‘Reny sy ny zanany‘ an'i Mikuláš Galanda (sehatra ho an'ny daholobe), fanafangaroana nampiasàna Paint.NET sy Canva.

Novakiako ho an-janako lahy vao telo taona ny tantara iray fampatoriana natao tamin'ny tenindreniko, momba ireo dragona mankafy tacos.

Henoko foana aho manonona ny teny hoe “dragona” miverimberina isaky ny mamadika ireo pejy amin'ilay bokin-tsary.

Maharevo ahy ny fanononana ilay “a” tarihana lavabe amin'ny fitenim-paritro.

Voamariko fa midona amin'ireo nifiko ambany ny lelako mba hahazoana ilay feo.

Talanjona aho mahita ny fomba nahatahirizana ho tsy misy tomika io endrika iray an'ny faritra nahalehibe ahy io nefa ny ankamaroan'ireo hafa, dia na nihalefy, na nanjavona tanteraka mihitsy tamin'ny feoko.

Manontany tena aho raha toa ka handova ilay fomba fanonoko izy satria izaho no reniny, ary izaho no tena dindo lehibe ho azy amin'ny fitenenana anglisy ao anatin'ilay firenena izay tsy mpiteny anglisy onenanay.

Mamadibadika ny rakibolan'ny tenim-paritry ny fahazazàko aho— fiteny anglisy manana ny mampiavaka azy voarafitra avy amin'ny tantara alemàna, skandinavy, pôlôney ary hafa avy amin'ny fifindràmonina— ary dia tsimponiko ireo voambolana sy fehezanteny vitsivitsy ho henony ambarako.

Azoko an-tsaina izy hiantso ny paompy fisotroana rano hoe “bubbler” na hanampy “once” any am-paran'ireo fiteny mibaiko, toy ny “come here” (Mankanesa eto) mba hampalefadefaka ny fidonany, na hihoraka “ope, sorry!” ho mariky ny fanenenana rehefa avy nandona tsy nahy olona iray eny an-dàlana.

Mihomehy aho mihevitra ny fahatanterahan'izany, na azo antoka aza fa tsy honina velively ao amin'io faritra iray manokana io izy.

Manontany tena aho raha, indray andro any, hipetraka any amin'ny faritra iray ao amin'ny firenena niaviako izy.

Manontany tena aho raha hiriako akory aza izany.

Manahy aho sao izy mety tsy hankafy mihitsy ny fiteny anglisy toy ny ankafizako azy, na mety tsy hiaina mihitsy tahaka ny niainako ny hetsika ara-piarahamonina atao ny Zoma, izay andro fanendasana trondro, na mety tsy hankafy hihinana an'izany taco tsara izany tahaka ny ankafizako azy, na mety tsy hitady vola mihitsy amin'ny fanadiovana gorodona any rehetra any aorian'ny fotoam-pianarana, toy ny nataoko.

Sahiran-tsaina aho hoe mety hahatsapa filàna hihazakazaka lavitra, any lavitra be any koa izy.

Manameloka ny tenako aho satria voafetra loatra ny fomba fijeriko, fomba fijerin'olona nahazo tombony, ary mifototra loatra amin'ny tontolo anglôfôna, ka ahoana moa no ahafahako miseho mahalala sy mandidy ny kolontsaina manodidina ny tacos?

Antenaiko ho fifaliana ny hahita azy hanoritra ny zotrany manokana ara-pitenenana, ary hananany hirika marobe hahitàna vondrom-piarahamonina, hanandramany tacos sy handraisany ireo lesona raiki-tampisaka amin'ny fanadiovana gorodona.

Tsaroako ny haben'ny fitiavako mikarenjy mandeha lavitra, any lavitra be any.

Antenaiko fa mba manabe olombelona iray tsara aho.

Esoriko ao an-tsaina ny faniriana hahaizany fiteny roa tsy misy ezaka sy ny fanànany pasipaoro roa hatrany am-pahaterahany.

Kenda kely aho tao anatiko tao noho ny haben'ny fitiavako azy.

Valiako ireo fanontaniany momba ny hasiakan'ireo fangaro  isankarazany asongadina anatin'ilay tantara.

Akatoko ny boky dia miverina amin'ny fanao andavanandro rehefa fotoana fatoriana aho.