Sarimihetsika mampiseho ny fanitsakitsahana zon'olombelona sy ny fanoherana am-pahasahiana ao Myanmar

Pikantsary iray avy amin'ny sarimihetsika “Burma Rebel Artist” (artista birmàna mpikomy): Moe Thandar Aung

Ity lisitra fijerena sarimihetsika ity dia avy amin'ny Cinemata, sehatra iray ho an'ireo sarimihetsika sôsialy sy momba ny tontolo iainana any Azia-Pasifika. Tetikasa iray an'ny EngageMedia, fikambanana tsy mikatsaka tombony ary mampiroborobo ny zo nomerika, ny teknôlôjia misokatra sy tsara antoka, ary ny horonantsary fanadihadiana olana sôsialy. Nokiraina izy ity ary averina avoaka etoana ho ampahany amin'ny fifanarahana fifampizaràna votoaty miaraka amin'ny Global Voices.

Ny Febroary 2022 no manamarika ny herintaona nakàn'ny tafika ny fitondràna tao Myanmar (Birmania) sy nanàla ny làlana nizoran'ny firenena tsy ho any amin'ny demaokrasia. Taona iray aty aoriana, mitohy manangoly ny vahoaka ireo fanitsakitsahana mibaribary ny zon'olombelona. Manoloana ny firongatr'ireo fandrahonana ny zo nomerikan-dry zareo, mila tohana ireo olona ao Myanmar mba hisintonana lakolosy manoloana ny fanitsakitsahana miharatsy be ny zon'olombelona ao amin'ny fireneny.

Nikarakara lisitra iray ny EngageMedia hilalaovana ireo sarimihetsika mampiseho ny haben'ny fanitsakitsahana zon'olombelona ao amin'ilay firenena, ary hatramin'ireo endrika feno fahasahiana enti-manohitra ny fanitsakitsahana tsy tapaka ny zo. Hanamarihana ny taona voalohany nisian'ny fanonganam-panjakàna, atodiky ny “Taona iray Fanoherana” ny fijery mba ho any amin'ilay tolona lavabe nataon'ny vahoakan'i Myanmar hananany demaokrasia.

Ity fantina sarimihetsika ity dia nokarakaraina ho fanehoana firaisankina amin'ireo vahoakan'i Myanmar. Amin'ny fitondrana ho hitan'ny be sy ny maro ny tantaran'ireo korontana sy habibiana, antenain'ireny sarimihetsika ireny ny ho lasa aingampanahy hihetsehana sy hanaovana adisisika ho an'ny rariny sy ny fahafahana.

“Artista Birmàna Mpihoko: Moe Thandar Aung”

Taorian'ilay fanonganam-panjakana nataon'ny tafika tao Myanmar tamin'ny Febroary 2021, nanomboka nanao hetsipanoherana ho fanohanana ireo fitakiana hiarovana sy hanohanana ny demaokrasia ao amin'ny fireneny i Moe Thandar Aung, mpanao tefiendrika, izay ny asakantony dia miresaka ireo lohahevitra momba ny ‘feminisma’.

Ankehitriny, ataon'ireo mpikatroka avy amin'ireo hetsika tsy mitsaha-mitombo miantso fandàvana faobe ao Myanmar ho amin'ny endrika vita printy sy marobe ny asan-dry zareo, ary zaraina bebe kokoa sy averina avoaka ho an'ny rehetra aza.

Ity lahatsary ity dia an'ilay mpamokatra sarimihetsika monina ao Myanmar, Stephen Minus (fantatra ihany koa amin'ny hoe Thet Oo Maung). Vao haingana izy no nitafa tao amina andiam-pandaharana Pretty Good Podcast momba izay zavatra niainany tamin'ny fanangonana antontan-kevitra momba ireo hetsipanoherana tao Myanmar taorian'ilay fanonganam-panjakana.

“Fahatapahana Tanteraka”

Ny ampitson'ilay fanonganam-panjakana tamin'ny 2021 tao Myanmar, niainan'ilay firenena ny faneren'ny fanjakana hanapahana tanteraka ny aterineto sy ny fampitambaovao. Hnin, reny mpitondratena, sy Mon, zanany vavy ary olona iray tsy mpankasitraka fanonganam-panjakana, no isan'ireo izay tsy afaka intsony niditra aterineto avy any an-trano. Tao anatin'ny ezak'izy ireo hitady vaovao momba izay mitranga eny an-kianja, ireo tantara namboamboarina ihany no mba hitan-dry zareo, ary ireo vaovao tsy azo ianteherana.

“Ampangain'ireo mpikatroka ao Myanmar ny fivarotana ny rakitra momba azy ireo amin'ny tafika”

Nandao ny firenena ny Telenor — mpandraharaha faharoa goavana indrindra amin'ny sehatry ny fifandraisandavitra tao Myanmar — rehefa avy nivarotra ny 100% -n'ny orinasa tamina vondrona mpandraharaha libaney iray. Nampiahiahy ireo mpikatroka io fihetsika io, sao vokatr'ilay famarotana dia mety ho tonga any an-tanan'ny tafika ny rakitra momba azy ireo. Araka izany, namorona fanangonantsonia an-tserasera ry zareo no sady nikarakara hetsipanoherana anaty tambajotra mba hampitsaharana io lazaina fa “famadihana” io.

“Anarana sy Endrik'ireo andro feno rà nandriaka tao Myanmar”

Nandritra ny enim-bolana nisian'ny fanonganam-panjakana, raha kely indrindra dia sivily 950 no novonoina an-kerisetra. 90 no fitambaran'ireo ankizy latsaky ny 18 taona no maty novonoina, ary raha kely indrindra dia 48 ny ankizy nosamborina.

“Onja”

Vehivavy iray mandeha amin'ny anaran'ny tenany, mpikatroka ho an'ny maha-olona, avy ao amin'ny fanjakan'ny Shan, no manoritsoritra ny ratram-po niainany fony niasa tao anaty tontolo iray feno famoizampo, ary koa ny fanolorantenany hanampy ireo voatery handositra ny fifandonana mitam-piadiana. Ity sarimihetsika ity dia teo ambany fitarihan'i Sai Naw Kham, Mon Mon Thet Khin, sy Soe Yu Maw.

“Zo Nomerika ao Myanmar” 

Ao anatin'ity lahatsary ity, resahan'ireo mpikatroka ao Myanmar ny momba ireo zo nomerika sy ireo fanamby momba ny fahalemana nomerika atrehan-dry zareo, tamin'ny filazàna fa ny fahalalahana maneho hevitra, ny fahalalahana hifamory, ary ny fahalalahana hiditra anaty fikambanana dia tokony hotahirizina, singa voaaro amin'ireo zo nomerika.

“Mifohaza Myanmar”

Tanora 24 avy amin'ny lafy enina samihafa ao Myanman no namokatra io hira io, izay nandray anjara tamin'ny tetikasam-piraisana ara-tsôsialy “Ny Feon'ny Tanora” naharitra herintaona, tao anatin'ilay atao hoe  Turning Tables Myanmar. Niarahan-dry zareo ny famokarana sy ny fandraisana feo an'ilay hira “Mifohaza” izay mitaky hisian'ny demaokrasia, ny fandraisan'ny tanora anjara ary ny fandrosoana maharitra ho solon'ny kolikoly sy ny tsy rariny.

“Mikatsaka Demaokrasia: Làlan'i Myanmar mankany amin'ny Fahalalahana”

Moanina birmana roa mandeha mankao Jakarta, Indônezia, herinandro vitsy taorian'ny rivodoza Nargys,  no asehon'ny “Mikatsaka Demaokraisa: Làlan'i Myanmar mankany amin'ny fahalalahana”, tao anatin'ny fotoana nisian'ny loza voajanahary nahatsiravina indrindra voarakitra tao Myanmar. Nandritra ny dian-dry zareo, nizara ny tantara avy ao Myanmar sy ny vahoaka ao aminy ry zareo, tojo indôneziàna mpanohana marobe teny amin'izay làlana nodiaviny.

Asehon'ity sarimihetsika tamin'ny 2009 ity ireo sary mavesatra avy amin'ny Revôlisiôna Saffron, andiana hetsipanoherana ara-toekarena sy politika notarihan'ireo mpianatra sy moanina bodista, ary nandrakotra an'i Myanmar ny Aogositra hatramin'ny Septambra 2007. Asongadin'io ihany koa ny filàna tsy tapaka ny firaisankina erantany eo amin'ireo avy ao Azia Atsimo-Atsinanana ao anatin'ny vanimpotoana mampisavoaravoara ny pôlitika, toy izay misy ankehitriny ao Myanmar.

Atombohy ny resaka

Mpanoratra, azafady hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.