- Global Voices teny Malagasy - https://mg.globalvoices.org -

Bangkok sa Krung Thep Maha Nakhon: Iza no tena anaran'ny renivohitr'i Thailandy?

· Mpanoratra Mong Palatino Nandika Sylvia Aimée

Sokajy: Azia Atsinanana, Thailandy, Mediam-bahoaka, Tantara, Tsidika
Bangkok road sign [1]

Takelaby fanoroan-dàlana ao Thailandy mankany Bangkok. Saripika an'ny [1] First Tanapot. Loharano: Wikipedia. (CC BY-SA 4.0) [2]

Iza no iantsoana ny renivohitr'i Thailandy: Bangkok sa Krung Thep Maha Nakhon? Araka ny loharano ôfisilay dia samy marina daholo izy roa.

Tamin'ny Febroary 2022, ny Akademiam-Panjaka Thai dia nanosoka hevitra [3]ny amin'ny tokony hampiasàna ny anarana nentindrazan'ilay tanàna, Krung Thep Maha Nakhon (Ilay Tanàna Lehiben'ireo Anjely), ary tokony hampahafantarin'ny governemanta amin'ny fomba ôfisialy. Avy hatrany ilay tolokevitra dia nankatoavin'ny [4] Kabinetra ary nalefa tany amin'ny Ministeran'ny Raharaha Ivelany mba hodinihana.

Fa niteraka ihany koa adihevitra nafàna teny anaty tambajotra sôsialy ilay tolokevitra, satria ireo mpisera dia nizara ny fomba fijerin-dry zareo sy ny ahiahiny momba ny fiantraikan'ny fanekena ilay anarana Krung Thep Maha Nakhon fa tsy ny hoe Bangkok, izay efa fantatra be manerana izao tontolo izao.

Ity bitsika nalefan'ilay mpikaroka Phacharaphorn (Phacha) Phanomvan ity dia tena ilaina hahatakarana ny tantaran'ny renivohitr'i Thailandy sy ny fototra avy amin'ny fanjanahantany nahatonga an'i Bangkok ho lasa anarana ôfisialin'ilay tanàna voalohany ao amin'ny firenena.

Faly mahita ny Bangkok hovàna ho Krung Thep Maha Nakhon amin'ny anglisy. Raha ny hevitro dia fanovàna lasitra fanjanahantany efa taraiky io. Tsy misy mihitsy Thai na iray aza hiantso an'ilay tanàna ho Bangkok. Ara-bakiteny ny hoe Bangkok dia distrika roa ao Thonburi izay toerana nipetrahan'ireo fandraharahàn'ny vahiny tamin'ny taonjato faha-17 sy 18.

— Phacha Phanomvan (@phacharaphornp) 16 Febroary 2022 [5]

Bitsika iray hafa avy amin'i Richard Barrow, bilaogera mpiresaka fandehandehanana, no manazava fa ireo vahiny irery ihany no mampiasa ny anarana hoe Bangkok—ireo mponina dia niantso hatrany ny renivohitr'izy ireo hoe Krung Thep Maha Nakhon.

Betsaka ny adihevitra ao amin'ny meida sôsialy Thai momba ilay tolokevitra hanovàna ny anarana amin'ny teny anglisin'ny renivohitr'i Thailandy tsy ho Bangkok fa ho Krung Thep Maha Nakhon. Saingy nanazava ny mpitondratenin'ny governemanta fa samy azo ampiasaina ho amin'ny teny anglisy avokoa ireo anarana. #Bangkok [6] #KrungThepMahaNakhon [7] #Thailand [8] pic.twitter.com/khyCYMCWP4 [9]

— Richard Barrow in Thailand (@RichardBarrow) 15 Febroary 2022 [10]

Nambaran'ireo manampahefana ihany koa fa hotohizana ao amin'ny firenena ny fampiasana ny anarana Bangkok.

Pravit Rojanaphruk, mpanao gazety mitatitra ho an'ny Khaosod English, no namintina [11] ireo fanehoankevitry ny mpomba sy ny mpanohitra ilay tolokevitra hanovàna ny anaran'ny renivohitra. Indro ny tohankevitr'ireo manohana ilay tolokevitra avy amin'ny Akademiam-Panjaka Thai:

Efa ho taonjato roa teo ho eo, navelantsika ireo tandrefana hanondro ilay tanàna renivohitra goavantsika ho Bangkok, izay zara raha vohitra kely nisy oliva raha ny voalazan'ny tantara. Ny hoe Bangkok no anarana tranainin'ilay toerana talohan'ny nahalasa azy ho renivohitr'i Siam sy avy eo Thailandy…..

Ary ity ny fanehoankevitr'ireo tsy mankasitraka azy io:

Nila taonjato roa ny nanorenana ny marika mahasarika hoe Bangkok, izay feno tantara sy fombandrazana mifamatotra aminy amin'ny alàlan'ny literatiora, sarimihetsika, mozika, ary ny nofinofy malaza, ka nahoana no ho ariana ao amin'ny Renirano Chao Phraya ilay anarana?

Heveriko fa tokony hianatra hametraka laharam-pahamehana ireo olona eo amin'ny fitondràna. Raha misy zavatra tsy vaky, inona no tokony hanamboarana azy, na hanovàna azy?

Tao amin'ny Twitter, ny sasany nampahatsiahy [12] ny governemanta fa ny fitsaboana ireo fotodrafitrasa ao an-drenivohitra no tena maika kokoa noho izay fanovàna anarana, satria Bangkok dia ianjadian'ny tondradrano henjana foana. Iray hafa mpampiasa Twitter no nanaitra [13] ireo manampahefana mba hanisaka ny fifantohan'izy ireo [14] ho amin'ny fiatrehana ny fahasahiranana ara-toekarena iainan'ny olompirenena, fa tsy izany.

Tao anaty matoandahatsoratra iray, ny Bangkok Post dia nanipika [15] fa afaka nosorohana ny fifanjevoana sy ny hatezeran'ny olona vokatr'ilay tolokevitra raha toa ny governemanta ka mba naka mialoha ny hevitry ny vahoaka:

Mila takatr'ireo manampahefana fa izany hoe renivohitra izany dia tsy mijanona ho amin'ny teny sy fanoratra fotsiny. Anarana nosintonina avy amin'ny zavanisy izay neken'ny vahoaka ary toerana ipetrahany sy nanapahany hevitra ny hiantso azy tahaka izany. Raha manapaka hevitra ny hanova izany ireo manampahefana, voalohany indrindra dia tokony naka ny hevitry ny vahoaka ry zareo ary nanontany talohan'ny nandraisana fanapahankevitra.

Rehefa dinihana ny zavatra rehetra, manana zo ireo Thailandey handray fanapahankevitra hiantso ny renivohitr'izy ireo hoe Bangkok na Krung Thep Maha Nakhon. Tsara marihana, ny anarana tena feno ara-pomba nisaloran'ilay renivohitra dia lavabe be kokoa: Krung Thep Mahanakhon Amon Rattanakosin Mahinthara Ayuthaya Mahadilok Phop Noppharat Ratchathani Burirom Udomratchaniwet Mahasathan Amon Phiman Awatan Sathit Sakkathattiya Witsanukam Prasit.

Ndeha hifaly: manana anarana ôfisialy vaovao i Bangkok! @prachatai_en [16] @PravitR [17] @RichardBarrow [18] @ThaiNewsReports [19] @ThaiVisaFra [20] @sanitsuda [21] #KrungThepMahaNakhon2022 [22] #Krungthepmahanakhon [23] pic.twitter.com/hsMe4RTrbc [24]
— stephff cartoonist (@stephffart) 20 Febroary 2022 [25]