Japàna miatrika ny olan'ny “Mega Solar”

Japan FIT solar installation Awara

Fotodrafitrasa fakàna angovo amin'ny masoandro ao Awara, prefektioran'i Fukui. Saripika an'i  Nevin Thompson. Lisansa: CC-BY-3.0

Anatin'ny hazakazaka ho fampidinana ny fiparitahan'ny entona diôksida karbôna (C02) sy hialàna amin'ny sariny ratsy hoe miankin-doha betsaka amin'ny solika azo avy amin-javatra lò, tato anatin'ny taona maromaro farany i Japàna dia nampiroborobo ny angovo azo amin'ny masoandro. Kanefa mazàna ireo “toerana goavambe fakàna angovo amin'ny masoandro” napetraka eny amin'ny tehezan-tendrombohitra sy any amin'ireo faritra ambanivohitra manerana ny firenena no miteraka sary ratsy ho an'ireo tetikasa tena ilaina momba ny angovo azo havaozina. (Fanamarihana avy amin'ny mpandika: ho ampiasaintsika ato anatin'ny lahatsoratra ny hoe Mega Solar ho entina manondro ireo fotodrafitrasa fakàna angovo amin'ny masoandro ao Japàna)

Araka ny tombantombana iray, misy eo amin'ny 6.000 eo ireo fotodrafitrasa Mega Solar miasa manerana an'i Japàna. Ny Mega Solar dia fotodrafitrasa mamokatra mihoatra ny 1.000 kilowatts (1 megawatt) isantaona — ampy hamatsiana tokantrano 400 hatramin'ny 900.

Nitombo isa be ireny Mega Solar ireny hatramin'ny nampidiran'ny governemanta ny fandaharanasa Feed-in-Tariff (FIT) (fividianan'ny fanjakana ny ambimbava amin'ny angovo) mba hampiroboroboana ny fampiasambola amin'ny angovo azo havaozina, tamin'ny 2012. Tohizan'ny pôlitika vao haingana naroson'ny governemanta ny fanomezana tontolo iray mandrisika ny fampiasàna Mega Solar ao Japàna.

Tamin'ny 2020, ny praiminisitra tamin'izany fotoana izany, Suga Yoshihide, dia  nampanantena fa hanao an'i Japàna ho tsy misy entona karbôna amin'ny 2050. Tamin'izay taona izay ihany, Koizumi Shinjirō, minisitry ny tontolo iainana tamin'izany, dia tena babon'ny mega solar ka nandroso hevitra ny hanitsiana ny lalàna mba hamelàna ireo toerana fakàna angovo amin'ny masoandro ho afaka aorina any anatin'ireo valanjavaboahary nasiônaly arovana.

Ohatra iray amin'ny halehiben'ireny fotodrafitrasan'angovo avy amin'ny masoandro ireny — ary ny halehiben'ny olana mety haterany — no afaka hita ao amin'ny prefektioran'i Okayama ao Japàna, toerana misy ny iray amin'ireo fotodrafitrasa mega solar goavana indrindra misy takelaka fakàna angovo miisa 900.000 ao anaty velarana 260 hektara, manome 230.000 kilowatts isantaona.

Marobe ireo mponina sasany mipetraka eny akaikiny no milaza hoe manimba ny tontolo iainana sy zara raha mitondra tombony ho an'ireo vondrompiarahamonina manodidina azy ireny “toerana goavambe fakàna angovo amin'ny masoandro” ireny. Mahavelon'ahiahy manokana ireo fihotsahan'ny tany aterak'ireo fananganana mega solar eny amin'ny tehezan-tendrombohitra.

Japanese mega solar farm

Takelaka fakàna angovon'ny masoandro mandrakotra ny tehezan-tendrombohitr'i Gifu, prefektioran'i Gifu. Ny toerana fakàna angovo masoandro tahaka ity ary ireo mega solar mbola lehibe kokoa aza, no mampanahy ireo mponina marobe momba ny loza ateraky ny fihotsahan'ny tany. Saripika an'i Magari Hiroyuki, 2017. Nahazoana alàlana.

Tanisain'ireo mpanohitra ihany koa ho antony anoheran-dry zareo ny mega solar ny loza entin'ireo takelaka fakàna masoandro raha sanatria tsofin'ny rivo-mahery, sy ny mety ho fanimbana ateraky ny sahan’araka anjanandrianaratra (electromagnetic fields) alefan'ny famokarana angovo avy amin'ny masoandro, ary hatramin'ny tselatra mahery vaika averin'ireo takelaka fakàna masoandro.

Toa hita ho mihamafy ny fanoheran'ny olona ka hitan'ny fanadihadiana iray tamin'ny 2021 nataon'ny Mainichi Shimbun fa 80 isanjato amin'ireo prefektiora 47 ao Japàna no manana olana amin'ireo mega solar famokarana angovo amin'ny masoandro.

Ny ampahany misy ny olana dia ny rafitra FIT ao Japàna. Anatin'ny fenitr'ilay fandaharanasa, misy fifanarahana maharitra ifanaovan'ny governemanta japôney amin'ireo mpamokatra angovo azo havaozina. Na izany aza, marobe ireo mpandraharaha sy mpampiasa vola, izay mampiasa vola amin'ny fividianana sy famarotana ireo fifanarahana FIT, no tsy mihevitra azy io afa-tsy toy ny fotoana fanararaotra hanangonana vola. Tena mampidi-bola be ilay indostria ka misy ireo goavan'ny fampiasambola toa an'i Goldman Sachs no namorona tsena fanakalozam-bola mba hivarotana ireo tetikasa japôney momba ny angovo azo amin'ny masoandro.

Ny fandraisan'ireo mpampiasa vola sy ireo orinasa goavana anjara dia midika fa tsy ao anaty lisitra ny ankamaroan'ireo tetikasa angovo alaina amin'ny masoandro ary vatsiana vola eo an-toerana: 32 isanjato amin'ireo fifanarahana FIT rehetra dia lasan'ireo orinasa mega solar avokoa, ary manakaiky ny 78 isanjato amin'ireny orinasa ireny dia vahiny no mpamatsy vola na renivola avy any ivelany.

Ankoatra izay, ny sandan'ny famatsiambola ny rafitra FIT dia mivantana any amin'ireo mpandoa hetra amin'ny endrika lazambidy midangana be. Vokany, teo anelanelan'ny 2011 sy 2014, nitombo 37 isanjato ny vidin'ny herinaratra ao Japàna.

Fanampin'izay, ny ampahany be amin'ireo angovo otazana avy amin'ireo toerana misy mega solar no tsy ampiasaina eo an-toerana, fa any amin'ireo tanàndehibe lavitra izy ireny no jifaina. Vokany, betsaka ireo vondrompiarahamonina no mitsipaka ireo tetikasa mega solar.

Ireo mponina ao amin'ilay tanàna kelin'i Heguri, prefektioran'i Nara, dia tsy ela akory izay no namorona vondrona fanoherana sy nanomboka nanao fitoriana eny amin'ny fitsaràna mba hampiatoana orinasa mega solar iray manana habe 48 hektara, 50.000 takelaka izay noeritreretina haorina ao anatn'ny vondrompiarahamonina misy azy ireo. Mampiahiahy manokana azy ireo ny fihotsahan'ny tany, ny fahasimban'ny tontolo iainana ary ireo 22.000 volts ateraky ny onjan'anjanandrianaratra voalahatra handalo mivantana ao ambanin'ny tanànan-dry zareo.

Ny sasany naka ny media sôsialy mba hanehoany ny hasosorany. Kaonty Twitter iray, Mpianatry ny Heguri Middle School Manohitra Ireo Tetikasa Mega Solar, nilaza hoe :

Voalaza ao anatin'ity lahatsoratra ity [rohy ao anatin'ilay bitsika] fa ny olona iray dia mety ho tratry ny herinaratra tsotra izao raha mandalo latsaky ny roa metatra miala amin'ireo tariby mitondra herinaratra faran'izay ambony dia ambony. Saingy ireo fatsoralahy mpiasampanjakana sy ireo mpanorina dia handevina tariby anaty 1 metatra amin'ny làlana iray izay falehan'ny ankizy hamonjy sekoly.

Mandritra izany, ao amin'ilay toerana falehan'ireo mpankafy fihanihana tendrombohitra ao Yamap, mpampiasa iray, Yugo, no nandrakitra sy naneho hevitra momba ny fahapotehana sy ny fandripahana ala izay efa nitranga sahady nateraky ny fananganana tetikasa.

Erosion of a hillside caused by solar fit installation

Saripika iray avy amin'i Yuogo, mpampiasa Yamap. “Mety ho lemaka nisy tanimbary ity toerana ity,” hoy i Yugo naneho hevitra taorian'ny fitsidihana nataony tao amin'ilay faritra tamin'ny 18 Jolay 2021. Sary an'i Yugo. Nahazoana alàlana

Eo amin'ny 1.000 eo ireo mponina naneho ny fanoheran-dry zareo teo anoloan'ny fitsaràna tao amin'ny distrika ao an-toerana, tamin'ny fanangonana sonia mihoatra ny 9.000 ho fanohanana ny fisintonana ilay tetikasa. Ho setriny, tamin'ny Jona 2021, ny governemantan'ny prefektioran'i Nara dia nandidy ilay tetikasa mba hitsahatra. Nahita olana tao anatin'ny fangatahana niaingàna tamin'ny 2019 nataon'ilay mpanorina ihany koa ny governemanta tao an-toerana ary nahatsikaritra fa tsy vitan'ilay tetikasa ny nametraka fepetram-piantohana araka ny tokony ho izy.

Ankehitriny, any an-kibon'ny omby araka izany ny hoavin'ilay tetikasa. Tsy misy asa fanorenana nanomboka, fa dia mijanona ho ngazana ny faritra iray midadasika amin'ny tehezan-tendrombohitr'i Heguri, ary ahian'ireo mponina ny mety hisian'ny fihotsahan'ny tany — sy ny momba izay mbola ho avy manaraka eo.

Tada Keiichi, mponina ao Heguri, nilaza fa tany am-boalohany dia tsara ny fijeriny ny angovo alaina amin'ny masoandro sy ny antsoina hoe “angovo madio,” fa taorian'ny nahafantarany momba ireo antsipirihany amin'ilay tetikasa tao anatin'ny vondrompiarahamoniny, niova ny fisainany. Tsy manaja zavaboahary no sady tsy madio “ny fanimbàna ny tontolo iainana sarobidy ary ny fandrahonana ny ain'ireo mponina,” hoy i Tada tamin'ny Mainichi Shimbun tamin'ny Septambra 2021.

Tsy misy hafa amin'izay, rehefa niresaka tamin'nyAsahi Shimbun momba ny olan'ny mega solar ao Japàna, Profesora Hata Yoshio, mpampianatra ao amin'ny Oniversiten'ny Siansa ao ​​Okayama naneho hevitra hoe, “Raha toa ny angovo azo havaozina no hanimba azy, izay heverina fa hiaro ny tontolo ianana,  raha ny marina, dia fametrahana ny sarety ho alohan'ny omby izany.”

Ampahany tena ilana amin'ny ady hiatrehana ny fiovan'ny toetrandro ireo loharanon'angovo azo havaozina, saingy ny fomba firoson'i Japàna amin'ny fampiasana ireo tetikasa mega solar dia mitondra vokatra mifanohitra amin'izany, amin'ny fanimbàna ny fomba fijerin'ny olona momba izay mety ho azo avy aminy.

Atombohy ny resaka

Mpanoratra, azafady Hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.