Atrikasa hampiroboroboana ny fizian’ny teny malagasy anjotra

ireo mpandray anjara amin'ny atrikasa. Sary avy amin'ny mpanoratra ary nahazoana alalana

Notontosaina teto Antananarivo tamin'ny 31 May 2025 ny atrikasa nampitondraina ny anarana hoe Wikiteny, vokatry ny fiaraha-miasa teo amin'ny vondro-mpisera Wikimedia Madagascar sy ny Global Voices Malagasy. Tontosa ity atrikasa ity noho ny fanohanana ara-bola avy amin'ny Knowledge Equity Fund ao amin'ny Wikimedia Foundation, izay manohana ireo tetikasa mampitovy tantana ny fahalalàna manerana izao tontolo izao.

Tafiditra ao anatin’ny fankalazana ny Iray Volan’ny teny malagasy, izay atao isaky ny volana jona, ity hetsika ity. Ny teny malagasy no tenim-pirenen'i Madagasikara ary eo amin'ny 30 tapitrisa eo ny olona miteny izany.

Atrikasa hampiroboroboana ny teny malagasy

Tanjona voalohany tamin’ny atrikasa ny fampiroboroboana ny teny malagasy sy ny fampahafantarana an’i Madagasikara sy ny kolontsainy amin’ny alalan’ny teknolojia nomerika. Nohamafisina ny fampiasana ny Wikimedia ho sehatra fanehoan-kevitra, ary ireo lahatsoratra ao amin'ny Global Voices ho loharanom-baovao azo antoka mba hampanan-karena ny votoaty amin'ity fiteny ity.

Mpandray anjara eo am-pikatrohana, mifantoka amin'ny fandraisany anjara. Sary avy amin'ny mpanoratra, nahazoana alalana

Miroso handray anjara

Olona efatra amby roapolo no nandray anjara tamin’ity fivoriana ity, voasolotena ny mpianatra, ny olom-pirenena, ny bilaogera, ary ny mpankafy ny teny malagasy. Nazoto nianatra sy sariaka ny rehetra. Naneho ny fahafaham-pony ireo mpandray anjara ary vonona hanohy manoratra amin'ny teny malagasy ao amin'ny tetikasa Wikimedia.

Maminirina, mpianatra teny malagasy taona faharoa ao amin’ny Oniversiten’Antananarivo, nanao hoe:

J’ai toujours voulu écrire en malgache, mais je ne savais pas par où commencer. Grâce à cet atelier, j’ai découvert Wikipédia comme un espace libre et accessible pour partager nos connaissances. C’est motivant de savoir que ce que j’écris peut être utile à d’autres.

Te hanoratra amin'ny teny malagasy hatrany aho fa tsy fantatro hoe aiza no hanombohana. Noho ity atrikasa ity no nahitako ny Wikipedia ho sehatra malalaka sy azo idirana hizaràna ny fahalalantsika. Mampazoto ny mahafantatra fa mety hahasoa ny hafa ny zavatra soratako.

Nafana fo niresaka momba ny fandraisany anjara i Ny Avotiana Gael, iray amin'ireo mpianatra :

Je suis très satisfait de cet atelier. Je ne savais pas que contribuer sur internet dans ma langue était possible et aussi utile. Maintenant je veux écrire davantage pour montrer la richesse de notre culture.

Tena afa-po amin'ity atrikasa ity aho. Tsy nahalala aho hoe azo tanterahina ary tena ilaina ny mandray anjara amin'ny fiteniko amin'ny aterineto. Ankehitriny aho te-hanoratra bebe kokoa hampiseho ny haren'ny kolontsaintsika.

Indro misy lahatsarin'ny iray amin'ireo mpandray anjara, Rojo Ravaka, izay mizara ny retsika manosika azy handray anjara amin'ity atrikasa ity. Nohazavainy fa amin’ny maha tompon’andraikitry ny serasera azy dia mahasarika azy ity atrikasa ity noho ny fitiavany ny teny malagasy. Fotoana sarobidy ho azy izany mba hanamafisany ny fahaizany manoratra sy hifehezany tsara kokoa ny fiteny. Nahazoana alalana ity horonantsary ity.

Amin'ity horonantsary iray hafa ity Rohy Ramasinatrehana, mpandray anjara iray, maneho ny fahavononany hampiroborobo ny teny malagasy amin'ny aterineto. Nohazavainy fa miainga amin’ny maha zava-dehibe ity fomba fiasa ity no andraisany anjara, satria, araka ny nambarany, dia tsy misy ny mijoro ho tompon’andraikitra amin’ny fomba ofisialy amin’izany. Nampiasaina ity horonantsary ity rehefa nahazoana alalana

Fifaninanana hanentanana ny fandraisana anjara

Fanamarihana ny fanombohan'ny fifaninanana amin'ny fanoratana, fanitsiana, ary fanatsarana lahatsoratra ihany koa ny atrikasa, edit-a-thon (hazakazam-panitsiana)madiorano tontosaina mandritra ny volana Jona ao amin'ny Wikimedia. Asaina hanoratra, hanitsy, na hanatsara lahatsoratra amin’ny teny malagasy araka izay azo atao ny mpandray anjara, mba hanamafisana ny fisian’ny teny Malagasy eo anivon’ny tontolo nomerika.

Amin'ny faran'ny volana Hahazo valisoa rakibolana teny roa frantsay-malagasy ireo mpandray anjara mavitrika sy namokatra lahatsoratra be indrindra ary feno fanoloran-tena.

Fanomezam-boninahitra

Nanome voninahitra ny lanonana ny fanatrehan’i Nalisoa Ravalitera, akademisiana, poeta ary olo-malaza amin’ny fampiroboroboana ny teny malagasy. Nitondra aingam-panahy ho an’ny mpandray anjara rehetra ny fahatongavany.

Jean Rabenalisoa Ravalitera, filohan'ny sampana haikanto sy momba ny teny ao amin'ny Akademia malagasy. Sary avy amin'ny mpanoratra

Lanonana niara-notontosaina amin'ny faritra hafa

Tsy voafetra amin'ny toerana iray ihany ny atrikasa Wikiteny. Niara-nanatontosa izany koa ny faritra efatra teto Madagasikara: Analamanga (Antananarivo renivohitra), Matsiatra Ambony (any Fianarantsoa), Boeny (any Mahajanga, tanàna misy seranan-tsambo any amin’ny morontsiraka avaratra andrefana), ary Diana (any Antsiranana), ahafahan’olona maro kokoa handray anjara. Mampiaty vondrom-piarahamonina isam-paritra bebe kokoa izao fomba fitsinjaram-pahefana izao amin'ny fampiroboroboana ny teny malagasy anjotra ary ahafahana manangona karazam-pomba fijery sy fandraisana anjara bebe kokoa.

Maneho hetsika mivaingana hampiroboroboana ny tenindreny ny atrikasa Wikiteny, ezaka iombonana hitsofohan'ny teny malagasy ao anaty tontolo anjotra manerantany. Ahafahana mitahiry ny vakoka ara-pitenenana sy mampita izany amin'ny taranaka ho avy ny famoronana votoaty amin'ny teny malagasy amin'ny sehatra misokatra toa ny Wikipedia.

Ao anaty tontolom-pifandraisana mihamahazo vahana, dia zava-dehibe ny mitazona ny fahasamihafan'ny fiteny, anatin'izany ny anjotra, satria ny teny anglisy amin'izao fotoana izao no manjaka fijoroana an'aterineto, mahasahana ny mihoatra ny 60 isanjaton'ny tranonkala.