Global Voices: Lazao anay ny momba anao—iza marina moa i Simon Zwierniak?

Simon Zwiernak: 27 taona aho, mpanao gazety, mitady asa (mihomehy). Avy any Normandie (ato am-poko mandrakizay) aho, nonina tany Bruxelles nandritra ny fito taona, ary mikasa ny hifindra any Varsovia mandritra ny volana vitsivitsy, na taona vitsivitsy. Hirika hanampiako ny fitenin'ny razambeko izany, araka ny hevitr'ilay anarako, ao amin'ny lisitry ny talentako. Ankoatra izany, liana amin'ny vaovao iraisam-pirenena aho (fifandirana, hetsika ara-tsosialy, toetr'andro), teknolojia, fanatanjahantena ary lalao video. Mpakasary ihany koa aho ary mianatra ny fomba fakana horonantsary, hanatrarana ny tanjoko faratampony: ny hanatontosa lahatsary fanao tahiry.

GV: Oviana ianao no niditra tato amin'ny GV ary inona no nanosika anao hanao izany?

SZ: Tamin'ny taona 2018, vao avy nijanona tamin’ny fianarako momba ny hairafitrano [maritrano] aho ary nanomboka ny mari-pahaizana lisansa amin'ny Serasera. Ny tanjoko: ho mpanao gazety rehefa vita ny lisansa. Noho izany, mba hihazon'ny tongotro ao amin'ny media nandritra ny fianarako, dia nahita ny Global Voices aho ary nanomboka nandika teny araka izay ahafahako.

GV: Lazao anay bebe kokoa momba ny traikefanao amin'ny maha mpandika teny anao ato amin'ny GV. Inona tamin'io andraikitra io no lafin-javatra tena nahatalanjona anao indrindra?

SZ: Ity misy fotoana iray izay tena tsy hohadinoiko ato an-tsaiko: rehefa voasakana nandritra ny volana maromaro tao amin'ny Firaisamben’i Myanmar i Laila Le Guen (ndeha hahatsiaro azy), mpitantana Lingua frantsay antsika teo aloha, taorian'ny fanonganam-panjakana. Fotoana hafahafa. Saingy famantarana tsara ihany koa tamin’ny zavatra tsapako momba ny traikefako tato amin'ny GV: varavarankely iray manatrika izao tontolo izao. Na tamin'ny alalan'ireo mpandray anjara ao aminy na amin'ireo lohahevitra nosoratantsika.

GV: Amin'ny maha-mpandika teny nosafidinay ho an'ity volana ity, misy teny fampaherezana atolotrao ho an'ireo mpandray anjara ve?

SZ: Mahazoa fahafinaretana! Ary raha mety hanampy ny olona tsirairay izany, dia mazàna aho manaraka paika (lamina) rehefa mandika teny (raha ny marina, mitovy tahaka ny fotoana hanoratako lahatsoratra izany): manoratra ny zava-drehetra indray mandeha aho. Ny fanitsiana no ampahany manan-danja indrindra amin'ny asa. Iverenako indray mandeha ny firafitry ny fehezanteny sy ny fisosany, fafako araka izay azo atao ny voambolana hoe “izany/dia”, ary avy eo manamarina ny fitsipi-pitenenana aho, ary farany… ny famerenana mamaky farany aorian'ny torimaso mamy!