Sary trozombe tamin'ny alàlan'ny Canva Pro.
Misy antony no iantsoana an'i Dominika ho “The Nature Island (Nosin'ny Natiora). Manankarena sy maitso mavana, malaza amin'ny ala mando sy renirano, loharano solifara ary riandrano izy. Ny fahaizanao miroboka ao anatin'ny zavamaniry sy biby ao an-toerana no mahatonga azy ho iray amin'ireo toeram-pizahan-tany ara-tontolo iainana mahafinaritra indrindra ao amin'ny faritra — ary ankehitriny, dia deraina ihany koa izy noho ny namoronana ny toeram-pialokalofana voalohany maneran-tany ho an'ny trozombe.
The tiny #Caribbean island of #Dominica is creating the world’s first #marine protected area for one of Earth’s largest #animals: the endangered #spermwhale: https://t.co/3el0aio8dh#whales #Americas #marinelife #news23 #protection #wildlife#GreenNewDeal #GoGreen pic.twitter.com/xM0tSZLsaN
— ecohubmap (@ecohubmapcom) November 14, 2023
Nanangana faritra arovana #an-dranomasina voalohany eran-tany ho an'ny iray amin'ireo #biby lehibe indrindra eto an-tany ny nosy #Caribbean kely ao #Dominica: dia ny #spermwhale atahorana ho lany tamingana
Araka ny tatitry ny Associated Press, fanapahan-kevitra lehibe ny fanondroana ny efa ho 800 kilaometatra toradroa (300 maila toradroa) amin'ny ranomasimbe any amin'ny ilany andrefan'ny nosy, izay amelomana sy itaizan'ireo karazam-biby atahorana ho lany tamingana amin'izao fotoana izao ny zanany. Tsy vitan'ny hoe manampy amin'ny fanatsarana ny fahafahan'ny trozona miteraka sy mivelona fotsiny izany, fa hanampy amin'ny ady amin'ny vokatry ny fiovaovan'ny toetr'andro koa.
Ankehitriny, manao ny andraikiny amin'ny fiatrehana ny voka-dratsin'ny fiovaovan'ny toetr'andro ny toeram-pialokalofan'ny trozombe ao Dominica. Tombanana ho latsaky ny 500 ny trozombe monina ao amin'ny ranon'i Dominika, koa satria misy fotoana ny trozona lahy miala ao amin'ny fialofana, ary mazàna miteraka iray ny vavy isaky ny dimy ka hatramin'ny fito taona, faratampony indrindra ny fiarovana azy ireo.
Nahasarika ny sain'ny iraisam-pirenena haingana ny fanambaràna, natao tamin'ny 13 Novambra, na tao amin'ny fampahalalam-baovao mahazatra na tamin'ny media sosialy.
Nanantena ny vondrona Facebook Ocean Azores fa tsy hamela “na iza na iza hiara-milomano amin'izy ireo ny manampahefana Dominikana, satria mety hanelingelina ny biby izany,” ary nanontany tena raha afaka manaraka ny ohatra ataon'ny nosy Karaiba ny Azores ary manangana toeram-pialokalofan'ny trozombe ho azy manokana.
Isabella Askari, mpikirakira Facebook, nilaza fa “feno ny fony” mahita “firenena mijoro ho an'ny zavamananaina an-dranomasina”:
[Dominica has] such strict regulations regarding eco tourism. The local scientists and captains know many of these whales by name and can even tell you details of their personalities. They are part of the community and it shows. Dominica sets an example for the world and I hope others begin to learn.
Manana fitsipika henjana toy izany momba ny fizahantany ara-tontolo iainana i [Dominica]. Mahafantatra ny ankamaroan'ireo trozombe ireo amin'ny anarany ny mpahay siansa sy ny kapiteny eo an-toerana ary afaka milaza aminao ny antsipirian'ny toetran'izy ireo mihitsy aza. Anisan'ny fiarahamonina izy ireo ary mampiseho izany. Manome ohatra ho an'izao tontolo izao i Dominika ary manantena aho fa hanomboka hianatra ny hafa.
Nanampy i Kelly Cromie hoe: “Faly aho naheno ireo goavam-be malefaka ireo fa voaro ihany ny farany!”
Nizara ny vaovao mahafaly sy ny zava-misy mahaliana sasany momba ny trozombe i Ian Lambie, Trinidadiana mpiaro ny tontolo iainana, ary nanamarika fa “I Dominika no manana vondrona ara-tsosialy, zatra ny fisian'ny olombelona indrindra, manolotra fifandraisana miavaka.” Nanampy izy hoe: “Miarahaba ny Governemantan'i Dominika noho ity fisantaran'andraikitra ity.”
