Amin'ny 25-26 Novambra 2021, mpikambana efatra ao amin'ny vondrom-piarahamonina Global Voices no hizara ny tononkalony ôrizinaly amin'ny fiteny indizeny mandritra ny Tsenankevitra Akademika Iraisampirenena Faharoa “Fampandrosoana lovain-jafy amin'ny fitenny vazimba” izay hatao amin’ny fomba virtoaly sy atrehi-mivantana any Korea Atsimo. Tafiditra ao anatin'ny hetsika mitarika mankany amin'ny taompolon'ny fiteny vazimba iraisampirenena 2022-2032 ho avy io hetsika io.
Ireto avy ny poeta mandray anjara:
- Njeri Wangarĩ, tonian-dahatsoratra mpanampy ao amin'ny GV faritra Afrika Atsimon'i Sahara, izay hizara tononkalo amin'ny fiteny Gĩkũyũ ao Kenya.
- Alejandra Sasil Sánchez Chan, mpandrindra ny Fandaharanasan'ny Rising Voices Vatsy ho amin’ny Fikatrohana Fiteny Ankihy, izay hizara tononkalo amin'ny fiteny Maayat'aan (Yucatec Maya) any Meksika.
- Miguel Angel Oxlaj Cúmez, mpandray anjara amin'ny kaonty Twitter ifandimbiasam-piantranoana @ActLenguas [1] an'ny Rising Voices , izay hizara tononkalo amin'ny fiteny Maya Kaqchikel ao Goatemalà.
- Kọ́lá Túbọ̀sún, mpandray anjara amin'ny kaonty Twitter ifandimbiasam-piantranoana @DigiAfricanLang [2] an'ny Rising Voices , izay hizara tononkalo amin'ny fiteny Yorùbá avy any Nizeria.
Azonao atao ny manatrika ny hetsika an-tserasera eto [3] ary ho hita ao amin'ny YouTube aorian'ny fiafaran'ny fandaharana ny famelabelarana.
Ireto avy no hiara-hampiantrano ny hetsika: ny Birao Iraisan'ny Korea Atsimo sy Avaratra ho an'ny fanangonana ny Gyeoremal-Keunsajeon, Vaomieram-pirenena Koreana ho an'ny UNESCO, Delegasiona Maharitry ny Repoblikan’i Korea ho an'ny UNESCO, tohanan'ny Minisiteran'ny Fampiraisana sy ny Minisiteran'ny Raharaham-bahinin’ny Repoblikan'i Korea, ary iaraha-miasa amin’ny UNESCO.