Nopihana avy amin'ny Manizha's YouTube channel [1] mampiseho ny hirany farany indrindra, “Now or Never” momba ilay vehivavy Kyrgyz tanora tantsaha mianatra milalao ice-hockey
Vao nifandrirotra sisintany [2] nahatonga firohotan'olona hitady fialofana any ankafa indray i Kyrgyzstan sy i Tajikistan. Fa ho an'ilay Tajik-Rosiana sady kintan'ny Eurovision Manizha, Kyrgyzstan no ianaran'ny ankizivavy milalao hockey ambony ranomandry sy hanovozan-kery, araka ny asehony ao amin'ny lahatsarin-kirany farany.
Nampihorikorika (<nampihorakoraka na phenomène) ny sehatry ny hira post-sôvietika i Manizha: teraka tao Tajikistan, tsy maintsy nandositra [3] niaraka tamin'ny fianakaviany ny ady an-trano tao amin'ny firenena izy ary nankany Rosia, tany no lasa mpihira hip-hop, nampifangaro miaraka ny fiteny Tajik, Rosiana ary Anglisy mba hahazoana laza iraisampirenena fony izy nisolo tena an'i Rosia tamin'ny fifaninanana Eurovision 2021 [4].
Ny mampiavaka an'i Manizha amin'ireo mpanakanto pop hafa ao Rosia dia ny fiatrehany an-karihary ireo lohahevitra mbola fady resahana ao amin'ny fiarahamonina Tajika na Rosiana ankapobeny: ny fitsipahana ny fanjakazakan'ny ray, ny toeran'ny vehivavy ao amin'ny fiarahamonina nentim-paharazana, ny fanekena ny olona LGBTQ+, ary ny fanekena ny anjara toerana fototra ananan'ireo mpifindramonina Aziatika Afovoany an-tapitrisany izay mbola tsy hitan'ny mason'ny maro ao Rosia. Maro no tafintohina fony izy no nisolotena an'i Rosia tao amin'ny Eurovision, ary niantso ny parlemanta mba handrara azy tsy hihira eo ambany fanevam-pirenena Rosiana [5], raha nanakiana ny hirany tamin'ny lohateny misongadina “vehivavy Rosiana” tsy maneho ny Soatoavina Rosiana [6] ny lehiben'ny komity ara-kolontsaina ao amin'ny Duma[m]-panjakana.
Tamin'ny 12 Oktobra, namoaka horonan-kira an-tsarimihetsika ho an'ny hirany “Now or Never [1]” izy, izay nampiarahany ny teny Rosiana, Kyrgyz ary Anglisy. Tovovavy Kyrgyz any ambanivohitra no mpilalao fototra ao amin'ilay lahatsary, izay, na dia eo aza ny raharaha rehetra ao an-trano asaina ataon'ny vehivavy ara-nentin-drazana, dia mbola mahita herim-po sy angovo hianatra hockey an-dranomandry ary miditra ao amin'ny ekipam-behivavy hockey an-dranomandry tokana [7] ao Kyrgyzstan. Vehivavy maromaro no nandray anjara tamin'ny famokarana ilay lahatsary, izay notarihin'i Manizha tenany, anisan'izany i Aya Ibraeva, Kyrgyz mpamokatra sarimihetsika amin'ny maha talen'ny filma sady mpiara-manatontosa azy.
Manoritsoritra amin'ny antsipiriany ny fiainana andavanandro any amin'ny faritra be tendrombohitra ny lahatsary, sy ny fepetra fototra hiofanana ary ny fahatapahan-kevitry ny ekipa hilalao.
Sehatra iray ao amin'ny hira “Now or Never ” mampiseho ny zavamisy iainan'ny vehivavy Kyrgyz tantsaha isan'andro, Pikantsary avy amin'ny Manizha's YouTube channel [1].
Araka ny namehezan'ilay mpilalao fototra azy, nanome hery azy io zava-niainany io hianarany coding, asa mbola anjakazakan'ny lehilahy manerana izao tontolo izao, sy ho fomba hizakàny ny tenany sy ny fianakaviany. Saingy araka ny namaranany azy ao amin'ilay hira hoe: “Nanova ny fiainako mandrakizay ny Hockey, hita fa lehibe noho ny vohitra misy ahy izao tontolo izao.”
Ary raha tsy miteny na inona na inona amin'ny fifandonana farany teo amin'ny Tajiks sy Kyrgyz i Manizha, dia tonga tanatin'ny fotoana mety indrindra ilay hira mitondra hafatry ny firaisankina sy ny fahasahiranana. Jereo eto [8] ny lisitra Global Voices ahitana ny hiran'ilay feminista malaza indrindra antsoina hoe Manizha: