Pika tamin-dahatsary “An'arivony tafahitsoka any an-tobin'ny mpifindra monina any Niger”, navoakan'ny AfricaNews YouTube. Fampiasana ara-drariny.

Ao amin'ny efitra midadasik'i Sahara, an-tsisintanin'i Alzeria sy Niger, miatrika fitsapana mafy ireo mpifindra monina an'arivony avy any amin'ny faritra atsimon'i Sahara. Noroahin'ny manam-pahefana Alzeriana izy ireo, matetika no avela hihitsoka tsy manan-tsakafo, rano, na fialofana, terena hamakivaky ny tany efitra tsy mamela mivalo ao anaty hafanana tafahoatra. Niteraka fanakianana mafy avy amin'ireo fikambanana mpiaro ny zon'olombelona izay milaza fa manitsakitsaka ny fenitra iraisampirenena momba ny maha-olona sady mampidi-doza ain'olona io fomba fanao io.

Tao amin'ny tatitry taona 2020, nilaza i Lauren Seibert, mpikaroka momba ny mpitsoa-ponenana sy ny mpifindramonina ao amin'ny Human Rights Watch, hoe: “Manan-jo hiaro ny sisin-taniny i Alzeria, fa tsy hanagadra sy handroaka an-tsokosoko ireo mpifindramonina, anisan'izany ny ankizy sy ny mpitady fialokalofana, tsy hita soritra ny dingana tokony hatao.”

Isam-pandroahana mampivandravandra

Nanomboka ny Janoary 2024, nandroaka Afrikana mpifindramonina, ho any Niger mpifanolo-bodirindrina aminy, efa ho 20.000 i Alzeria, anisan'izany ny vehivavy sy ny ankizy. Amin'ny fomba henjana no anaovana ireo fandroahana ireo matetika, ilaozana an-tany efitra manakaiky sisintany ireo mpifindramonina ireo, voatery nandeha an-tongotra kilaometatra maro mba hahatongavana any amin'ny toerana azo antoka. Nitatitra ny fikambanana Alarme Phone Sahara, izay manampy ireo mpifindramonina any an'efitra eo anelanelan'i Alzeria sy Niger, fa farafahakeliny olona 19.798 no voaroaka nanomboka tamin'ny Janoary ka hatramin'ny Aogositra 2024.

Araka ny filazan'ny fikambanana, matetika ireo mpifindra monina voaroaka any avaratr'i Niger no tafahitsoka ao amin'ny faritr'i Agadez any avaratr'i Niger, tsy afaka manohy ny dia mody na dia eo aza ny tenin'ny sasany te hanao izany.

Vao mainka niharatsy izany toe-javatra izany noho ny toetrandro mahery vaika teo anelanelan’ny volana Mey sy ny volana Aogositra 2024, izay narahina tondra-drano nandravarava ny hain-tany mafaitra . “Tena misy tokoa ny krizin'ny toetr'andro, ary iharana mivantana amin'ny vokatr'izany ny olona mivezivezy sy ny mponina ao an-toerana ao Niger, ”, hoy ny tatitra, manoritra ny traikan'ny krizin'ny toetr'andro mivantana amin'ireo vondron'olona mpifindramonina sy ny fiaraha-monina eo an-toerana.

Dia mandiso fanantenana mamakivaky ny tany efitra

Manoloana ny fanerena ataon'ny Vondrona Eoropeana amin'ireo firenena Afrikana Tavaratra mba hisorohana ny fifindra-monina, nitombo ny fandroahana faobe, ary fantatry ny Vondrona Eoropeana tsara ny zava-misy. Araka ny tatitra nataon'ny Associated Press tamin'ny taona 2018, matetika  manomboka amin'ny fisamborana faobe any amin'ireo tanàn-dehibe Alzeriana ny dingana fandroahana, izay itazonana ireo mpifindramonina ary avy eo itondrana azy ireo any amin'ny faritra atsimon'ny sisintany. Rehefa tonga izy ireo, dia avela any amin’ny tany efitra mitokana, indraindray ambanana basy, ary voatery mandeha amin’ny hafanana mahamay mahatratra 48 degre Celsius (118 degre Fahrenheit). Niteraka fahafatesan'olona maro ny toe-javatra tahaka izany noho ny tsi-fahazakan'ireo mpifindramonina tsy fahampian-drano, ny hafanana ary ny havizanana.

Nomelohin'ny fikambanana mpiaro ny zon'olombelona ireny hetsika ireny, ​​nanasongadinana ny tsy fahampian'ny paika ara-pitsarana sy ny fijaliana iaretan'ireo mpifindramonina. Tamin'ny fanambaràna iray tamin'ny taona 2023, nanambara ny Fikambanana Iraisampirenena miady amin'ny Fampijaliana fa “iharan'ny fampijaliana sy ratsy karakara ireo mpifindramonina ireo. Nosamborina sy nogadraina tsy manaraka paikam-pifidianana izy ireo,” miampanga ny politikam-pifindra-monina ao Alzeria manao ho lasibatra ireo mainty hoditra avy any amin'ny firenena atsimon'i Sahara, ary manondro ny “fampiasan'ny mpitandro ny filaminana fihoaram-pefy ara-poko eo amin'ny fitenenana.”

Teo anelanelan'ny Janoary sy Aprily 2023, olona maherin'ny 11.000 no naverina any Niger, ary nitohy hatrany izany tamin'ity taona 2024 ity fa manome fanampiana ho an'ireo mpifindramonina ireo ny Fikambanana Iraisampirenena misahana ny Fifindramonina, nanolotra sakafo, rano ary fitsaboana rehefa tonga tany Niger ireo olona ireo.

Fanamby ara-tandrohasina sy ara-pitsarana

Ny governemanta Alzeriana anefa dia mitazona fa ireo fandroahana ireo dia atao mifanaraka amin'ny fifanarahana roa tonta miaraka amin'i Niger ary ilaina hiadiana amin'ny fifindra-monina tsy ara-dalàna sy ny fanondranana olona an-tsokosoko. Manamafy ny manampahefana fa miteraka fanamby ara-piarovana sy ara-toekarena ny fisian'ireo mpifindramonina tsy ara-dalàna, ka itakiana fepetra hentitra ifehezana ny firohotry ny fifindra-monina.

Mampisy fanontaniana lehibe araka ny tandrohasina sy ara-pitsarana ny fanaovana ireo fandroahana ireo na eo aza ny fanamarinana maro isan-karazany. Mandidy ny lalàna iraisampirenena fa tokony hifanaraka amin'ny fanajana ny zon'olombelona sy ny fahamendrehana ny fandroahana, miantoka ny fiarovana sy ny fahasalaman'ny tsirairay. Tena mifanohitra tanteraka amin'ireo fitsipika ireo ny fanao mandao ny mpifindramonina any an'efitra, tsy mahazo vatsy na fanampiana.

Manampy trotraka amin'ny fahorian'ireo mpifindramonina ny tontolon'ny fifindra-monina any Afrika Avaratra. Maro amin'ireo Afrikana atsimon'i Sahara no manao dia mampidi-doza manavatsava an'i Sahara, manao izay hahatongavana any Eoropa mba hitady fanararaotra tsara kokoa. Na izany aza, vao mainka mampidi-doza azy ireo kokoa ny fanaraha-maso ny sisintany hentitra dia hentitra sy ny politikan'ny fifindra-monina maneritery any amin'ireo firenena Afrikana tavaratra, izay matetika ampian'ny Vondrona Eoropeana tosika.

Fiainana an-jorony

Any Alzeria, sarotra ny toe-javatra iainan'ireo mpifindramonina avy any atsimon'i Sahara, mampifandanja ny tahotra fandroahana amin'ny fanantenana hanangana fiainana tsaratsara kokoa. Maro no mahita asa amin’ny fanorenana, ary mangataka eny amin’ny sampanan-dalana ny vehivavy, izay matetika miaraka amin’ny ankizy. Na miseraserana matetika aza ny polisy, dia miezaka  manangana fihariana kely ny mpifindramonina sasany ary mba miaina araka ny tokony ho izy ihany, afa-manome ho an'ny fianakaviany any an-trano. Saingy mahatonga ny hoaviny ao Alzeria hanjavozavo tanteraka ny fahabangan'ny zo hialokaloka sy ny lalàna mifehy ny asa manakana ny vahiny.

Manana anjara toerana lehibe ny fianakaviambe iraisampirenena amin'ny famahana ity krizy maha-olona ity, manohana ireo fikambanana manampy ireo mpifindra monina eny an-tanety, ary miantoka ny politikam-pifindra-monina manao ho laharam-pahamehana ny zon'olombelona ary manome lalana azo antoka sy ara-pitsarana ho an'ireo mpifindra monina.

Miatrika fanamby sarotra amin'ny fifindra-monina izao tontolo izao, mampahatsiahy ny sandan'ny olombelona amin'ny politikam-pamerana fifindra-monina sy ny tsy maintsy atao hanajana ny zon'olombelona sy ny fiarovana ireo marefo indrindra amintsika ny tantaran'ireo nilaozana tao Sahara.