[1]Vero Nika nandritra ny Thai Fight iray. Sary avy amin'ny The Irrawaddy
Ity lahatsoratra [1] ity dia nivoaka voalohany tao amin'ny The Irrawaddy, tranonkalam-baovao tsy miankina ao Myanmar. Ity dika nasiana fanovàna ity dia naverina navoaka eto amin'ny Global Voices ho toy ny ampahany amin'ny fifanekena iray hifampizara votoaty.
Vero Nika, 26 taona, vehivavy voalohany mpiady lethwei [2] avy ao Myanmar nahazo ny fehikibo iray tamin'io fanatanjahantena io, dia nandresy Breziliàna iray efa nahazo fandresena in-25 tamina fifaninanana Muay Thai iray natao tao Bangkok, nanamafy araka izany ny toerana maha-laharana voalohany azy erantany, araka ny voalazan'ny World Muay Thai Organization.
Nandritra ireo Lalaon'i Azia Atsimo-Atsinanana tany Singapaoro tamin'ny Septambra 2015, nahazo ny medaly alimo ho an'i Myanmar ilay mpanao ady totohondry avy amin'ny foko Kayan. [3]
Taorian'ilay fanonganam-panjakana tamin'ny Febroary [4] tamin'ny taona lasa, nankany Thailandy izy, toerana nanombohany nifaninana tamin'ny Muay Thai sokajy 53 kg.
Vao haingana ity Kayan mpiady hafakely ity no niresaka tamin'ny The Irrawaddy momba ny fandresena, faharesena, ny drafitrany, ary ny nandraisan'ny tafika ny fahefana.
The Irrawaddy (TI): Mba lazao anay ny momba ireo ady nataonao.
Vero Nika (VN): Ady Muay Thai niisa valo no efa nataoko. Resy aho tamin'ilay voalohany fa nandresy tamin'ireo sisa rehetra. Mbola manana ady roa ho atrehana aho amin'ity taona ity, ny 20 Novambra sy ny 24 Desambra. Ifanandrinako amina Thai mpiady ny iray.
Tsy afaka niala sasatra afa-tsy andro dimy monja aho taorian'ireo ady tsirairay satria, amin'ny ankapobeny, misy lalao iray isambolana. Tany aloha, afaka niala sasatra nandritra ny roa ka hatramin'ny telo volana aho. Raha mandresy aho amin'ny Novambra, dia ady tsy misy itsaharana no atrehako amin'ny Desambra.
TI: Inona avy ireo zava-nanahirana niainanao rehefa nanomboka nifaninana tao anatin'ny Muay Thai ianao?
VN: Efa mora amiko ankehitriny. Tany am-piandohana, tsy naharaka ilay fiangaly aho. Saingy efa mora kokoa izao ny zavatra rehetra.
Amin'ny ady totohondry, ny totohondrinao ihany no azonay ampiasaina. Fa amin'ny Muay Thai, azonao ampiasaina ihany koa ny kiho. Tsy dia natoky ny tenako loatra aho fony nanao ady totohondry, angamba noho izaho tsy ampy traikefa. Saingy amin'ny Muay Thai dia tsy manan-tahotra mihitsy aho. Miady mba handresy aho.
TI: Renay fa any Thailandy ianao no mipetraka ary nandray anjara tamin'ireo hetsika fanoherana ny fitondrà-miaramila. Inona ireo olana niainanao mba hahatongavana tao Thailandy?
VN: Taorian'ilay fanonganam-panjakana dia nambara be fa hoe endriky ny fanoherana aho. Nolazain'ny sasany fa tany an'ala niaraka tamin'ireo revôlisiônera aho, nefa aho tany Yangon.
Betsaka ny lainga nafafy momba ahy ka vokatr'izany dia tsy nahatsiaro fahalemana aho. Nisy namana iray nanontany ahy izay tiako hatao.
Naniry ny hanohy ny filalaovana ny lethwei aho saingy tsy azo antoka ho ahy raha ao Myanmar no hanohy ny filalaovako ady totohondry. Araka izany dia nanapaka hevitra aho ny handeha. Tany amin'ny volana Oktôbra tamin'ny taona lasa izany.
TI: Manakory i Thailandy?
VN: Miankina amin'ny fomba ijerevako azy izany. Tsy manana vola ahy manokana aho. Akanjo teny an-damosiko fotsiny no nentiko niala. Tsy nanana na inona na inona. Nanampy ahy tamin'ny zavatra rehetra ilay namako. Somary nanahirana tamin'ny fotoana nahatongavako, saingy efa tsaratsara kokoa izao.
[1]Vero Nika nandritra ny Thai Fight iray. Sary avy amin'ny The Irrawaddy
TI: Ny fijerinao ny ‘junta'?
VN: Halako ny jadona. Efa nijaly tamin'izany aho fony mbola kely. Natahotra sy niafina tany an-tranoko aho no sady manampina ny sofiko raha vao mandre olona miteny birmana.
Tsy lavitra ny toby miaramila ny vohitra nonenako. Tonga sy maka izay tiany ireo miaramila.
Namono ny nihinana ny akohonay ry zareo. Tamin'izany, betsaka ny trangam-panolanana.
Tsy te-hiverina hiaina ireny fahatsiarovana ireny aho. Tsy te-hiaina anaty horohoro intsony. Tsy nanana fahafahana handia sekoly izahay tamin'izany ary navesatra be ny hetra. Tsy te-hahita azy ireo intsony aho. Tsy tiako io.
TI: Manao ahoana ireo fianakavianao any Myanmar?
VN: Mandositra any an-tendrombohitra ry zareo rehefa misy ady, dia miverina mody rehefa mitsahatra izany.
Novonoin'ny fitondràna ireo sivily nanerana ny firenena, isan'izany ny tao amin'ny Fanjakan'i Karen.
Tsy noheveriko ho zavatra ratsy tahaka izao no mety hitranga taorian'ilay fanonganam-panjakàna. Tsy tànako ny tomaniko isaky ny mahita tatitra momba ny vono olona aho. Ary tsy misy zavatra hafa azoko atao afa-tsy ny malahelo azy ireny. Te-handresy ny jadona aho ary hanohana ireo izay miady amin'io. Nefa tsy afaka manao na inona na inona.
Vero Nika manao fanazarantena amina gonim-pasika. Sary avy amin'ny The Irrawaddy
TI: Ahoana no nahatafiditra anao tamin'ny lethwei?
VN: Fony mbola kely aho no nanomboka. Tany an-tsekoly tao Pekon, nisoratra anarana nanaraka fampianarana momba ny ady totohondry aho.
Tsy nisy nahaliana ahy afa-tsy ity fantanjahantena ity. Afaka manokana ny fiainako manontolo aho mba ho lasa ho tompondaka. Nandao ny ankohonako sy ny havan-tiako aho ho an'io fanatanjahantena io. Tena adalan'io aho ary io no tena ilaiko.
TI: Inona avy ireo fanamby natrehanao amin'ny maha-vehivavy anao ao anatina fanatanjahantena haiady? Ahoana no nihoaranao azy ireny?
VN: Tsy dia henjana loatra. Tia asa mafy aho. Tsy tiako ny maratra eo am-panaovana fanazarantena.
Fa ny tena olana dia ny tonga fadimbolana. Tena faran'izay mahasosotra. Tsy afaka manao fanazarantena aho mandritra ny fadimbolana ary tena maharary mafy io. Betsaka ny ady no nifanandrify tamin'ny fahatongavan'ny fadimbolako. Mila mikarakara be mihitsy ny tenako manokana aho.
Tiako ny hibata fandresena amin'ilay ady amin'ny Desambra ary ho lasa tompondakan'ny fehikibo mainty. Avy eo aho, ny taona manaraka an'io, te-hanjohy ny One Championship [fifaninanana haiady mifangaro ao Singapaoro]. Io no tena iriko fatratra indrindra.
TI: Manohana anao ny olona na eo aza ny hasarotam-piainana atrehan-dry zareo. Inona no tianao ho ampitaina amin'izy ireo?
VN: Hajaiko daholo ny mpanohana tsirairay. Haiko fa nijery ny adiko ry zareo na teo aza ny teritery natao tamin'ny aterineto. Mandrisika an-dry zareo aho mba hikarakara ny tenany sy hitandrina tsara. Hiezaka aho hanome ny tsara indrindra avy amiko, dia miangavy, tohizo ny manohana ahy.