Sary hosodoko nataonà mpanakanto Koreana iray aranty ao amin'ny Tranombakoky ny zavakanto mitondra ny anaran'i Abylkhan Kasteyev ao Almaty, Kazakstàna. Sary nalain'ny mpanoratra ary nahazoana alàlana.

Koreana efa ho 175.000 no noroahin'i Joseph Stalin an-keriny hiala tao amin'ny Faritra Farany Atsinanana tao amin'ny Firaisana Sovietika nanomboka tamin'ny 1937. Mbola monina ao Azia Afovoany ny taranak'ireo Koreana voaroaka ireo ary tapa-kevitra ny hampahafantatra ny tantarany sy ny fisiany amin'ny alalan'ny zavakanto sy ny fizarana ny kolontsain'izy ireo.

Koryo-saram no fiantsoan'izy ireo ny tenany, teny iray ampiasaina hamaritana ireo foko Koreana ao amin'ny Firaisana Sovietika. Noterena hifindra monina ny razamben'izy ireo taorian'ny didim-panjakan‘i Staline “Momba ny fandroahana ny vahoaka Koreana hiala ny sisintanin'ny Faritra Farany Atsinanana”.  Tafiditra tao anatin'ny Firaisana Sovietika i Azia Afovoany tamin'izany fotoana.

Natao izany fanapahan-kevitra hamindra ny Koreana izany mba hisorohana ny mety ho fiarahan'izy ireo miasa amin'i Japana, izay nifankahala tamin'ny Firaisana Sovietika tamin'izany fotoana. Nisy hetsika natomboka faingana tamin'ny Septambra 1937, ary olona maherin'ny 100.000 izay nambara ho “tsy azo itokisana,” no nafindra an-keriny tany amin'ireo faritra vitsy mponina ao Kazakstàna sy Ozbekistàna. Nanjary ho iray amin'ireo vahoaka voalohany tao amin'ny Firaisana Sovietika niharan'ny fandroahana faobe ny Koreana vokatr'izany.

Ity manaraka ity misy lahatsary YouTube miresaka momba ny famindrana an-keriny ireo Koreana.

Raha ny ao Kazakstàna fotsiny no resahina dia maherin'ny 100.000 ireo Koreana ao an-toerana amin'izao fotoana. Mandray anjara mavitrika amin'ny fiainana ara-kolontsaina sy sosialy ao amin'ny firenena izy ireo. Ao Almaty, izay renivohitra ara-kolontsaina sy tanàna lehibe indrindra ao Kazakstàna, no ahitàna ny Teatra akademika nasionaly repoblikanina fanaovana comédie musicale Koreana, izay teatra nasionaly Koreana voalohany eto amin'izao tontolo izao. Mampiantrano ny gazety Koreana Repoblikana Koryo Ilbo ihany koa izy, izay azo vakiana amin'ny fiteny telo: Koreana, Kazaka, ary Rosiana.

Ankoatra izay, aranty ao amin'ny tranombakoky ny zavakanto lehibe indrindra ao an-toerana mitondra ny anaran'i Abylkhan Kasteyev ihany koa ny sanganasan'ireo mpanakanto am-polony, isan'ireo teratany Koreana natao sesitany tao Kazakstàna sy ny taranany. Izy ireo izay lasa anisan'ireo nandrafitra ny tontolon'ny zavakanto ao amin'ny faritra. Mbola vitsy mpandalina sy mpikaroka ny momba ity foko ity ivelan'ny faritr'i Azia Afovoany sy Korea noho ny fitokana-monin'i Azia Afovoany tamin'izao tontolo izao nandritra ny vanim-potoana Sovietika.

Nitsidika ity tranombakoka ity niaraka tamin'i Elizaveta Kim, mpahay tantaran-javakanto sady mpiasan'ilay tranombakoka ny Global Voices mba hijery ny tahirin'ny zavakanto Koreana ao Kazakstàna sy hahafantatra bebe kokoa momba ireo mpanakanto Koreana be mpanaraka indrindra.

Ato amin'ity fizarana manaraka ity, hiresaka mivantana momba ireo mpanakanto Koreana i Kim ary hampahafantatra ny sanganasan'izy ireo. Nandray anjara tamin'ny fanitsiana ny lahatsoratra ny mpanao gazety Alexandra Sharopina.

Elizaveta Kim, mijoro eo alohan'ny sary hosodoko noforonin'ny rainy Mikhail Kim izay mitondra ny anarana hoe “Mechta” (Nofy), ao amin'ilay tranombakoka. Sary nalain'ny mpanoratra ary nahazoana alàlana.

Elizaveta Kim: Mamolavola ny sehatry ny zavakanto ao an-toerana

I Kim Hyun Nyun (1908-1994) no voalohany amin'ireo mpanakanto Koreana manan-danja ho anay. Nahazo ny diplaoma avy ao amin'ny Akademia Sovietika ho an'ny Zavakanto izy tamin'ny taona 1937, ary noterena hifindra monina taty Kazakstàna raha avy any Leningrad. Rehefa nanomboka ny famindrana an-keriny, tsy afaka nody tany Vladivostok akory izy satria nolazaina taminy fa nafindra monina avokoa ny rehetra ary tsy nisy olona intsony tao.

Araka ny tsaroan'ireo mpanakanto Kazaka ohatra an'i Uke Azhiyev: “Fony izahay mpianatra (tamin'ny 1937–1938), tianay ny nihazakazaka namonjy ny fampirantiana nataon'i Kim Hyun Nyun satria nandoko sanganasa ara-tantara goavana izy, izay ahitàna olo-malaza maro, ary avo lenta ny filalaovany ny hazavana. Nianatra taminy izahay satria tsy mbola nahita sary hosodoko matotra tahaka izany taty Kazakstàna tamin'izany fotoana.”

Nampianatra tany amin'ny anjerimanontolo i Kim Hyun Nyun no sady niasa tao amin'ny trano famoahana gazety iray, ary nandray anjara tamin'ny famolavolana teatra no mbola sady nanao sary hosodoko. Tsy ampy matihanina tao an-toerana, hany ka voasa na taiza na taiza izy.

Ity manaraka ity misy sary hosodoko noforonin'i Kim Hyun Nyun:

Sary nalain'ny mpanoratra ary nahazoana alàlana.

Teraka tao Vladivostok ny raiko, Mikhail Kim (1923-1990), ary noterena hifindra taty Kazakstàna ihany koa tamin'ny 1937, tamin'ny fahatanorany. Nanonofy ny haka diplaoma tao amin'ny Akademian'ny Zavakanto tao Leningrad izy, saingy tsy navela hiala ny firenena ireo Koreana tamin'izany fotoana izany, izay nosokajiana ho “voanjo voatokana”, ka voatery nijanona taty Kazakstàna izy.

Nitsidika tanàna maro taty Kazakstàna ny raiko. Nandray anjara tamin'ny famoronana sary hosodoko goavana izy. Voatahiry ato amin'ny tranombakokay ireo sary goavana nataony.

Ity manaraka ity misy sary hosodoko iray noforonin'i Mikhail Kim mitondra ny anarana hoe “Schastye” (Hasambarana):

Sary nalain'ny mpanoratra ary nahazoana alàlana.

Mpanakanto malaza iray hafa koa i Boris Pak (1935-1992). Vao efa-taona monja izy no noroasina ho aty Kazakstàna ny fianakaviany, ary maty teny an-dalana ny reniny. Mpahay teny, mpandalina ny kolontsaina tatsinanana, filôzôfa, mpahay siansa henjana ary olona tena mahatalanjona ny rainy, Pyotr Pak-Ir.

Nahazo fanabeazana tsara i Pak Boris. Nahazo diplaoma tao amin'ny Akademian'ny Zavakanto tao Leningrad izy. Namorona sary fanaingoana meva dia meva ho an'ireo boky sy angano nosoratan'i Hans Christian Andersen, Wilhelm Hauff sy ny sisa, izy.

Ireto misy sary roa fanaingoana boky noforonin'i Boris Pak:

Sary fanaingoana ny boky “The Song of Hiawatha” nosoratan'i Henry Wadsworth Longfellow. Sary nalain'ny mpanoratra ary nahazoana alàlana.

Sary fanaingoana ny boky “The Steadfast Tin Soldier” nosoratan'i Hans Christian Andersen. Sary nalain'ny mpanoratra ary nahazoana alàlana.

Tonga tany amin'ny fampirantiana ny asan'i Pak ny olona ary tsy nino hoe vita tànana ireto sanganasany. Sanganasa faran'izay tena voatandrina sy voakaly. Manana firafitra miavaka ny boky; Misy teknika manokana ny fandrafetana azy, izay tsy nisy adinon'i Pak na iray aza; Vitany kajy daholo ireo ary nasehony fa mpanao sary tena mahay izy.

Mbola zaza i Konstantin Pak (1924-1987) no nalefa sesitany taty Kazakstàna. Niasa nandritra ny fotoana ela tao amin'ny teatra Koreana izy. Nanao fampisehoana maro izy tao. Ankoatra izany, nandritra ny fotoana naharitra dia tranobe iray ihany no nisy ny teatra Koreana sy Oigoro. Nifandimby ny fampisehoana nataon'izy ireo, ka nanao ravaka ho an'ny fampisehoana Koreana sy ny teatra Oigoro i Konstantin.

Ireto misy sary hosodoko roa noforonin'i Konstantin Pak:

Sary nataony ho an'ny tantara an-tsehatra “Kim sung-der” noforonin'i Hong Din. Sary nalain'ny mpanoratra ary nahazoana alàlana.

Fitafy iray noforoniny ho an'ilay tantara an-tsehatra “Anarkhan” nosoratan'i D. Asimov sy A. Sadyrov. Sary nalain'ny mpanoratra ary nahazoana alàlana.

Manohy ny fomban-drazana ara-javakanton'ny fianakaviana

Andian-taranaka faharoa amin'ireo mpanakanto Koreana i Svyatoslav sy Afanasy ary Sergey Kim. Teraka taty Kazakstàna izy ireo tamin'ny taona 1950 ary zanaky ny mpiray tampo amin'i Mikhail Kim.

Niasa taminà trano famoaham-boky i Svyatoslav Kim (1954-2017) nandritra ny fotoana ela. Hainy tanteraka ny firafitry ny boky. Nanaingo boky maro izy, nahazo loka tamin'ny fampirantiana boky isan-karazany, ary mpanakanto fanta-daza teo amin'ny sehatry ny fanaingoana boky amin'ny alalan'ny sary.

Ity manaraka ity misy sary fanaingoana noforonin'i Svyatoslav Kim ho an'ny boky “Kruglyi god” (Mandavan-taona):

Sary nalain'ny mpanoratra ary nahazoana alàlana.

Afanasy Kim (1952–1987). Rahalahin'i Svyatoslav. Mpanao sary mahatalanjona sy manan-talenta. Indrisy, tsy misy sanganasany anatin'ireo rakitra aranty ato amin'ny tranombakokay.

Sergey Kim (teraka tamin'ny 1952). Tena nokarakarain'i Azhiev Uke izy, izay nahatoky azy ary nilaza fa mpanao sary hosodoko amin'ny lokorano tena nomen'Andriamanitra talenta izy. Nahatoky azy ihany koa i Pavel Zaltsman izay nahita tao aminy ny fitohizan'ny sekoly Filonov.

Mpanao sary hosodoko amin'ny lokorano tena mahatalanjona tokoa i Sergey. Nisy fotoana izy nanao sary hosodokon-jazavavy na lahy antitra. Tsy nahaliana azy loatra ny sokajin-taona teo anelanelany tamin'izany — ireo izay vao nanomboka namakivaky ny fiainana na ireo izay efa nanana traikefam-piainana ihany.

Ity manaraka ity misy sary hosodoko noforonin'i Sergey Kim:

‘Sarin'i Gali Kopakli.’ Sary nalain'ny mpanoratra ary nahazoana alàlana.

‘Sarin'i Gali Kopakli.’ Sary nalain'ny mpanoratra ary nahazoana alàlana.

Ohatra ity “Sarin'i Gali Kopakli” ity, izay sarinà zazavavy Môldaviana iray. Jereo tsara ilay raozy etsy amin'ny farany ambany havia. Tsy tsikaritra avy hatrany, fa karazana diapazôna mampivady ny loko izy io. Malefaka dia malefaka ny sary: mbola ho lava ny andro iainany, fa inona no miandry azy amin'izany fiainana izany?

Fanamarihan'ny mpanoratra: Na tsy hevitra faran'izay ahitam-bokatra aza ny fampiraisana ireo mpanakanto amin'ny alalan'ny foko raha ny tantaran'ny zavakanto no jerena, dia tsy mitodika amin'ny siansa ny tanjonay tamin'ity lahatsoratra ity fa asa fanaovan-gazety hanasongadinana ny fandraisan'ireo vondrom-poko samy hafa anjara tanatin'ny fiforonan'ny zavakanto maoderina Kazaka. Ny fanontaniana iray hafa manitikitika dia ny hoe hita taratra mivaingana ao anatin'ireny sanganasa ireny ve ny “maha-Koreana” ? Ny tena hita aloha dia mibaribary eto ny “maha-Kazaka Sovietika” — tena mibaribary.