Sary tao amin'ny HK Free Press. Nahazoana alalana.
Navoakan'ny Hong Kong Free Press tamin'ny 15 Febroary 2022 ity tatitra manaraka ity. Naverina navoaka ato amin'ny Global Voices izy tamin'ny alàlan'ny fifanarahana fiarahamiasa momba ny votoaty.
Toa voasakana ampahany ao Hong Kong ny tranonkalan'ny FTMF Hong Kong Watch noho ny tahotra firongatry ny sivana an'aterineto ao an-tanàna.
Nilatsaka ny fanakanana mibaribary ny tranokalan'ny ONG miorina any UK rehefa lasa tsy azo nidirana ireo tranonkala vitsivitsy manohana ny demaokrasia sy mifandray amin'i Taiwan. Na izany aza, mbola azo nidirana tamin'ny alàlan'ny VPN (Virtual Private Network) fitaovana fanodinana fitetezana ny tranokalan'ny Hong Kong Watch rehefa nandraman'ny HKFP tamin'ny Talata, ary mbola azo idirana any amin'ny mpamatsy tolotra aterineto sasany.
Nilaza i Benedict Rogers, Tale Jeneralin'ny Hong Kong Watch, tao anatin'ny fanambaràna iray fa ny ho avin'ny tanàna amin'ny maha ivon-toerana ara-bola azy dia miankina amin'ny fidirana hahazoam-baovao. “Raha tsy olana ara-teknika fotsiny izany, ary tsy ho afaka miditra amin'ny tranokalanay intsony ny mponin'i Hong Kong noho ny Lalànan'ny Fiarovam-pirenena, dia loza mitatao ho an'ny fahalalahan'ny aterineto izany,” hoy izy.
“Manoloana ny fitomboan'ny fanesorana tranonkala, misy ny tahotra sao hanomboka hampiditra ny Mandabe Aroafon'Aterineto ao an-tanàna i Shina. Rehefa mandeha ny fotoana dia mety hisy fiantraikany lehibe amin'ny fijoroan'ny orinasa teknolojia tandrefana ao an-tanàna izany. “
Reports are emerging that @hk_watch website can no longer be accessed through certain networks in Hong Kong.
We are hearing that the website cannot be accessed via PCCW, CMHK, HKBN and Navigator networks among others.https://t.co/WR24b4lVKJ
— Hong Kong Watch (@hk_watch) February 14, 2022
Mipoitra ny tatitra fa tsy azo idirana amin'ny alalan'ny tambajotra sasany ao Hong Kong intsony ny tranokala @hk_watch.
Renay fa tsy azo idirana amin'ny alalan'ny tambajotra PCCW, CMHK, HBN ary Navigator ny tranonkala.
Tamin'ny volana Mey lasa teo, nosakanana ny fidirana amin'ny tranokala manohitra ny fitondrana HKChronicles. Nanangona vaovao nandritra ny hetsi-panoherana naharitra volana maromaro tamin'ny taona 2019 ilay tranonkala ary niasa ho sehatra mpanao tondro molotra anjotra an'ny mpomba ny demaokrasia, manambara ny mombamomba ireo polisy sy ny mpanohana an'i Beijing. Nasongadiny tamin’izany ireo tranga voalaza fa herisetran’ny polisy.
Toa voasakana ihany koa ny tranokalan'ny Vaomieran'ny Fitsarana Tetezamita sy ny Charter HK 2021.
Nifandray tamin'ny PCCW, Smartone, HKBN, 3 Hong Kong ary China Mobile ny HKFP hihainoana ny hevitr'ireo.
Saripika: pika efijery HKChronicles. Nahazoana alalana
Tamin'ny volana Jona 2020, nampiditra mivantana ny lalàna momba ny fiarovam-pirenena tao amin'ny lalam-panorenana bitika an'i Hong Kong i Beijing — nanivaka mpanao lalàna ao an-toerana — taorian'ny fitroarana sy fihetsiketsehana mpomba ny demaokrasia naharitra herintaona. Nanameloka ny fikomiana, fisintahana, fifandraisan-tendro amin'ny hery vahiny sy ireo hetsika fampihorohoroana, izay nofaritana tamin'ny fomba midadasika mba hampidirana ny fanakorontanana ny fitaterana sy ireo fotodrafitrasa hafa.
Nahatonga ny polisy nanaisotra ireo hery vaovao, manaitra ireo demaokraty, vondrona fiarahamonim-pirenena sy ireo mpiara-miasa ara-barotra ilay fanapaha-kevitra, satria nampiasaina tamin'ny fomba midadasika mba hanampenam-bava sy hanasaziana ireo mpanohitra ao Shina ny lalàna toy izany. Na izany aza, milaza ny manam-pahefana fa namerina ny fitoniana sy ny filaminana tao an-tanàna izany..
Namaly ny fanontaniana tamin'ny fanehoan-kevitra, nilaza tamin'ny HKFP ny Sampan'ny polisy misahana ny Seraseram-bahoaka (PPRB) fa “tsy haneho hevitra amin'ireo tranga manokana ny polisy”.
Na izany aza, nanoratra ny PPRB fa, araka ny Andininy faha-43 ao amin'ny lalàna momba ny Fiarovam-pirenena, “mety hitaky amin'ireo mpamatsy tolotra ny polisy mba hanafoana fandefasan-kafatra elektronika amin'ny sehatra elektronika ny famoahana izay mety heverina fa fandikàn-dalàna manohintohina ny filaminam-pirenena na izay mety hiteraka fandikàn-dalàna manohintohina ny filaminam-pirenena.”
Sary: GovHK. Nahazoana alalana.
Lahatsoratra notsongain-ny GV Mpisolovava, tetikasa iray miaraka amin-ny Global Voices, miaro ny fahalalahana miteny sy miady amin-ny sivana antserasera ity. · Lahatsoratra rehetra
