Kerry Kennedy, Maximilienne Mbe ary Felix Nkongho nandritra ny Fanomezana Loka Zon'olombelona RFK tamin'ny 9 jona 2022 tao amin'ny Efitrano Fivoriambe Kennedy, (Lapan'ny) Loholon'i Etazonia ao Washington, D.C.

Nomem-boninahitra androany 9 Jona ny Kameroney roa mpiaro ny zon'olombelona, Maximilienne C. Ngo Mbe sy Felix Agbor Nkongho (Balla), raha nahazo ny mari-pankasitrahana Robert F. Kennedy (RFK) momba ny zon'olombelona taona 2022 nandritra ny lanonana natao tao amin'ny efitrano fivoriambe Kennedy tao amin'ny Lapan'ny Loholon'i Etazonia any Washington, D.C. Nampiaiky volana tamin'ny ezaka nataony hiadiana amin'ny fanitsakitsahana ny zon'olombelona sy ny fiarovana ny sehatra sivily sy ny demaokrasia manerana an'i Kamerona sy Afrika Afovoany i Mbe sy Nkongho.

Omena ny olona na vondrona maharitra amin'ny fiarovana ny zon'olombelona izay “mety iharan'ny voina goavana manokana ny tena” ny lokan'ny zon'olombelona Robert F. Kennedy sady mampiasa fomba “tsy misy herisetra”. Ireo Kameroney mpandresy tamin'ity taona ity izany no manatevin-daharana ireo mpikatroka sy vondrona miavaka maherin'ny 55 nomem-boninahitra nandritra ny 38 taona nisian'ny loka.

“Natsangana ny Lokan'ny Zon'olombelona RFK  mba hanomezam-boninahitra sy hanohanana ireo izay miaina araka ny finoan'ny raiko—fa ny herin'ny herim-po ara-maoralin'ny tsirairay sy iraisana dia afaka mandresy ny tsy rariny,” hoy i Kerry Kennedy, filohan'ny Fikambanana Zon'Olombelona Robert F. Kennedy, tao amin'ny fanambarana an-gazety iray nozaraina manokana ho an'ny Global Voices. Fanehoana velona izany fomba fisainana izany i Maximilienne sy i Felix. Mampisy aingam-panahy tokoa ny fanoloran-tenan'izy ireo amin'ny fampiroboroboana ny zon'olombelona sy ny fikirizana manoloana ny loza mety aterak'izany ho an'ny tena manokana, ary manantena ny hiara-hiasa amin'izy ireo izahay. “

Ireo nahazo loka

Maximilienne C. Ngo Mbe. Sary avy amin'ny RFK Human Rights, nahazoana alalana.

Maximilienne C. Ngo Mbe dia Kameroney mpiaro ny zon'olombelona manana traikefa 30 taona mahery, ary mpitarika ny Central African Human Rights Defenders Network (REDHAC). Nanomboka tamin'ny 2010 izy nitarika ny ezaky ny REDHAC hampiroborobo ny sehatra sivily sy ny fahalalahana fototra manerana an'i Afrika Afovoany tamin'ny alalan'ny famotopotorana ny fanitsakitsahana ny zon'olombelona, ny fanandrata-teny eo anatrehan'ireo vondron'olona mpiaro ny zon'olombelona, ny fanaraha-maso ny fizotran'ny demaokrasia, ary ny fitakiana ny tamberin'andraikitry ny fanjakana. Mampiditra ny teny filamatry ny Zon'olombelona Robert F. Kennedy hilaza ny marina amin'ny tompom-pahefana ny fikirizan'i Maximilienne manoloana ny fandrahonana sy ny valifaty tsy tapaka mahazo azy sy ny fanoloran-tenany amin'ny fampandrosoana ny zon'olombelona.

Felix Agbor Nkongho (Balla). Sary avy amin'ny RFK Human Rights, nahazoana alalana.

Felix Agbor Nkongho (Balla) dia Kameroney mpisolovava  sady mpiaro ny zon'olombelona. Talen'ny Foiben'ny Zon'Olombelona sy ny Demaokrasia aty Afrika (CHRDA) izy ary mpitarika amin'ny fiarovana ny zon'ireo Kameroney ao amin'ny faritra mpiteny anglisy iharan'ny ady. Ny asan'i Felix dia mifantoka amin'ny fampiroboroboana ny demaokrasia, ny fitondrana tsara tantana, ny fidirana mankany amin'ny rariny ary ny fanjakana tan-dalàna. Porofoin'ny asany tsy mitandro hasasarana ho an'ny zon'olombelona ao Kamerona sy manerana an'i Afrika ny lazan'i Felix amin'ny maha-mpiaro ny zon'olombelona azy na dia teo aza ny fanasazian'ny fanjakana nihatra taminy, anisan'izany ny fitazonana azy tsy ara-dalàna tamin'ny taona 2017.

“Rehefa nahazo ny vaovaon'ilay loka aho, dia nibanjina ny sarin’ireo ray aman-dreniko efa maty ary nandrotsaka ranomasom-pifaliana. Ity no fanomezana tsara indrindra azoko atolotra azy ireo, ary azoko antoka fa hankalaza ry zareo any an-danitra,” hoy i Nkongho.

Ny fanomezan-doka androany no akon'ilay “Ripples of Hope Speech” [Topatopan-Kabarim-Panantenana] nataon’ny Filoha John F. Kennedy tamin'ny 6 Jona 1960 tao amin’ny Oniversiten’i Le Cap any Afrika Atsimo: “Isaky ny mijoro ho amin’ny idealy ny lehilahy iray, na manao zavatra hanatsara ny fiainan’ny hafa, na mamely totohondry ny tsy rariny, dia mandefa topatopam-panantenana kely, ary miampitampita amin’ireo ivon'angovo an-tapitrisany maro hafa sy mihaika ireo topatopa ireo hanangana riandrano afaka mipaoka ny manda mahery indrindra amin’ny famoretana sy ny fifaharana.”

Samy naneho ny vaikan'ny herim-pony tsirairay avy manoloana ireo hery mifofotra na mandrava na manalemy ny fireneny na i Maximilienne Mbe na i Felix Nkongho.