Raha efa nanontany tena ianareo hoe avy aiza àry no amoahan'ireo mpikambana hafa ato anatin'ity vondrom-piarahamonina miely patrana erantany ity ireny tantaran-dry zareo sy asa fandikàna ataony ireny, tetezo midina àry hahitanareo ny sasany amin'ny toerana fiasàn-dry zareo! (Jereo ny Ampahany voalohany ahitàna sary maromaro kokoa.)

Cecilia (Patagônia, Arzantina):

“Ao an'efitrano fatoriako no napetrako ny toerana fiasàko satria io no toerana mangina indrindra ao an-trano. Eo am-pisotroana maté no sady manao ny asa fandikàko, eto aho no mankafy ny fahitàna ireo tendrombohitra.”

Juliana (Jakarta, Indônezia):

“Fahitàna avy eo amin'ny latabatra fiasàko. Jereo anie ireo bokiko sy ireo “namana” kely mety hamalifaly ahy mandritra ny andro fiasàna e. ”

Romina (Angüés, Huesca, Espaina):

“Faritra ambanivohitra somary milamina no onenako aty Aragón, ary io latabatra io dia napetraka any amin'ny efitra ambanin'ny tafo manakaiky ny varavarankely iray izay avy eo no ahatazanako ireo saha midadasika ao amin'ilay faritra.”

Jean (Lomé, Tôgô):“Tamin'ny voalohany, avy eny ambony sezalava aho no niasa, saingy mba hahazoana aina kokoa, nividy io fehezana [latabatra sy seza] fiasàna io aho ary avy ao amin'ny efitra fandraisambahiny no miasa [saripika voalohany]. Rehefa nandeha ny fotoana, nanofa efitra kely iray aho mba hananako fifantohantsaina kokoa sy hialàna amin'ny tabataban'ny ankizy rehefa miasa [saripika faharoa]. Ary dia ao aho no miasa amin'izao fotoana izao. Saingy tsy maintsy mandamina tsara kokoa ny toerana aho mba hananana birao matianina kokoa sy tsara rivotra.”

Imanoela (Antananarivo, Madagasikara):

“Latabatra kely azo aforitra no nanombohako nanao ny asa fandikàna ireo tantara tato amin'ny Global Voices, ary ankehitriny aho manomboka miasa amina birao maneho kokoa ny amiko! 😀 Somary ala kely maroloko feno hafaliana izay ny biraoko, ka  izay rehetra kiritika kely atao ao dia mitondra pitika haravoana ho an'ny fanahiko. Avy eto aho no mandika amin'ny foko sy ny heriko ireo tantara mahery vaika avy ao amin'ny Global Voices, voahodidin'ireo zavatra tiako.  Maximalist, an-tsitrapo, izaho izay. (⁠｡⁠•̀⁠ᴗ⁠-⁠)⁠✧”

Dijana (Novi Sad, Serbia):

smart

“Nanatri-maso ireo fandikàna avy amin'ny / ho amin'ny fiteny anglisy sy serbiàna ity zoro miafina ity, ary azoko antoka mbola hanohy izany!”

Amadou (Dakar, Senegal):

“Salama GV, toerana ao akaikin'ny efitranoko ity, avy eo no nanaovako fandikàna marobe ny GV anglisy ho amin'ny frantsay. Efa nisy fandraketana lahatsary nataoko teo amin'io toerana io ho an'ny  “Les mots ont la parole – An'ny voambolana ny fitenenana” an'i Filip Noubel sy Jean Sovon; Ankafizo. Amadou, Dakar.”

Skye (Petit Valley, Trinidad sy Tobago):

“Ao an'efitrano fatoriako ny latabatra fiasàko, any ambony rihana, mahita ny Lohasahan'i Diego Martin ery amin'ny saikinosy andrefan'ny nosy Trinidad. Rehefa manjombona tahaka ny anio ny andro, avelako hisokatra kely ny lambam-baravarankely manoloana ahy; raha tsy izany dia mitaratra loatra anaty masoko. Misy sarin'ny neniko naraikitra eo amin'ny varavarankeliko, mba namako rehefa mamaky boky aho, miasa, mamadibadika pejy na manao piôzila. Tiako ny manana fàfana roa; tena manamora kokoa ny fanaovan-javatra izany.”

Ameya (Bengaluru, India):

“Tiako mandrakariva ny afaka mitrandraka sy mahita zava-maitso, araka izany dia akaiky varavarankely hatrany ny latabatro na dia miteraka taratra hafahafa avy any aoriana sy masoandro miantefa amin'ny tavako aza izany. Tsy maintsy ataoko tsara antoka ihany koa ny hisian'ny toerana ho an'ny saka eo anila eo, raha tsy izany dia hianika eny ambony solosaiko ry zareo!”

Iryna (Timisoara, Romania):

“Toerana iray mafàna sy mahafinaritra ao an-tranoko ny toerana fiasàko, eo aho no manao ny asa rehetra ho an'ny GV. Toerana milamina sy ahazoana aina tsara misy izay rehetra ilain'ny tànako takarina — lafatra ho an'ny asa fandikàna sy fanitsiana mila fifantohana.”

Georgia (Diego Martin, Trinidad):

“Araka ny hita amin'ireo karazan-javatra rehetra eo anatin'ny biraoko, ampiasaina ho amin'javatra maro io habaka io ankoatra ny asa ataoko ho an'ny Global Voices!.”