Pikantsary avy amin'ny andiany “Port of Lies” (Seranan'ny Lainga) avy amin'ny  fantsona Youtube Mirror Fiction.

Andian-tantara iray amin'ny fahitalavitra ao Taiwan antsoina hoe “Port of Lies” (amin'ny teny Sinoa 八尺門的辯護人) no miresaka ny iray amin'ireo olana tena saropady indrindra ao Taiwan ankehitriny : ny foko. Raha ny marina dia nitoeran'ireo vazimba teratany i Taiwan tany am-piandohana – izay ahitana fara fahakeliny ny telo isan-jaton‘ireo vahoaka amin'izao fotoana izao, ary mampiantrano ihany koa mpifindra monina anisany betsaka indrindra avy any Azia Atsimo-Atsinanana. Ny 24 Jolay no navoaka tamin'ny Netflix ilay andiany.

Ny “Port of Lies” an'ilay mpisolovava lasa mpamorona Tang Fu-jui (唐福睿) dia namboarina avy amin'ny tantara iray mitovy anarana nosoratan'i Tang ihany koa. Nanomboka ny tantara rehefa voatendry i Tung Pao-chu (佟寶駒) mpiaro ny vahoaka, mpikambana ao amin'ny foko Amis [iray amin'ireo vazimba teratany ao Taiwan] hiaro Indoneziana iray mpanjono mpifindra monina nampangaina ho namono ny kapitenin-tsambo Amis iray sy ny fianakaviany. Mitarika ekipa iray mpiaro i Tung, ahitana an'i Lien Chin-ping (連晉平) avy amina fianakaviana malaza manam-pahaizana mikasika ny lalàna sy Leena, Indoneziana mpitsabo mpanampy izay ilaina ho mpandika teny. Rehefa nanadihady ny raharaha ny ekipa dia saron'izy ireo ny tetidratsy iray mahavoarohirohy ireo tomponandraiki-panjakana sy lehilahy mpandraharaha vitsivitsy.

Tao anatin'ny tafatafa iray vao haingana niaraka tamin'ny CNA, dia niteny Tang fa tamin'ny voalohany fony nitrandraka ilay tantara izy, dia naniry ny hiresaka ny olana momba ny fanamelohana ho faty, izay mbola mihatra hatrany ao Taiwan, sy ny fahatezerana manodidina ny firazanana, izay nitarika azy hampahatsiahy ny tranga tamin'ny taona 1986 izay namonoana olona iray atao hoe Tang Ying-shen (湯英伸) avy amin'ny foko indizeny Tsou, noho ny famonoana ny fianakavian'ny mpampiasa, na dia nasaina nanao asa an-terivozona aza izy ary niatrika fampijaliana. Ao anatin'ny “Port of Lies,” ilay mpandray anjara fototra atao hoe Abdul-Adl, izay niharan'ny fanamelohana ho faty ihany koa, dia niaritra ny fanararaotana nataon'ny mpampiasa azy ary nalaina tsy an-drariny ny pasipaorony, izay mbola mitoetra ho olana ao Taiwan.

Ny tantara foronina no milaza amin'ny fomba tsara indrindra ny zava-misy

Miaraka amin'ireo 30 taona mahery manasaraka ny raharaha Tang Ying-shen amin'ny tantara foronina voaresaka tamin'ny antsipirihany ao anatin'ilay fandaharana tamin'ny fahitalavitra, dia nirian'ilay tale ny handinika ny fomba hametrahana ny hetsika mitovy tahaka izany tany amin'ny lasa ho ao anatin'ny tontolo maoderina. Araka ny voalazan'i Tang dia saropady ny firazanana manerana ny firenena rehetra satria ny ankamaroan'ny mponina matetika dia matahotra sao hozaraina amin'ny hafa ny loharanon-karena ary matetika manao tsinontsinona ny olana atrehin'ireo olona samihafa firazanana aminy ka manao fitondra azy ireny ihany koa ho toy ny olom-pirenena sokajy faharoa.

“Taloha dia Vazimba izany ; ankehitriny dia ireo mpiasa mpifindra monina [heverina ho sahala amin'ny olom-pirenena sokajy faharoa], ary amin'ny hoavy, foko iray hafa no mety hanolo azy ireo”, hoy izy. Ny fiafaran'ny tantara dia mampametra-panontaniana ireo mpijery fahitalavitra hanontany tena raha toa mendrika hitokisana ny lalàna. Mino mihitsy i Tang fa na tsy tonga lafatra aza ny lalàna, dia io ihany no hany vonjy ananan'ny olona. “Ny finoana ny lalàna dia tsy misakana ny fametraham-panontaniana momba azy; mifanohitra amin'izany aza, tokony hanohitra [ny lalàna] hatrany isika .” Nasongadiny fa na miova tsikelikely aza ny lalàna dia miezaka ny hihatsara hatrany izy.

Raha sady nanentana ny vahoaka tsy hanary toky amin'ny lalàna, dia nanambara izy fa tsy misy farany ny fikatsahana ny hitsiny sy ny rariny na ny fiarovana ny zon'olombelona ho an'ireo vitsy an'isa, nampiany hoe : “Ady tsy misy fiafaràna io”. Nomarihin'i Tang fa na toa tsy miova mihitsy aza ny fiarahamonina, dia misy ny fahasamihafana tsikelikely amin'ny sehatra maro, ary misy vondron'olona miezaka manova zavatra. Io no hafatry ny “Port of Lies” izay antenainy fa hanakoako any amin'ireo mpijery fahitalavitra.

Miaraka amin'ny maripahaizana ambony momba ny Lalàna, fiofanana efa ho 10 taona momba ny lalàna ary dimy taona amin'ny fampiharana Lalàna, dia nilaza i Tang fa efa ho ny antsasaky ny androm-piainany no laniny nilonana tao anatin'ireo olana araka ny Lalàna ary mbola hitohy ny fahalianany amin'ilay sehatra – na izany ao anatin'ny fiainana na ny dingana misy famoronana, izay ahafahany maneho ny tena fotokeviny fototra : fiahiana ny zon'olombelona. Nanazava i Tang fa olana iray mahakasika mivantana ireo “vitsy an'isa” ny  resaka zon'olombelona, satria ny maro an'isa dia afaka miaro tena ary manana loharanon-karena bebe kokoa hiarovana ny zony. Avy amin'ny maha-mpisolovava ka hatramin'ny maha-mpamorona azy, dia ny tombontsoan'ny mpanjifany no andraikitra lehibe amin'ny mpisolovava, ary raharaha mandeha singantsingany ihany no noraisiny. “Zavatra iray ihany no azonao atao amin'ny fotoana iray, raha mbola manana idealy ara-pitsaràna ianao ary fanantenana hisian'ny rariny hatrany. Mifanohitra amin'izany anefa, ny fitantarana dia mamela anao hahakasika olona maro kokoa.”

Ohatra, nandritra ny adihevitra mafana tao anaty fiarahamonina Taiwanezy mikasika ny fanamelohana ho faty, dia nomarihin'i Tang fa toa samy nandray fijery samihafa be ny andaniny sy ny ankilany ka nampanahirana ny fametrahana fifampiresahana misy lanjany. “Afaka atao teboka fiaingana ho amina fifanakalozan-dresaka ny tantara iray. Rehefa samy namaky tantara iray mitovy isika rehetra, dia azontsika miandalana izay tian'ny tsirairay holazaina ary hitantsika ireo teboka mampisaraka.”

Ao anatin'ny “Port of Lies,” idiran'ilay tantara lalina ireo lohahevitra mabahe resaka, tahaka ny fanamelohana ho faty, ireo mpiasa mpifindra monina ary ny fanavakavahana ara-poko. Nanaiky i Tang fa somary nanahy izy mikasika ny karazana olana toa izany, saingy manosoka hevitra hoe ny tantara iray tsara dia manelingelina na manafintohina tsotra izao ny olona sasany. “Raha toa azo hitarafana ny zava-misy sy mampiharihary ny fahamarinana ny asa famoronako, dia manana antony ampy tsara aho hiatrehana fanakianana, izay manery ahy ihany koa hitandrina bebe kokoa rehefa mikitika[ireny olana ireny] aho.”