Pikantsarin'ilay artista Trinidadiana sady mpihira Roger Boothman nalaina avy amin'ny lahatsary YouTube an'ny TTT Live Online ‘Roger Boothman – From Then To Now.’ Fampiasana ara-drariny.

Ny harivan'ny 9 Janoary, niditra tao amin'ny pejy Facebook-ny i Michael Boothman, mpanavao ny hira Trinidadiana, nampahafantatra ny mpanaraka azy fa “maty am-pilaminana tao anatin'ny torimasony” i Roger rahalahiny, 66 taona — mpanakanto sady mpamoron-kira miavaka —.

Amin'ny maha-zanaky ny mpiray tampo amin'ny ray aman-drenin'ilay mpiantsehatra an-tsarimihetsika malaza iraisampirenena Geoffrey Holder sy mpanao hosodoko Boscoe Holder azy, efa nilòna tao amin'ny zavakanto hatramin'ny fahazazany i Roger Boothman. Nanomboka nanao hosodoko izy tamin'ny tapaky ny taompolo 1960 tao amin'ny Tranquility Primary School (Sekoly Fanabeazana Fototra Filaminan-tsaina) any Port of Spain. Tamin'ny fotoana nahazoany diplaoma nivoaka sekoly ambaratonga faharoa tamin'ny taona 1975, dia efa mpikambana tao amin'ny Fikambanan-Javakanton'i Trinidad sy Tobago izy, ary nahazo ny mari-piavahana tamin'ny zavakanto.

Nahatsiaro ny iray amin'ireo rahalahiny, David Boothman, hoe: “Nampiana-tena tamin-javatra maro izy, satria toy ny fiarahamonina ara-javakanto hoavy ny ankohonanay, dia nanana izany rehetra izany izy hisarika azy. Iray amin'ireo tontolo iresahana betsaka momba ny zavakanto izany, ary naka ny nilainy tamin'izany izy. “

Nirona tamin’ny hira koa izy; nahatsiaro azy ny mpiray tampò aminy iray ho “mpamoronkira sady mpitendry piano amin'ny endrika malalaka izy izay azony ilonana mandritra ny ora maro [saingy] heveriko fa izy no tena miavaka amin'ny maha mpamorona feon-kira sy mpanoratra tononkira azy.”

Sady nahazo ny toerana voalohany i Boothman no nahazo ny toerana faharoa tamin'ny fifaninanankira teo an-toerana nandritra ny fifaninanan-kira Commonwealth taona 1993, ary izy irery no mpanoratra hira tao Karaiba nahazo ny loka voalohany in-telo tamin'ny fetiben'ny hiran'ny Caribbean Broadcasting Union (CBU na Sendikan'ny Fampielezampeon'i Karaiba). Mpiaro fatratra ny zon'ny mpamorona ao Trinidad sy Tobago koa izy, indrindra rehefa voasaringotra ny asan'ny mpiangaly mozika ao an-toerana. Nanome voninahitra azy ny Copyright Organisation  of Trinidad and Tobago (COTT)  amin'ny maha-“mpamoron-kira, mpamokatra, mpanakanto ary mpampiala voly miavaka azy” izay niasa tao amin'ny Fikambanan'ny Artista ao Trinidad sy Tobago nandritra ny taona 2009-2014, mampiroborobo ireo artista sy mpitendry mozika ao an-toerana, ary maro dia maro ireo artista tanora nanolorany tena hotoroany ny lalana aleha.

Tamin'ny taona 2024, nahazo mari-pankasitraham-pirenena i Boothman, Medaly Soimanga vahiny (Volafotsy), noho ny fanompoany sy ny fandraisany anjara tamin'ny zavakanto sy ny kolontsaina. Tamin'io taona io ihany, nanampy tamin'ny fampiantranoana fanangonam-bola ny Art Society, nivarotra ireo piesy manandanja amin'ny sanganasany mba hanampiana azy hiatrika ny fanambiny ara-pahasalamana.

Tsaroan'ireo mpisera media sosialy ho “maningana amin'ny talentany” i Boothman  ary “tsy nisy nitovy aminy ny fankamamiany mozika sy ny fanoratany hira.” Ny minisitry ny Fizahantany, Kolontsaina ary ny Zavakanto Randall Mitchell, nandritra izany, niantso azy ho “mpanakanto tena manan-talenta izay nanohina ny fo sy ny sain'ny maro ny asany. […] Nanainga fanahy taranaka mifandimby maro izy tamin'ny alalan'ny hirany sy ny zava-kantony, nihaika antsika hahita izao tontolo izao amin'ny alalan'ny solomaso hafa. Asandratsika ny lova navelan'ilay lehilahy nitondra ny hatsarana, eritreritra, ary famakafàna amin'ny fiainantsika.”

Ho setrin'ny fahafatesan'i Boothman, nandranty ny mpisera Facebook Nigel A. Campbell hoe:

“Ho an'ireo mpandray anjara ara-kolontsaina, olomanga sy mpiasa, ny fahalasanan'izy ireo dia mety hahazoana fanambaràna ofisialy an-gazety avy amin'ny Minisitera aorian'ny antso an-telefônina ‘mba hahazoana torohay momba ilay artista.’ Izany savaranonando rehetra izany no entina hanamarihana fa tamin'ity tolakandro ity, lasa ny iray amin'ireo mpamoron-kira tsara indrindra [ary] mitohy ny fahapotehan'ny lova eo amin'ny zavakanto izay nampiseho fampanantenana lehibe nandritra ny diaben'ny firenentsika ho any amin'ny Fahaleovantena amin'ny fahafatesany. Niova, nivoatra ary niofo aoka izany ny môdelim-pihariana ara-kira hany ka lasa mipetraka anilan'ireo sisam-patin'olomasina ny kintan'ny taona omaly […]

“Ny tontolon'ny mozikantsika amin'ny taonjato faha-21 dia mametraka ny feon-kira tsy lefin'ny vanim-potoana ho any ambadiky ny efitrano, fa izay hira misongadina amin'ny vanim-potoana iray ihany. Sarotra ny mitady ny mozikan'i Roger, fa tsy betsaka amin'ny sehatra streaming (tsy mitsahatra anjotra), raha manana kasetin'i LP ianao, dia tsara vintana. Mpamoron-kira, mpitendry zavamaneno, ary artista manana ny maha izy azy, izay mampiseho toetra tsara indrindra amin'ny famoronana hita ao amin'ny fototarazon-dry Holder-Boothman. ary noho ny fampiraisan'ny fianakaviana sy ny namana ny lova navelany manamarika ireo tolony vao haingana, tokony hitodika any aoriana isika eo am-piandrasana ny fomba hanamarihana ny fahombiazana na ny satan'ilay olona miara-dia ao amin'ny fanomezana lehibe indrindra ho an'izao tontolo izao, ny tenintsika ary amin'ny farany ny hirantsika. “

Ho an'i Shanelle Carballo Lemessy, zanakavavin'ny mpiray tampo amin'i Boothman anefa, dia “tsy ilay mpitendry zavamaneno fanta-daza, artista mpahazo loka, na ilay feo henonao mandrakariva amin'ny radio izy — fa mihoatra lavitra noho izany”:

“Izy no mpamelona ny lanonana, ilay dadatoa afaka mamadika efitrano manjombona ho gorodona fandihizana, mampiomehy sy mamaha ny gejan'ny olona rehetra. Izy ilay bandy mandany ny ambim-bolany ho an'ireo zanaky ny mpiray tampo aminy ho olona manokana aminy rehefa tonga ny aniversera sy ilay iray mahay mifandray hatrany ireo taranaka tanora satria niaina ny ankehitriny izy ary tsy mba mandray matotra loatra ny fiainana.

“Izy no olona nampahatsiahy ahy fa ny fianakaviana no lohalaharana — ilay malaza tamin'ny filazana hoe: ‘Tiako ianao, andao hihavana,’ rehefa avy nifandona. Izy ilay lehilahy mandany ora maro an-telefônina miresaka aminao ny androny sy ny tantaram-piainany, ary ny halehibenao aminy. Matetika izy no niresaka fitadiavam-piadanana sy fahasambarana bebe kokoa nandritra ireo taona farany niainany, ary na dia irintsika aza ny nijanonany teto amintsika, ny toerany tsara kokoa hatrany dia ny miaraka amin'ny raibeko sy renibeko any an-danitra, izay itoeran'ny fony.  Raim-pianakaviana hatramin'ny ati-fanahiny i dadatoa Roger, ary na dia mety hahatsiaro ny mozikany sy ny zavakantony aza izao tontolo izao, dia ny fony kosa no tsaroanay.”