Van Durgas, Priyanka Bharali, Rashmi Bora, Dipanjali Boraik ary Mitali Boruah, avy eo ankavia miankavanana. Sary nalain’i Arpita Das Choudhury. Nampiasaina nahazoana alalana.

Tantara nosoratan’i Tanuj Dhar niaraka tamin’ny mpanoratra.

Indray maraina mangatsiaka an-katoky ny fararano, raha vao nanomboka nitsimoka ny hazavan’ny andro tao amin’ny distrikan'i Sonitpur, any amin’ny fanjakan’i Assam, avaratra atsinanan’i India, nisy feo malefaka avy eny ivelany nampifoha tampoka an'i Priyanka tamin'ny torimasony. Tsapany avy lavitra ny antso toa mapitahotra, fampitandreman’ny langur. Satria tsy zatra monina ao anatin’ny foiben’ny valan-javaboary izy, dia nosokafany moramora ny varavarana, nokendreny tsy hanelingelina ireo namany mbola natory.

Priyanka eo anoloan’ny toby King Cobra ao amin’ny faritra Agoratoli, ao amin’ny Valan-javaboary Nasionaly Kaziranga. Sary nalain’i Arpita Das Choudhury. Nampiasaina nahazoana alalana.

Teo ambanin’ny hazavana malefaka vao maraina, gaga izy nahita tigra roa nijoro teo amin’ilay toerana avo akaikin’ny tobin’izy ireo, angamba nandany ny alina teo izy ireo. “Toy izao no fiainana anaty ala,” hoy ny fanehoan-kevitr'i Priyanka Bharali, 23 taona, raha nihaona tamin’ny Global Voices roa volana taorian’ilay tranga tao amin’ny Valan-javaboary Nasionaly Kaziranga (KNP). Avy ao amin’ny tanànan’i Garbhaga, ao amin’ny distrikan’i Sivsagar ao Assam, izy.

I Mitali, alohan’ny hanombohany ny asa fisafoana ao anaty ala lalina. Sary nalain’i Arpita Das Choudhury. Nampiasaina nahazoana alalana

Rehefa nahita filazana tao anaty gazety eo an-toerana miantso vehivavy ho mpiambina ala i Mitali, dia nanao fangatahana avy hatrany izy, satria efa hatry ny ela no naniriany lalina ny hahazo làlana ahafahany miasa akaiky amin’ny natiora. “Sarotra ny dingan’ny fifantenana, saingy vonona hiatrika sy handresy ireo fanamby rehetra aho,” hoy i Mitali Boruah, 27 taona, avy ao amin’ny tanànan’i Gharmara ao amin’ny distrikan’i Lakhimpur. Nofantenana ihany koa izy tatỳ aoriana ho isan’ireo 5 000 vehivavy mpiasan’ny fiarovana voalohany miasa mavitrika anaty ala an’i India.

Rashmi eo amin’ny toby fidirana fototra ao Agoratoli. Sary nalain’i Arpita Das Choudhury. Nampiasaina nahazoana alalana.

Miasa ao amin'ny Valan-javaboaharin'i Kaziranga

Ny Valan-javaboarin’i Kaziranga dia mirefy 430 kilometatra toradroa, manomboka amin’ny havoanan’i Karbi Anglong any atsimo ka hatrany amin’ny reniranon’i Brahmaputra any avaratra. Tapahin’ny Lalam-pirenena faha-37 ny faritra dimy ao aminy — Burhapahar, Bagori, Kohora, Agoratoli, ary Biswanath — ka mahatonga fifandirana matetika eo amin’ny olombelona sy ny biby.

Iray amin'ireo tokan-tandroka ao amin’ny banjan’i Kaziranga National Park. Sary nalain’i Arpita Das Choudhury. Nampiasaina nahazoana alalana.

Tamin’ny taona 2021 ny tranga fihazana farany voarakitra tao Kaziranga, toerana voajanahary honenan’ny tokan-tandroka,  .

“Tsy natokana ho an’ny fanenjehena mpihaza biby an-tsokosoko ihany ireo vehivavy ireo, fa raha mahatsikaritra olona ahiahiana ao anatin’ny valan-javaboary amin’ny atoandro izy ireo, dia mampandre avy hatrany ny biraon’ny mpiambina,” hoy ny fanazavan’i Suniya Pegu.

“Manomboka amin’ny amin’ny 5 ora maraina ny fisafoanay, hijerena ireo faritra sasany raha misy biby maty na famantarana fihazana an-tsokosoko,” hoy i Dipanjali. “Aorian’izay, mandeha manaraka ny fefy izahay miaraka amin’ny basy 7,62 mm SLR, ary mety mitohy hatramin’ny amin’ny 10 alina ny fisafoana.”

Tamin’ny antsafan'i Global Voices sy i Sonali Ghosh, hoy ny tale lefitry ny KNP, hoe: “Ny zazavavy dia asaina miara-miasa amin’ireo toby marefo indrindra ary mahazo fiofanana mitovy amin’ny lehilahy. Manampy ihany koa izy ireo amin’ny fisorohana ny famonoana biby amin’ny alalan’ny fiaraha-miasa amin’ny vehivavy any ambanivohitra, izay indraindray tafiditra amin’ny tambajotran’ny fihazana biby.”

Nanazava i Bidyut Borah hoe: “Tsy mbola niatrika mpihaza biby mivantana izy ireo, fa mampihatra ny ‘Fifehezana Faritra’ izy ireo, ka mifehy ny tamboho manodidina ao anatin’ny KNP mba hisorohana ny mpihaza biby tsy hiditra ao Kaziranga.”

“Mandeha an-tongotra, manao fisafoana anaty ala miaraka amin’ny basy, toe-javatra iray tsy mbola mby tato an-tsaiko mihitsy. Tamin’ny voalohany dia nahatsiaro mavesatra aho, ary nikorontana ny tanako rehefa nitifitra satria natahotra sao tsy hahatratra ny lasiko. Fa rehefa nandeha teny ny fotoana dia zatra ihany aho,” hoy i Rashmi Borah, 27 taona, izay lasa mpiambina ala taorian’ny nanombohany ny fiainam-panambadiany tao Jorhat.

Dipanjoli eo anoloan’ny toby King Cobra, toerana onenan’ireo mpiambina ao afovoan’ny ala. Sary nalain’i Arpita Das Choudhury. Nampiasaina nahazoana alalana.

“Rehefa nisafidy ny hanao ity asa ity aho tamin’ny voalohany, dia nitsipaka ny fianakaviako satria nilaza izy ireo fa asa natao ho an’ny lehilahy hono, ka sarotra ny nandresy lahatra azy ireo,” hoy i Dipanjali Boraik, 21 taona, avy ao amin’ny toeram-piompiana hatao hoe Swarnapur ao amin’ny distrikan’i Jorhat. Nefa nony farany, nanohana azy tanteraka ihany ny fianakaviany.

Zanaka tantsaha i Priyanka Bharali, Mitali Boruah, Rashmi Borah, ary Dipanjali Boraik, izay niditra ho “Van Durgas,” na “Andriamanitry ny Ala,” tamin’ny volana Aogositra 2023 tao amin’ny Valan-javaboahary Nasionaly Kaziranga.

Ny toetry ny ala

“Tena nanintona ahy ireo karazam-peon’ny ala, ka nataoko tanjona ny hiatrika ireo sakana rehetra amin’ny fiainana anaty ala ho fanatanterahana ny adidiko,” hoy i Mitali.

“Niofana tao amin’ny Tafika Polisy Assam faha-11 any Dergaon ireo tovovavy ireo, saingy tsy mbola zatra niaina anaty ala,” hoy i Suniya Pegu, lehiben’ny “Van Durgas” ao amin’ny faritra atsinanan’i Agoratoli ao anaty Valan-javaboahary Kaziranga, izay mivelatra manerana ny distrikan’i Golaghat sy Nagaon ao Assam. Nanampy izy fa nampiofanina tamin’ny ady an-tanana, ny fitantanana vonjy taitra, ny fitazonana fahasalamana sy tanjaka, ny fampiasana fitaovam-piadiana, ny tifitra, ary ny fanaovana fanazarana amin’ny alina ihany koa izy ireo.

Ireo vehivavy miara-midinika  momba ny fizaràna ireo faritra anaraha-maso hanaovana fisafoana amin’ny asan’izy ireo. Sary nalain’i Arpita Das Choudhury. Nampiasaina nahazoana alàlana.

Miaiky i Dipanjali rehefa nijanona tao amin’ny “King Cobra Camp” fa natahotra mafy izy tamin’ny voalohany noho ny fisian’ny bibilava manodidina monina ao. “Manerana ny toerana rehetra ny bibilava, afa-tsy amin’ny ririnina. Rehefa fahavaratra sy fotoam-pahavaratra, dia tena mailo tsara izahay rehefa mihetsika,” hoy izy nanazava. “Na dia eo ambony tohatra hazo aza ny tobinay, ny toerana fandroana kosa dia eny ambany, ary matetika izahay mahita zana-bibilava mihorirana eny.” Nanaitra sy nampitahotra azy izany tamin’ny voalohany, saingy nony ela dia zatra ihany izy.

“Tena sahisahy tokoa ireto tovovavy ireto ; traikefa vaovao tanteraka ho azy ireo anefa ny fiainana anaty ala,” hoy Bidyut Bikash Borah, Lehiben’ny Sampana Agoratoli. Mbola nampiany hoe: “Somary nihaotra izy ireo tany am-piandohana, saingy vetivety dia nahazatra sy nifanaraka tamin’ny tontolo iasany ka tanterahiny amim-pahombiazana ireo andraikiny.”

Nanazava i Borah fa, ankoatra ny fampianarana ireo fomba fiarovana samihafa, “dia mampiofana azy ireo tsy tapaka izahay amin’ny fahaiza-manao toy ny fikarakarana bibilava, ny fijerena sy famantarana karazam-borona, ary ny famantarana karazan-kazo sy bozaka.”

Mitali sy Dipanjoli eny an-kianja. Sary nalain’i Arpita Das Choudhury. Nampiasaina nahazoana alalana.

Sarotra taminy ny nandao ny vadiny sy ny fianakaviany tao Jorhat andeha hiasa any Kaziranga. “Ho mpiambina ala no safidiko voalohany nosoratako tamin’ny fangatahana. Nanahirana ahy ilay fanapahan-kevitra rehefa nanambady, saingy niditra ihany aho,” hoy Rashmi.

Mahatohina ny herim-pon’izy ireo, nandritra ny antso an-telefaonina i Sonali Ghosh, Tale Lefitry ny KNP, dia nilaza tamin’ny Global Voices hoe: “Ny ankamaroan’ireto tovovavy ireto dia avy any ambanivohitra, ary ny sasany aza monina akaikin’ny KNP, ka efa manana fahalalana fototra momba ilay faritra. Rehefa nahazo fiofanana hentitra izy ireo, dia nitombo ny fahatokisan-tenany sy ny fahavononany hiasa anaty ala.”

Mampiasa takelaka mandeha amin'ny herin'ny masoandro izy ireo, amin’ireo toby ao anatin’ny KNP, ka voatery mandamina tsara ny fampiasana herinaratra mba tsy ho lany. “Rehefa alina ny andro, renay mihaodihaody manodidina ny efitranonay ireo biby, saingy tsy afaka mampirehitra jiro izahay satria mety hampitahotra azy izany, ka mangina fotsiny izahay,” hoy i Priyanka. “Mivonona foana fotsiny izahay amin'ny jiro am-paosy hiatrehina ny vonjy taitra.”

Adidy manohitra ny tsy mety

Any anaty ala, mipetraka ambonina elefanta. Sary nalain’i Mitali Boruah. Nampiasaina nahazoana alalana.

Rashmi sy Priyanka, izay efa nihaza matetika ny toka-tandroka sy ny elefanta rehefa manao fisafoana tamin’ny fiara, dia nilaza hoe: “Mampikorontana ny biby ny fidiran’ny olona matetika. Mitandrina fatratra izahay rehefa ao anaty ala, ary indraindray mampiasa tifitra tsy misy bala mihitsy mba entina hampitahorana azy ireo.”

Malaza amin’ny tondra-drano mahery izay miteraka fahasimbana  saika isan-taona mandritra ny vanim-potoanan’ny orana i Kaziranga.

“Mandritra ny tondra-drano, voasakana ny lalana mankany amin’ireo toby, tsy misy ny herinaratra, ary tsy ampy ny rano fisotro madio,” hoy i Mitali. “Misy ihany koa ny biby toy ny tigra mitady fialofana any amin’ny faritra avo akaikin’ny tobinay.”

Mampiasa sambo fingotra fenoina rivotra ireo mpiambina mba hivezivezena ao amin’ny ala voatondra-drano. “Raha voafandrika ny biby iray, dia miezaka manampy azy izahay ho eny amin’ny toerana azo antoka,” hoy i Suniya.

 Ireo Van Durgas manao fisafoana amin’ny alina miaraka amin’ny lehilahy mpiambina ala. Sary nalaina tamin’ny fakan-tsary GPS. Nampiasaina nahazoana alalana.

Mankasitraka ny fanoloran-tenan'izy ireo, hoy i Ghosh: “Miatrika toe-javatra sarotra izy ireo mandritra ny tondra-drano.”

“Tamin’ny tondra-drano tamin’ny volana Jolay 2024, nikorontana tanteraka ny lalam-pirenena NH 715, izay eo amin’ny sisin’ny valan-javaboary atsimo,” hoy i Ghosh. “Nanampy tamin’ny fandrindrana ny fifamoivoizana izy ireo, nitari-dalana ireo biby handalo soa aman-tsara amin’ireo lalantsara sivy, namonjy ireo biby voafandrika, ary mbola nanohy ihany koa ny asa fanoherana ny famonoana an-tsokosoko ka nahatonga ny taha-pahafatesan’ny biby vokatry ny asan’olombelona ho ambany indrindra teo hatramin’izay.”

Rehefa mandresy ireo sakantsarotra rehetra ireo mpiambina vehivavy ireo, dia mahazo fiderana avy amin’ireo manampahefana sy ny fiarahamonina eo an-toerana izy ireo. Hoy Bidyut Borah: “Ireto tovovavy ireto dia tena modely. Tsy mora ny miasa amin’ny toe-javatra sarotra toy izao, ka tokony ho fantatry ny rehetra ny tantaran’ny herim-pon’izy ireo.”