Nahoana no mbola ambany be ny fanamelohana ireo mpanolana ao Nizeria

Tovovavy Nizeriana iray milanja sora-baventy nandritra ny fihetsiketsehana fanentanana nataon'ny Lead Footprints Africa momba ny fanolanana. Sary Wikimedia avy amin'i Iamvirtuousven, 25 Febroary 2021, (CC BY-SA 4.0)

Manjary loza tsy voavaha ny raharaha fanolanana any Nizeria. Manampy trotraka ny tsy fandriampahalemana ho an’ny olom-pireneny, indrindra ho an'ny vehivavy sy ny ankizy ny fahavitsian’ny taham-panamelohana amin’ireo raharaha ireo.

Milaza i Evans Ufeli, mpisolovava momba ny zon'olombelona fa valo ambin'ny folo monja ny fanamelohana fanolanana voarakitra ara-dalàna ao Nizeria, raha mbola mipetraka eny amin'ny fitsarana, miandry ny fitsarana an-taonany maro kosa ny hafa. Matetika ireo lasibatra amin'ny fanolanana ireo no miafara amin'ny fahoriana ara-pihetseham-po sy ara-batana vokatry ny zavatra niainany, izay misy akony eo amin'ny fomba fijeriny ny fiainana, ny fiaraha-monina, ny lehilahy, ny vehivavy, ny havany anisan'izany ny vady sy ny maro hafa.

Anton'ny fahavitsian'ny taham-panamelohana

Samuel Agweh, Mpisolovava zokiolona ao Nizeria (mitovy toerana amin'ny mpanolo-tsain'ny mpanjakavavy any Royaume-Uni) nanome ireo antony sasany amin'ny tsy fahampian'ny fanamelohana ireo mpanolana ao Nizeria. Nandritra ny resadresaka nifanaovana tamin'ny Global Voices, nanantitrantitra i Agweh fa, “tambazan'ny ankamaroan'ireo meloka vola ireo niharam-boina na ny fianakaviana mba hampitsaharana ny fiampangana azy ireo.” Nambaran’ity mpisolovava ity fa noho ny kolikoly dia tsy mety mijoro vavolombelona ny fianakaviana. Indraindray mbola te hanao izany (hitory) ny olona tafavoaka velona, saingy avy hatrany dia nosakanan’ny fianakavian’izy ireo tsy hiakatra fitsarana.

Sakantsakana iray hafa mety ho hita ny resaka fanilikilihana sy henatra izay iharan’ireo lasibatra. Tsy takona afenina fa sarotra ny mivoaka ho hitan'ny besinimaro amin’ny maha lasibatry ny fanolanana, saingy mavesatra kokoa ny fanilikilihana izay apetrany amin’ny tafavoaka velona. Izany ihany koa no antony mety hisian'ny fahaketrahana amin'ireo tafavoaka velona ireo. Tsy mora amin’ny fiarahamonina ihany koa ny mivoaka miresaka tranga tahaka izao satria hita ho “mahamenatra” ho an’ny vehivavy na lahy ny mitondra izany sata voaolana izany, indrindra ho an’ny vehivavy.

Misy olona tafavoaka velona mandà tsy hitory raha olona ao amin'ny fianakaviana ilay mpanararaotra ary mety tsy te handratra ny anaram-pianakaviana. Mankamamy ny hasarobidin’ny fianakaviana indrindra ny fiarahamonina any Nizeria, ka ho menatra ny mpianakavy voampanga ho nanolana ny fianakaviany ihany. Noho izany dia mora kokoa ny manilika ny olana, hoy i Agweh, mpisolovava zokiolona ao Nizeria, nanazava bebe kokoa.

Ny tsy fahavononan'ireo lasibatra hitatitra ny raharaha noho ny tsy fahampian'ny finoana ny rafitra ara-pitsarana Nizeriana no antony iray hafa mahatonga ny taha ambany amin'ny fanamelohana ny fanolanana. Tsy mino ireo lasibatra fa afaka manampy azy ireo ny rafitra ara-pitsarana indrindra fa efa an-taonany maro no nijoroan’ny rafi-pitsarana, saingy tranga fanolanana valo ambin’ny folo monja no notsaraina hatramin’izay. Tsy mamporisika na iza na iza hitondra ny raharahany any amin'ny fitsarana izany. Fanampin'izany, matetika manome tsiny ilay niharam-boina ireo vondrom-piarahamonina ao Nizeria, matetika mitady ny banga amin'ny tantara.

Fanolanana ara-panambadiana sy fanolanan'ny lehilahy

Araka ny rakibolana Britannica, izay firaisana ara-nofo atao amin-kery aorian'ny fandavana na tsy faneken'ny olon-kafa dia fantatra sy voarakitra ho fanolanana. Raha toa ka tsy manaiky hanao firaisana amin'ny olon-tiany ny vadiny, dia ara-dalàna ho fanolanana izany.

Ny Fizarana 1(1) ao amin'ny Lalàna Fandraràna ny Herisetra Amin'ny Olona (VAPPA) 2015 ao Nizeria dia mamaritra ny fanolanana ho fampidirana amin'ny “fivaviana, lava-body, na vavan'olona hafa sy amin'ny faritra hafa amin'ny vatany na zavatra hafa. ”Manazava bebe kokoa ny VAPPA fa mitranga ny fanolanana isaky ny misy “fahazoana fanekena amin’ny alalan’ny hery na fomba fandrahonana na fampitahorana amin’ny karazany rehetra na amin’ny tahotra ny hanisy ratsy na amin’ny alalan’ny fanehoana diso sy hosoka momba ny toetry ny hetsika na ny fampiasana izay zavatra na fanampiny hafa afaka manala ny sitrapon'ny olona toy izany na amin'ny olona manambady amin'ny alalan'ny fisandohana ny vadiny.” Faritan'ny lalàna ny sazy an-tranomaizina 14 taona fara-fahakeliny ho an'ny zaza tsy ampy taona, 12 taona an-tranomaizina farafahakeliny ho an'ny olon-dehibe, tsy misy safidy fandoavana onitra, ary 20 taona fara-fahakeliny an-tranomaizina tsy misy safidy onitra noho ny fanolanana tambabe.

Mbola tsy ampy fankatoavan'ny besinimaro ny fametrahana ny fanolanana anaty fanambadiana ho “fanolanana” eo amin'ny fiarahamonina Nizeriana. Na izany aza, nanambara ny fanadihadiana nataon’ny mpikaroka momba ny fahasalamam-bahoaka Nizeriana, Ogunwale sy ny hafa fa matetika ny vehivavy manambady no niharan’ny fanolanana teo am-pelatanan’ny vadiny. Toy izany koa, ny fikarohana nataon’i Mary Esere sy ireo mpanolotsaina mpitari-dalana telo hafa ao amin’ny Oniversiten’i Ilorin any Nizeria, dia nampiseho fa matetika vokatry ny “fifandraisana ara-pahefana tsy mitovy; ny fiankinan-doha amin’ny alikaola sy ny zava-mahadomelina ary ny fialonana” avy amin’ny vady ny fanolanana anaty fanambadiana.

Ny raharaha fanolanana lehilahy dia zara raha miseho vaovao ao Nizeria noho ny fanilikilihana ara-kolontsaina sy ny fady mifandray amin'izany. Na izany aza, maro ireo tranganà fanolanana tovolahy lasibatra ao amin'ny firenena. “Naolan'ny lehilahy na vehivavy namany” ireo lehilahy ireo, hoy i Odimegwu Onwumere, mpanao gazety Nizeriana. Grace Obike, mpanao gazety ao amin'ny International Center of Investigative Journalism (ICIJ), gazety an-jotra, kosa milaza fa “matetika” ny fisian'ny fanolanana ankizilahy ary mitohy noho ny tsy fahombiazana amin'ny “fanenjehana ireo mpanao heloka bevava.”

Raha nitafatafa tamin'ny olona lasibatry ny fanolanana ny mpiara-miasa tamiko iray, izay nanana tantara mitovy amin'ilay tranga voalaza etsy ambony, dia nilaza izy fa ny antony tsy nahazoan'ny raharahany ny rariny araka izay ilainy dia ny noho ny nilazan'ny mpampanoa lalàna misahana ilay raharaha fa “ tsy azo aolana mihitsy ny ankizilahy.” Mihevitra ny rafitra ara-pitsarana fa tsy azo atao ny manolana lehilahy any Nizeria. Noho izany, tsy maintsy miatrika mangingina ny ratram-pony ny lehilahy Nizeriana satria tsy mila marika na lazaina ho kanosa izy ireo.

Na izany aza, nisy ny fandresena sasany. Tamin'ny 14 Jolay, nahazo sazy an-tranomaizina 16 taona ilay mpilalao Nollywood ao Nizeria, Baba Ijesha (teraka amin'ny anarana hoe Olarenwaju James) taorian'ny nanamelohan'ny fitsarana Lagos azy, noho ny fametavetana tovovavy 16 taona. Fanampin'izay, vao haingana ny Fanjakan'i Kaduna any avaratra andrefan'i Nizeria no nankatoa lalàna vaovao misy sazy henjana — vosirina ireo lehilahy voaheloka noho ny fanolanana, raha hovonoina ho faty kosa ireo mpanolana ankizy. Tsy very ny fanantenana rehetra, araka ny filazan'ny mpisolovava Agweh, izay nizara — niaraka tamin'ny fampahafantarana feno ny mpanjifany — fa nahazo raharaha “fiampangana fanolanana” ny orinasa mpanao lalàna izay iasany vao haingana .

Atombohy ny resaka

Mpanoratra, azafady hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.