahan'ny olon-drehetra manerantany ihany koa mahazo izany lovatsofina izany amin'ny alalan'ny bilaogy sy ny tambajotra sosialy.
Efa manana kaonty Facebook hizarana sary sahady ny tetikasa. Eo an-dalam-pananganana kosa ireo kaonty hafa amin'ny tambajotra sosialy izay hanampy amin'ny fizarana ny tetikasa manerana izao tontolo izao.
Ankoatra ny votoaty momba ny kolontsaina avy any andrenivohitra sy ambanivohitra, mifandray amin'ireo tanàna kely enina avy amin'ny faritra telo samihafa ao Mali ny tetikasa. Mikendry hametraka teknolojia nomerika sy fifandraisana aterineto ao amin'ireo tanàna kely ireo ny ampahany amin'ity tetikasa ity, ary koa hampiofana ireo mpikambana ao amin'ny fiarahamonina mikasika ny fananganana sy fanoratana bilaogy mba hanampy azy ireo hampiroborobo ny kolontsainy manokana amin'ny alalan'ny media sosialy, ary hitantana bilaogy iombonana ihany koa.
Nahazoan-dalana avy amin'ny pejy Facebook «Quand le village se réveille …» avokoa ny sary rehetra.