Mpikatroka manao fihetsiketsehana manohitra ny fitsaràna avo ao India mba hametrahana ireo zon'ny LGBT. Saripika an'i Suvajit Mukherjee. Nampiasàna ny lisansa iStock mahazatra, tamin'ny alàlan'ny Vidhi Center for Legal Policy. Fampiasàna nahazoana alàlana.

Nisy mpitsara dimy avy amin'ny fitsaràna antampony ao India namoaka didy nanohitra tsy nisy nitsipaka ny fanaovana ho ara-dalàna ny fanambadian'ireo mitovy fananahana. Ny 17 Oktôbra  2023, namoaka didim-pitsaràna efatra samihafa ilay fitsaràna, izay nanapaka hevitra momba izay hiafaran'ireo fanangonantsonia niisa 21 nataona mpivady mitovy fananahana mitaky ny hanekena ho ara-dalàna ny fanambadiany. Ireo mpitsara dimy niara-nanapaka dia samy nandà ny hanafoana na hanome fanazavàna momba ireo andininy amin'ilay Lalàna Manokana tamin'ny 1954 momba ny Fanambadiana 1954 izay manome alàlana ny fanambadian'ireo olona mitovy fananahana, ary nilaza fa andraikitry ny antenimiera ny mandrafitra ny karazan-dalàna tahaka izany. Avy eo ireo mpitsara dia nilaza fa tsy nisy lalàna fototra ho an'ny fanambadiana ao anatin'ny Lalàm-panorenana ary ny Fitsarana Antampony dia tsy afaka hitsabaka amin'ny sehatry ny fanaovan-dalàna mba hanentsenana ny banga izay, araka ny filazan'ireo nanao ny fanangonantsonia, manohintohina ny zon-dry zareo.

Nibitsika ny Live Laws, gazety mpamoaka vaovao momba ny lalàna Indiàna hoe:

Final Outcome in #SameSexMariage Case :

#SupremeCourt refuses to recognise same-sex marriage, says it is for the legislature to do.

#SupremeCourt records the statement of the Union that it will constitute a Committee to examine the rights and benefits which can be given to… pic.twitter.com/aOMq3ymN9p

— Live Law (@LiveLawIndia) October 17, 2023

Vokatra farany tamin'ny raharaha #FanambadianNyMitovyFananahana:

Lavin'ny #FitsaranaAntampony ny hankato ny fanambadian'ny olona mitovy fananahana, amin'ny filazàna fa anjaran'ny mpanao lalàna no manao izany.

Noraketin'ny #FitsarànaAntampony ny fanambaràn'ny Sendika izay milaza fa hanagana kaomity izy ireo handinika ireo zo sy tombontsoa tokony homena ny… pic.twitter.com/aOMq3ymN9p

— Live Law (@LiveLawIndia) 17 Oktôbra 2023

Niteraka ahiahy sahady teny anivon'ireo mpikatroka LGBTQ+ ity didim-pitsaràna ity, satria nantenain-dry zareo hiaro sy hanohana amim-pahavononana ny zo fototra ho an-dry zareo ny fitsaràna. Io fiandrandràna io dia niainga avy amin'ny zavamisy hoe nohitrikitrihan'ny sasany tamin'ireo mpanao sonia, isan'izany ireo mpivady mitovy fananahana, ny halehiben'ny fanitsakitsahana ny zon-dry zareo rehefa nolavina noho ny fironany ara-nofo fotsiny ny zon'izy ireo hivady.

Nasongadin'ny Asia Democracy Chronicle ny fanehoankevitry ny LGBTQ+ iray mpianatra, antsona hoe Midi:

Midi, 28, LGBT student in New Delhi, On the rejection by the Supreme Court in India of an appeal to legalize same-sex marriage in the country pic.twitter.com/6aSSVpkPLr

— Asia Democracy Chronicles (@demchronicles) October 19, 2023

Midi, 28 taona, LGBT mpianatra ao New Delhi, momba ny fandàvan'ny Fitsaràna Antampony ao India ny fampakàrana didy iray ho fanaovana ho ara-dalàna ny fanambadian'ireo mitovy fananahana ao amin'ny firenena pic.twitter.com/6aSSVpkPLr

— Asia Democracy Chronicles (@demchronicles) 19 Oktôbra 2023

Tolona maharitra

Tamin'ny 2009, Fitsarana Antampony iray tao Delhi no nanàla tsy ho heloka bevava ny fanambadiana pelaka tao India tamin'ny fanafoanana ny Toko faha 377 amin'ny didy Famaizana Indiàna, tarazo navelan'ny lalàna britanika iray tamin'ny 1860 fony vanimpotoana fanjanahantany. Tsara tokoa no nandraisan'ireo vondrona mpiaro zon'olombelona sy ny vondrom-piarahamonin'ireo LGBTQ+ io didy io, na nisedra fanoherana henjana avy amin'ireo mpitarika fivavahana aza izy io. Kanefa, ny Desambra 2013, nofoanan'ny Fitsaràna Antampony ao India ilay fanapahana navoakan'ny Fitsarana Antampony tao Delhi ka naveriny ilay Toko faha 377 — fepetra iray nosokajian'ireo mpikatroka marobe ho tsy demaokratika sy fanitsakitsahana ny zon'olombelona.

Tamin'ny Jolay 2014, nisy fanambarana iray avy amin'i Harsh Vardhan, ministry ny fahasalamana vao voafidy tamin'ny anaran'ny governemanta Modi tamin'izany fotoana izany, nilazana fa ireo olona pelaka dia manana zo toy ny olona rehetra, namelona indray ny fanantenana teny anivon'ny vondrom-piarahamonina LGBTQ+ tao India.  Taorian'izay, ny Septambra 2018, ny Fitsarana Antampony Indiana, notarihan'ny Lehiben'ny Fitsaràna ao India Dipak Misra, dia nanafoana ampahany vitsivitsy tamin'ilay toko faha 377 noho ilay izy manasokajy ho heloka bevava ny fihetsika nifaneken'olondehibe roa mitovy fananahana. Niteraka hafaliana teny anivon'ireo mpikatroka sy ny vondrom-piarahamonina LGBTQ+ ilay fanapahankevitra, nankatoavana ireo taona marobe nikatrohana natokana ho amin'ny fanesorana tsy ho isan'ny heloka bevava ny fifandraisan'ireo olona mitovy taovam-pananahana.

Tao anaty antsafa iray tamin'ny Jolay 2020 nifanaovana tamin'ny Global Voices, ny mpisolovava ao amin'ny Fitsarana Antampony, Saurabh Kirpal, iray amin'ireo mpislovava nijoro niaro ireo mpanao sonia tamin'ilay raharaha izay niafara tamin'ny fanesorana tsy ho isan'ny heloka bevava ny maha-pelaka,  dia nanasongadina ny vokatra tena manana ny lanjany tamin'ilay didy,  dia ny fikisahan'ny adihevitra momba ny fananahana sy ny maha-pelaka nankeny anivon'ny daholobe, tsy nisy tahotra ny ho famoretana avy amin'ny manampahefana.

Na teo aza ireny fivoaran-draharaha ireny, ny fomba fijerin'ny dahobe momba ny fanambadian'ny olona mitovy taovam-pananahana dia mbola mijanona ho miiba hatrany ao India.  Ankoatra izany, tamin'ny Septambra 2020, ny antoko avy amin'ny elatra havanana nasiônalista Hindo, Bharatiya Janta Party (BJP) notarihan'ny governemanta foibe dia nanohitra fandresen-dahatra iray nitondràna ny hoe tokony ho ankatoavina ny fanambadian'ireo mitovy taovam-pananahana, araka ny lalàna Hindu Marriage Act (HMA) sy ny Special Marriage Act (SMA). Ireo lalàna ireo dia mifehy tsirairay avy ireo endrika ara-pitsaràna ananan'ireo fanambadiana hindo sy ny fanambadian'ny samy hafa finoana ao India. Tushar Mehta, lehiben'ny mpampakateny, nilaza tamin'ny Fitsarana Antampony ao Delhi fa ny fanambadian'ny mitovy taovam-pananahana “dia tsy tokony homena alàlana” araka ny Hindu Marriage Act sy ny Special Marriage Act satria mandeha “mifanohitra amin'ireo lalànantsika, ny rafi-pitsaranantsika, ny fiarahamonintsika ary ny soatoavintsika.”

Mamadibadika ilay didy navoakan'ny Fitsaràna Antampony

Ny ankamaroan'ireo mpitsara dia nanamarika fa raha toa resaka sata fotsiny ny zo hanambady na hanana tokantrano ekena araka ny lalàna (izay midika fa io zo io dia mifototra amin'ireo sata na lalàna nankatoavin'ny governemanta), dia nankato zo fototra iray hafa izy. Io zo fototra io dia mahakasika ny fahafahana miara-monina sy miaina fifandraisana manokana any an-tranon'ny tsirairay. Tsy toy ny zo hanambady, ny zo fototra ho afaka miara-monina sy miaina anaty fifandraisana dia tsy miankina amin'ny fankatoavan'ny fanjakàna an'ilay fifandraisana na ny sata hoe “mpivady”.  Ny tena izy, io dia zo sitrahan'ny olona rehetra, tsy ijerena ny hoe nankatoavin'ny fanjakana sa tsia ny fifandraisan-dry zareo, ary mitatra mankany amin'ny vondrom-piarahamonin'ireo  LGBTQ+ io zo io.

Raha ny atiny lalina, nohitrikitrihan'ireo maro an'isa fa manana zo hiara-monina anaty fifandraisana iray ny tsirairay, tsy misy idiran'izay fankatoavana ôfisialy avy amin'ny fanjakana ny satam-piankohonany any. Kanefa, ilay didy navoakan'ny maro an'isa dia tsy nahavita nanome antoka ny fifandraisana tahaka izany ny satam-panambadiana, na nanery ny fanjakana hanefa ny adidiny na andraikiny hamorona fenitra iray ho an'ny fisoratam-panambadiana, fanoratana ireo olon-droa miaraka na ny mariazin'ireo olona LGBTQ+ , na ireo fiaraha-mipetraka maharitra.

Fanampin'ny fandàvana hilaza ny fanambadiana ho isan'ny zo fototra na ny fanomezana zo araka ny lalàna mba hisora-panambadiana ho an'ireo olona mitovy fananahana, ny maro an'isa koa dia mihazona ny hoe tsy ananan'ireo olona mitovy fananahana nefa mivady ny zo hanangana zaza, araka ny fepetra misy amin'izao fotoana izao momba ny fananganana.  Heverin-dry zareo  fa ny rafitra misy ankehitriny dia nolaniana mba hanomezana ny zo ho afaka manangana, na izany ho an'ireo mpivady voasoratra, na ireo olona tokantena, ka tazonina ao an-tsaina foana ny “tombontsoa ambonin'ilay zaza””. Noho ny tsy fisian'ny fankatoavana araka ny lalàna ho an'ny fanambadian'ireo mitovy fananahana, eken'ny maro an'isa fa tsy azon'ireo mpivady pelaka atao ny manangana zaza amin'ny maha-mpivady azy ireo, fa amin'ny maha-olontsotra azy fotsiny. Mandra-pisian'ny fenitra araka ny lalàna ho an'ny tokantranon'ireo mpivady pelaka, izay tsy maintsy ilàna fanapahan'ny antenimiera, dia voarara ho an'ny maro an'isa ny manova ny rafitra momba ny fananganana.

Amin'ny ankapobeny, ny fitsaran'ny maro an'isa dia tsy nanome zo fanampiny ho an'ny vondrom-piarahamonin'ireo LGBTQ+, afa-tsy ny fanekena ny fisiana fanavakavahana sy fitsaratsaram-poana atrehan'izy ireny eny anivon'ny fiarahamonina. Notsipihana ny amin'ny zon'ireo olona LGBTQ+ hiara-monina sy hanangana fifandraisana misy dikany mifototra amin'ny safidin'ny tena manokana, ny fahamendrehana ary ny fiainana manokany, saingy ireny zo ireny dia efa nomen'ny Fitsaràna tao anatin'ny raharaha Navtej Singh Johar v. Union of India tamin'ny 2018. Araka izany, voafetra ny fiantraikan'ilay didim-pitsaràna ary zara raha manamafy ny tsy fiovan-javatra misy hatramin'ny 2018.

Mampalahelo fa taorian'ireo fanangonantsonia 21, andro folo nisian'ireo fihainoana mivantana, volana maro nanapahana hevitra, ary didy efatra samihafa, mbola tsy miova ny toerana misy ny vondrom-piarahamonina LGBTQ+ fa toy izay nisy azy tamin'ny dimy taona lasa ihany.