Nurlanbek Shakiyev, filohan'ny parlemantan'i Kyrgyzstan, miresaka momba ny drafitra hanovana ny hiram-pirenena. Pikantsary avy amin'ny lahatsary “Спикер ЖК: Гимн Кыргызстана будет изменен” avy amin'ny fantsona YouTube Kaktus Media an'i Kaktus Media. Fampiasana ara-drariny.
Tamin'ny 25 Oktobra, nanambara ny fikasan'ny governemanta hanova hiram-pirenena ny mpitondratenin'ny parlemanta Kyrgyz Nurlanbek Shakiyev. Nohazavainy fa 33 taona lasa izay no nanaovana ny hiram-pirenena, fony vao nahazo fahaleovantena tamin’ny Firaisana Sovietika ny firenena. Noho izany, tsy maintsy ovaina izany, satria efa firenena hafa ankehitriny i Kyrgyzstan izay mahaleotena tsara. Nanampy i Shakiyev fa toy ny fanaovana matso-diabe ny hiram-pirenena ary sarotra hiraina. Nampanantena izy fa ny rehetra, na dia ny 6 taona sy 90 taona aza, dia afaka mihira ny hiram-pirenena vaovao.
Ity misy lahatsary YouTube misy ny fanambaran'i Shakiyev momba ny fikasana hanova ny hiram-pirenena.
Ankoatra ireo fanazavana ireo, namerina tantara iray henony avy amin'ny filohan'i Kyrgyzstan, Sadyr Japarov, momba ny fiantraikan'ny hiram-pivavahana amin'izao fotoana amin'ny vorona i Shakiyev. Araka ny namerenan'i Shakiyev ilay tantara, nandritra ny iray tamin'ireo diany tany ivelany, nahatsikaritra i Japarov fa natahotra ny vorona ka nandositra rehefa nandre ny hiram-pirenen'i Kyrgyzstan ary niverina sy nipetraka tamim-pahatoniana teo amin'ny rantsan-kazo rehefa nalefa ny hiram-pirenen'ny firenen-kafa.
Fotoana fohy taorian'ny fanambaran'i Shakiyev, nanohana ny hevitra i Japarov, namerina hevitra mitovy amin'izany. Nomarihiny fa ireo mpanoratra ny hiram-pirenena ankehitriny dia “nanoratra andalana mahafaly sy mampientam-po momba an'i Kyrgyzstan miditra amin'ny lalana mankany amin'ny fahaleovantena”, saingy lasa “fanjakana feno” i Kyrgyzstan, izay “fantatr'izao tontolo izao”. “Nahoana isika izao raha manoratra hiram-pirenena ho an'ny taranaka ho avy momba ny hoe manana tantara dimy arivo taona ny firenentsika?” hoy i Japarov namarana.
Tsy vao sambany no niara-niasa nanova marika nasionaly ry Japarov sy Shakiyev. Tamin'ny mihintsan-dravina lasa teo, nanao fanambaràna tsy nampoizina momba ny tokony hanovana ny sainam-pirenena i Shakiyev ary niatrika fanoheram-bahoaka mahery vaika. Na dia nasehony ho toy ny fandraisany andraikitra manokana aza izany, dia nambaran'i Japarov tenany ihany taty aoriana fa nanao zavatra araka ny baikony i Shakiyev. Tao anatin'ny roa volana, niova ny sainam-pirenen'i Kyrgyzstan na dia teo aza ny marimaritra iraisana fa tena tsara ny sainam-pirenena ary tokony tsy hiova.
Ity misy lahatsary YouTube ahitana lanonana fananganan-tsainam-pirenena vaovao eo amin'ny kianja lehibe ao Bishkek renivohitra.
Ny tena nanaratsy indrindra ny zava-drehetra dia ny tsy fahombiazan'ny manam-pahefana nanome tohan-kevitra maharesy lahatra momba ny fanovana ary tsy nanontany ny hevitry ny vahoaka, toy ny fanambaràna ampahibemaso ny hamolavolàna sainam-pirenena vaovao. Raha niezaka ny hanamarina ny fiovana i Shakiyev, dia nanazava fa ny tara-masoandro miolankolana tamin'ny sainam-pirenena taloha dia nahatonga ny tunduk (ny singa afovoan'ny faneva sy ny faritry ny tafon'ny yurt nentim-paharazana Kyrgyz) ho toy ny tanamasoandro. Koa amin'izany, nanao fanentanana hanavao sainam-pirenena i Japarov amin'ny fampanantenana fa hanampy an'i Kyrgyzstan “ho firenena mandroso sy mahaleo tena” izany.
Araka izany, na dia nampanantena aza ny manam-pahefana fa handray anjara amin’ny famolavolana hiram-pirenena vaovao ny mpitendry mozika sy ny poety ary ny mpiara-miombon’antoka hafa, dia tsy matoky loatra ny olon-tsotra fa ho re ny feon'izy ireo. Raha jerena amin'ny fanadihadiana natao, mino ny ankamaroan'ny olona fa tsy ilaina ny manova ny hiram-pirenena, ary tsara kokoa raha manokana ny fotoanany sy ny fananany amin'ny famahana ireo olana hafa maika kokoa ny manam-pahefana.
Ity misy lahatsary YouTube misy ny hevitry ny olom-pirenena momba ny fanovana ny hiram-pirenena.
Nanasongadina ireo izay mankasitraka fa ny fanovana hiram-pirenena no ho dingana mety amin'ny fialana amin'ny fanjanahantany, satria mitovy amin'ny hiram-pirenena taloha fony Repoblika Sosialista Sovietika Kyrgyz, anisan'ny andry politikan'ny Firaisana Sovietika, ny tonony sy ny feon'ny hiram-pirenena. Fanampin'izany, manamarika ireo mpitsikera ny hiram-pirenena fa nosoratana tamin'ny mpisolo tena fahatelo, izay mahatonga azy io ho toy ny faniriana, ary misolovava ny hanaovana hiram-pirenena vaovao ny fisian'ny teny toy ny “izaho” sy “isika” ao anatiny mba hanehoana ny firindrana sy ny fananana.
Nolaniana tamin’ny taona 1992 ny hiram-pirenen’i Kyrgyzstan. Nahitana andininy telo sy fiverenana iray izy tany am-boalohany. Tamin'ny taona 2012, nesorina ny fiverenana faharoa satria misy andalana mampiady hevitra. Raha toa ka manondro ny fomba fiasan'ny manam-pahefana amin'ny fanovana ny mari-pamantarana nasionaly ny fomba nanovana ny sainam-pirenena, dia tsy ho tafiditra amin'ny dingan'ny fananganana hiram-pirenena vaovao ny olom-pirenena tsotra. Na izany aza, antenaina fa nanatsoaka lesona tamin'ny fahadisoany taloha ny mpitarika ny firenena ary hiantoka ny lanjan'ny fandraisana anjara sy ny domberina avy amin'ny vahoaka.
