Lahatsoratra farany an'i admin tamin'ny Febroary, 2019
Iran: Bilaogera voasazy higadra
Nitatitra ireo tranonkalam-baovao Iraniana maromaro, tahaka ny Amir Kabir [fa], tranonkalan'ny mpianatra fa voasazy higadra 36 volana an-tranomaizina i Omid Reza MirSyafi, Iraniana bilaogera sady mpanao gazety. Voampanga ho nanevateva ireo mpitondra fivavahana Iraniana sy nanao fampielezan-kevitra manohitra ny Repoblika Islamika izy.
Azerbaijan: Bilaogera, mpanoratra ato amin'ny Global Voices voalaza fa voatazona ao Baku
Voalaza fa notazonina tao Baku ny bilaogeran'ny Frontline Club sady mpanoratra ato amin'ny Global Voices Online Ali S. Novruzov satria manomana fihetsiketsehan'ny tanora ny renivohitra Azerbaijaniana.
Shina: Mandeha dia mikatona ny Youtube
Voalaza fa nikatona nandritra ny roa andro (4-5 Marsa) ny Youtube tao Shina. Araka ny filazan'i William Long, tsy tafiditra tao amin'ny tranonkala youtube ny mpiserasera nanomboka ny 4 Marsa tamin'ny 8 hariva. Niverina ny tranonkala ny sasakalin'ny 5 Marsa, saingy araka ny filazan'i Shizhao (tao amin'ny twitter), naharitra 10 minitra ihany no fahazoana niditra tamin'izany.
Shina: Fanorisorenana ara-politika mihatra amin'ireo bilaogera mitaky ny famotsorana an'i Ilham Tohti
Nanjavona nandritra ny roa herinandro mahery ilay Profesora Uighur ao amin'ny Oniversite Minzu ao Shina sady mpanorina ny Uighurbiz, IIham Tohti.
Shina: Fanesorana ireo vondrona antserasera (E-group) ao amin'ny Douban.com
Voatery nanakatona ny sasany tamin'ireo vondrona antseraserany ny Douban.com, iray amin'ireo tranonkala Web 2.0 malaza indrindra ao Shina noho ny fanentanana manohitra ny Smuts vao haingana. Na dia izany aza, ara-tsosialy sy ara-politika amin'ny endriny fa tsy baranahiny na tsy mendrika ny ankamaroan'ireo vondrona antserasera nofafana.
Shina: Nividy ny tolotra Green Dam ny Google.cn?
Nitatitra ilay bilaogera mandihy miaraka amin'ny G, nanonona loharanom-baovao avy amin'ny Google.cn fa nandany vola be tsy toko tsy forohana hividianana ny tolotra Green Dam ny orinasa mba hanatsarana ny fikarohana votoaty vetaveta. Araka ny filazan'ilay bilaogera, ny fanapahan-kevitry ny google.cn dia ny hanao fihavanana amin'ny manampahefana shinoa.
Shina: Nahazo onitra ireo mpiserasera nogadraina 150 andro
Nilaza ny vaovao Xinhua tamin'ny 31 aogositra fa nahazo onitra 16 arivo RMB (manodidina ny 2.200 dolara) i Duan noho ny fitazonana azy naharitra 150 andro. Ny mpiraki-kevitry ny vahoaka nandoa (11.798 yuan) ary ny polisy eo an-toerana nandoa (5.000 yuan).
Nakaton'i Syria indray ny Facebook
Araka ny filazan'ny Al Quds Al Arabi, mikasa ny hamerina indray ny fandraràna ny Facebook i Syria taorian'ny fandraràna voalohany ny tranonkala tambajotra sosialy tamin'ny volana Novambra 2007. Nilatsaka taorian'ny Facebook namela ireo mponina ao Golan Heights hanamarika ny firenen'izy ireo ho Isiraely izany.