Ny toerana fivarotana/fiasàn'i Hemant, tompon'ny Krishna Handicrafts ao Chandpole, Udaipur amin'izao fotoana izao. Saripika an'ny mpanoratra.

Udaipur, ilay “Tanànan'ny Farihy,” any amin'ny faritra avaratra-andrefan'ny fanjakàna indiàna ao Rajasthan, dia malaza noho ny fifangaroana mahavalalanin'ny hatsaràny voajanahary sy ny tantarany manankarena.  Iray amin'ireo fombandrazana tena sarobidy aminy ny asatànana vita amin'ny hoditra, izay mifàka lalina ao amin'ilay faritra, efa hatrany amin'ny vanim-potoana Rajput (taonjato faha-12 hatramin'ny faha-16).

Maharana Pratap (1572–1597), mpanjaka tao amin'ny Fanjakan'i Mewar tany avaratra-andrefan'i India, tao amin'ilay fanjakana lasa ho Rajasthan amin'izao fotoana izao, no ninoana ho ny iray tamin'ireo mpitarika tany am-boalohany nanohana ireo mpanao asa tànana tao an-toerana, indrindra fa ireo niasa tamin'ny hoditra, izay nanamboatra lasely, ampinga ary fitaovana hafa tena nilain'ireo miaramilany. Nitohy nandritra ny taonjato maro io fiahiana io, niaraka tamin'ireo mpitarika taty aoriana, toa an'i Maharana Sajjan Singh sy Maharana Fateh Singh, izay nanohana ireo mpanao asa tànana izay nanamboatra fitaovana raitra toy ny boky voafono hoditra, vata fitoeram-piravaka ary singa fanaingoana. Lasa maripamantarana ara-kolontsaina ahalalàna an'i Udaipur ireny singa fanaingoana ireny. Satria ny 17 Ôktôbra no napetraky ny UNESCO ankalazàna manerana izao tontolo izao ny Andro Erantany ho an'ny Harena Tsy azo Tsapain-tànana, dia tena fotoana mety izao mba hisaintsainana momba ireo lova maharitry ny asa tànana vita amin'ny hoditra ao Udaipur.

Boky mifono hoditra aseho ao amin'ny Krishna Handicrafts. Saripika an'ny mpanoratra.

Rehefa mandehandeha mamakivaky ireo làlana manodidina ny Tempoly Jagdish ianao, misy tempoly iray midadasika eo afovoan'i Udaipur, hahita toeram-pivarotana marobe ianao mampiranty asa tànana vita amin'ny hoditra. Ao anatin'io tontolon-kolontsaina  mavitrika io, andian-taranaka avy amina fianakaviana maro tao Udaipur io asa tànana io, nampita ny teknika avy amin'ny ray nankamin'ireo zanany lahy. Hemant, izay, ankehitriny, tompon'ny Krishna Handicrafts ao amin'ny faritr'i Chandpole ao Udaipur, dia isan'ireo marobe mpanao asatànana manohy io lova ankamamiana amin'izao andro izao io.

Hemant, mitsiky eo am-pipetrahana ao an-trano fivarotany. Saripika an'ny mpanoratra.

Hemant mizara hoe: “Ninoanay foana hatramin'izay fa ampahany amin'ny tantaran'i Udaipur ny asa tànanay. Ny raiko no nampianatra ahy hoe tsy resaka fandraharahàna fotsiny ny asa momba ny hoditra fa endrika zavakanto iray, misy ny fanahin'i Rajasthan any anatin'ny lava-panjaitra tsirairay.” Amin'izao fotoana izao, miasa amina toeram-pivarotana iray maresaka efa 25 taona, manolotra diary voatambatra anaty hoditra ny asan'i Hemant, sy kitapo ary poketra manana tefiendrika mahatalanjona, ny tsirairay amin'ireny dia pimaso atao amin'ny lasa fahiny avokoa ary tetezana iray mankany amin'ny hoavy.

Ao anatin'ny toeram-pivarotan'i Hemant. Saripika an'ny mpanoratra.

Ramroop, mpanao asa tànana, manao zaitra tànana boky iray atambatra amin'ny hoditra. Saripika an'ny mpanoratra.

Ireo mpanao asa tànana ao Udaipur, toa an'i Hemant, dia mbola mampiasa ireo teknika tranainy be. Ny fampiasàna ireo fitaovana toy ny fitsindrona sy ny fitaovana fanadiovana hoditra dia fitaratry ny fandavantena hitahiry ireo fombandrazana. Ireo vokatr'i Hemant, ohatra, dia mampiasa ireo loko voajanahary, izay ambarany fa manome ireo zavatra foroniny ny “toetra sy endrika iray izay tsy afaka omen'ireo vokatra indostrialy.” Ireny fomba fanao ireny, mazàna misy idiran'ny hoditra nampiasàna tannins avy amin'ny zavamaniry (fantatra koa amin'ny hoe lotson-kodi-kazo), milahatra amin'ireo soatoavin'ny lovainjafy sy ny fahaizamanao izay noraisin'ireo mpanao asa tànana nandritry ny taonjato marobe.

Ny asan'i Hemant dia natao avy amina hoditra vita avy amin'ny tannins nalaina tamin'ny zavamaniry teo an-toerana ihany, nosafidiana noho ny faharetany sy ny toetra ekôlôjika ananany. Ity dingana ity dia mampiasa lotso avy amina loharano voajanahary toy ny hodi-kazo, fomba fanao iray mifàka lalina amin'ny fomba fandomana nentindrazana. Tsy hoe fotsiny manaja ny tontolo iainana izy io, fa koa ahafahana mamokatra vokatra izay tsy lefim-pahanterana rehefa mandeha ny fotoana.

Hemant manamarika lavaka amin'ny alàlan'ny maritoa eo amin'ny takelaka iray ho ana boky iray vaovao. Saripika an'ny mpanoratra.

Boky hoditra iray vao vita, nataon'i Hemant. Saripika an'ny mpanoratra.

Nahasarika ny sain'ny erantany ihany koa ireo vokatra vita avy amin'ny hoditra ao Udaipur, indrindra fa ireo diary vita tànana sy ireo singa hoditra fanaingoana, izay lasa voandàlana fahatsiarovana tadiavina fatratra. Tsy hoe fotsiny taratry ny fahaizana asa tànana ao an-toerana ireny vokatra ireny fa koa miasa ho toy ny masoivoho ara-kolontsaina, amin'ny fizaràna ny lovan'i Udaipur amin'izao tontolo izao. Ho an'i Hemant, “Mandray mpitsidika avy amin'ny lafivalon'izao tontolo izao izahay, izay gaga amin'ireo vokatray. Matetika ry zareo no miteny amiko hoe mahatsapa fifamatorana amin'ny tantara voatahiry any anatin'ireny singa ireny.”​

Tandahatra boky mifono hoditra ao amin'ny Krishna Handicrafts. Saripika an'ny mpanoratra.

Raha toa mitàna anjara toerana lehibe ao anatin'ny lovan'i Udaipur ny fanaovana asa tànana avy amin'ny hoditra, ny adisanina momba ny etika manodidina ny fampiasàna vokatra avy amin'ny biby dia nanosika ireo mpanao asa tànana ao an-toerana hampifanaraka ny asany amin'izany. Marobe, isan'izany i Hemant,  no mametraka ho laharam-pahamehana ny hoditra azo avy amina loharano maharitra sy novokarina nanaraka ny etika, ary ireo taratasy novokarina tamin'ny tànana niainga avy amin'ireo landihazo efa niasa — safidy iray ekôlôjika hanoloana ny taratasy nahazatra.

Taratasy vita tànana vonona hofatorana ho boky mifono hoditra. Saripika an'ny mpanoratra.

Ao anatin'i Udaipur maoderina, mihoatra noho ny maha-fombandrazana azy ny asa tànana; endrika tantara velona iray. Ireo mpanao asatànana toa an'i  Hemant dia maka ny fanahin'io fombandrazana io, mitahiry ireo teknika efa naharitra taonjato maro sy manavao ihany koa mba hiatrehana ny filàna amin'izao vaninandro izao.  Araka ny tsipihan'i Hemant, “Ny singa tsirairay vokarinay dia fanomezana voninahitra ny tantaranay sy tetezana iray mankany amin'ny hoavy. Tsy hoe mamorona vokatra fotsiny izahay; mamorona tantara izahay.”