Misokatra indray hoan'ireo bilaogera manoratra amin'ny teny efatrambinifolo sy sokajy marobe ny fifaninanana fanao isan-taona karakarain'ny Deutsche Welle [1]. Ny fifaninanana – Best of Online Activism (Fikatrohana Antserasera Tsara Indrindra) [2] – dia mikendry hampiroborobo ny fahalalaham-pitenena sy ny fanajana ny zon'Olombelona ato amin'ny Aterineto sy manerana izao tontolo izao. Amin'ny Forum Manerantany momba ny Media (Deutsche Welle Global Media Forum) [3] amin'ny volana Jiona no hanolorana ny loka hoan'izay mpandresy .
Fara-fisoratana anarana: 5 Marsa 2014
Aiza no misoratra anarana: ao amin'ny pejim-baovaon'izy ireo. [4] Fanampim-baovao momba ny fitsipika ATO [5]
Sokajy:
- Bilaogy tsara indrindra- mitady bilaogy fakàn-tahaka amin'ny fampiroboroboana sy fiarovana ny zon'Olombelona ary ny fanomezan-tsehatra ny adihevitra misokatra mikasika ny lohahevitra lehibe indrindra momba ny sosialy sy ny vahoaka.
- Zava-baovao tsara indrindra – vahaolana rindrambaiko, fampihatra na sehatra amin'ny aterineto izay natokana hanomezana teknolojia hahafahan'ny olona hampivoatra ny fiarahamonina sy ny fidirana ao anaty fiarahamonina demaokratika.
- Fikatrohana ara-tsosialy tsara indrindra – mitady bilaogy fakàn-tahaka amin'ny fampiasana tsara ny media sosialy, tambajotra sy karazam-pifandraisana nomerika hafa mba hanamafisana ny demaokrasia, fahalalahana sy ny zon'Olombelona .
- Loka Reporters Without Borders [6]- bilaogy izay mijoro tsara hoan'ny fahalalahan'ny vaovao sy ny fanehoan-kevitra manerantany. Midera ireo bilaogera izay sahy manaparitaka vaovao ao anatin'ny toe-draharaha mampatahotra ihany koa ity.
- Loka Global Media Forum – habaka izay mandinika ny fifampiankinana, fifampifandraisana sy ny fandraisana anjara izay mitaona sy mampihetsika ny fampiharana ny demaokratika. .
- Izay Mahay mamorona sy Orizinaly indrindra - habaka manana fomba fijery mahay mamorona sy mampialavoly mikasika lohahevitra matotra. Tsipihina manokana ny fomba vaovao sy mahatalanjona, ny fitantarana sy fanehoana lohahevitra mari-pototra ara-tsosialy. Omena lanja manokana ihany koa ny fanehoana hita maso sy ny ara-java-kanto.
Misy ihany koa ny sokajin-teny Manokana mitady habaka mendrika indrindra amin'iray amin'ireo teny 14 azo ampiasaina (jereo eto ambany). Hoy izy ireo: «Omena lanja manokana ireo habaka izay mitarika adihevitra sy manome fanadihadiana avo kalitao ary fanehoan-kevitra mikasika ny zava-misy ankehitriny. Tsy misy fetra ireo karazana habaka azo ekena amin'ny sokajin-teny manokana.». Mety ahitana bilaogy, habaka, bilaogy madinika, lahatsary ary fandraketam-peo (podcast) ny votoaty avoaka amin'izany.
Teny ekena:
Arabo
Bengali
Shinoa
Anglisy
Frantsay
Alemaina
Hindi
Indoneziana
Persiana
Portiogey
Rosiana
Espaniola
Tiorka
Okrainiana
MAHAVITÀ SOA!