Sary hita tamin'ny Canva Pro.

Navoaka voalohany tao amin'ny Petchary ny dikan-tenin'ity lahatsoratra ity. Miseho eto ambany ny dika nasiam-panovana rehefa nahazoana alalana.

Mieritreritra ny hipetraka amin'ny trano kelikely izaho sy ny vadiko, mitady toerana hipetrahana izay mora tantanina kokoa. Nampahiratra ny maso tokoa — na angamba tokony holazaiko hoe nampihintsana valanorano ny fikatsahanay trano vaovao ao amin'ny paroasin'i St. Andrew, Jamaika (izay antsoin'ny ankamaroan'ny mponina ao Kingston hoe “tampon-tanàna” ).

Raha ny fijerin'ny mpanjifa, traikefa nandiso fanantenana lalina izany hatreto. Ny tranobe tsara tarehy an-tanàna sy ny trano manintona hita ao amin'ny tranokalan'ny mpivarotra trano aman-tany dia tsy mitovy, mifanakaiky. Mahita triatra midadasika amin'ny rindrina, loko miendaka, hazo rofia malemy ary dobo filomanosana mihandrona izay efa tsy azo ampiasaina intsony izahay, ary fivoarana somary vaovao ireo, amin'ny mari-bidy lafo sy mirendrarendra, diso, anarana vahiny.

Miahiahy anefa aho fa mety milaza ahiahy hafa lalina kokoa momba ny firongatry ny “fivoarana” vaovao ao St. Andrew ireo triatra ireo. Vatosokay aman-taonina maro no arotsaka ao amin’ny toerana somary kely, misy tany sy zava-maniry izay tsy nahazaka afa-tsy trano iray na roa monja taloha. Inona no ataon'izany amin'ny tanin'ny faritra, indrindra rehefa nesorina ny zava-maniry rehetra? Mety hahazaka ny vesatry ny tranobe iray misy efitrano fonenana 50 ve ny tany, ary inona no mety ho fiantraikan’izany eo amin’ireo trano manodidina? Tsy mihetsika ve ny tany? Ahoana raha misy hovitrovitry ny tany? Ao anatin’ny faritra misy horohorontany anefa isika, araka ny fampahatsiahivin'ny horohorontany antsika tsindraindray. Fanontaniana ho an'ireo geolojista, injeniera, na farafaharatsiny, ho an'ny mpandrefy tany ireo.

Afaka mahazaka fampandrosoana mahery vaika toy izany ve ny tontolo iainantsika efa marefo, izay matetika iharan’ny oram-be, ny fihotsahan’ny tany, ary ny loza hafa? Misy ny lalana iray izay ifatraran-tranobe, mifanila, amin'ny tilikambo lehibe sy tilikambo kely, tsy misy sehatra ifohan-drivotra, tsy misy hazo (izay fahavoazana saika isaky ny “fivoarana-fampandrosoana”) ary misy fiantsonan'ny fiara eo ambanin'ny tranobe. Ao amin'ny faritr'i Jacks Hill, tsy mari-toerana ny hantsana amin'ny fotoana tsara indrindra; Na izany aza, misy fivoaran-trano manaka-danitra goavambe efa nomanina, na efa eo an-dalam-panatanterahana.

Manana fanontaniana maro kokoa momba ny fahatezàna aho, eo amin'ny sehatry ny tontolo iainana sy ny fiovan'ny toetrandro. Saika tsy misy fiheverana amin'ny fampiasana angovo na rano ireo fampandrosoana vaovao rehetra ireo. Ohatra, ny ankabeazan'ny lakozia dia misy fanasàna vilia (mety mba hikarakara  fety fisakafoanana isan-kariva ianao), ary ahitana fanahazan-damba ny efitra fanasan-damba (amin'ny tany mafana, izay afaka manaha lamba ary maina mandritra ny antsasak'adiny izany).

Misy ihany koa ny fanafanana rano – mbola mandeha herinaratra lafo vidy koa. Tsy lazaina intsony ny zava-misy fa, amin'ny fiakaran'ny mari-pàna, dia tsy maintsy ilaina ny fitaovana manome rivotra mangatsiaka, indrindra raha ratsy ny famolavolana ny trano ahitana varavarankely saika mitovy amin'ny an'ny fonja, ary voahodidin'ny vatosokay (beton). Tsy maintsy midangana ireo faktioran-jiro ireo! Solika fôsily, tonga eto isika. Tsy efa ampy ve ny hafarantsika?

Inona no nitranga tamin'ny angovo azo avy amin'ny masoandro (manana tara-masoandro be dia be isika, sa tsy izany)? Inona no nitranga tamin'ny fiotazana ranon'orana, ny fanodinana ary ny teknika hafa fitsitsiana rano? Tsy tafiditra ao anatin'ny ankamaroan'ny fampandrosoana vaovao hitanay ireo, mainka fa ny taloha. Manana fanafanana rano mandeha amin'ny masoandro izahay izay tena mandaitra ka mety mandoro ny tenanao raha tsy mitandrina, ka dia mazava tsara amiko izany – saingy tsy mazava ho an'ny mpamolavola. Tsy afaka mampiasa paompy rano mandeha amin'ny masoandro ho an'ny dobo filomanosana ve izy ireo farafaharatsiny (saingy tsy maintsy raitra ny dobo)?

Raha ny momba ny rano, hiankin-doha amin’ireo siniben-drano mainty miparitaka eny rehetra eny ve izy ireo ary manantena ny tsara indrindra? Manao ahoana ny tosi-drano eny amin'ny rihana ambony amin'ireo tranobe goavam-be ireo, raha jerena fa mety hiatrika haintany maharitra sy lavalava isika amin'ny hoavy? Toa tsy nisy eritreritra mihitsy ny amin’ny fahatezàna. Manontany tena aho raha mbola ho azo iainana ny sasany amin'ireo toerana ireo ao anatin'ny 10 na 20 taona.

Eo amin'ny sehatry ny fiomanana amin'ny loza, raha sendra misy rivo-doza, ahoana ny fomba hivoahan'ireo mponina ao amin'ireo tranobe misy tilikambo, manana tazana mahafinaritra eny amin'ny tilikambo hafa ireo? Manana drafitra fiomanana amin'ny loza ve ireo tranobe ireo? Raha misy tondra-drano na fihotsahan'ny tany, inona no ho ataon'ireo olona monina ao amin'ny tranobe mifatratra ao an-tanàna, voahodidin'ny takela-pandrakotra (dalles) vita amin'ny vatosokay sy rindrina manodidina amin'ny metatra maro? Misy rafitra famoahan-drano sahaza ve? Ny zavatra iray fantatro tsara dia ny hoe tsy afaka (ary tsy mitroka) rano be dia be ny vatosokay, na ny tatatra voajanahary na nataon'olombelona izay naorina teo amboniny, na nofenoina mba hahazoana toerana amina metatra vitsivitsy ahafahana manao fanorenana, mety mbola ho feno raha misy oram-be – sa tsy izany? Averiko indray, tsy maintsy mirotsaka an-tsehatra ny injeniera. Angamba tsy mitombina ny tahotro, saingy nanana fahatsapana — ara-bakiteny — ho rendrika izahay rehefa nitety ny sasany tamin'ireo fananana ireo.

Farany fa tsy ny kely indrindra, tokony tsy maintsy mandinika ny fandrahonan'ny afo amin'ireny fampandrosoana avo lenta ireny. Manana tohatra sy fitaovana hiakarana any amin'ny rihana ambony ve ny sampana Mpamono Afon'i Jamaika?

Ny fahatsapako dia maro amin'ireo tranobe ireo, natsangana tao anatin'ny fahamehana, no mameno ny fitakiana fomba fiaina ahazoana aina sy mety kokoa. Azoko tsara izany filàna izany. Na izany aza, tsapako fa efa nanao sorona betsaka isika: hazo matotra nesorina ary nosoloina hazo tsy tompon-tany “manendrika”; hazo madinika misy voninkazo vitsy sy mifanalavitra, satria mbola tsy misy toerana ho azy ireo; ny rohivoary miaraka aminy (aza manantena hahita vorona maro!); ireo mpifanolo-bodirindrina sy tambajotram-piarahamonina sariaka ary ny fanatsarana ny fiarovana aterak'izany; filaminana sy fahanginana rehefa miala sasatra ao an-trano; ary rivotra madio koa aza; Na dia ratsy aza ny kalitaon'ny rivotra ao Kingston, manakana ny mponina ao aminy sy ny mpifanolobodirindrina aminy tsy hahazo rivotra sy hazavana ireo trano avo be ireo.

Fiainana mitombina sy maharitra ve ity, sa mamelona fotsiny ny faniriana ho an'ny “fomba fiaina” saro-takarina izay hitantsika isan'andro ao amin'ny Instagram, voaaro tsara amin'ny rindrina avo, mpiambina ary fefy vy miranirany?

Indraindray aho mieritreritra fa tokony hitandrina amin'izay faniriantsika isika … ary na ahoana na ahoana, indray andro any, mila maka indray ny fiaraha-monina misy antsika isika, na dia novaina mila tsy ho fantatra aza izany.

Raha toa ka mikasika anao ireo olana ireo sy ny hafa momba ny fanajariana ny tanàndehibe ao Jamaika, dia azonao atao ny manjohy ny Citizens Rights to the City (Zon'ny Olom-pirenena ao amin'ny Tanàna), vondrona misy vondron'olom-pirenena 29 sy fikambanan'ny mpiara-monina miorina tsara, indrindra ao amin'ny paroasin'i St. Andrew. Azonao atao koa ny manantena ny handre vaovao bebe kokoa avy amin'ny fikambanana tsy mitady tombony Island City Lab, amin'ny ho avy.