Faly ny Global Voices manambara fa niampy mpikambana miavaka roa vaovao ny filankevi-pitantanana.
Nani Jansen Reventlow dia mpisolovava iraisampirenena feno ary manam-pahaizana manokana amin'ny zon'olombelona, tompon'andraikitra amin'ny fametrahana fenitra amin'ny raharaham-panehoan-kevitra manerana ny faritra nasionaly sy iraisam-pirenena maro. Izy no tale mpanorina ny Digital Freedom Fund, izay manohana ny mpiara-miasa any Eoropa hampandrosoana ny zo nomerika amin'ny alàlan'ny raharaham-pitsarana ara-stratejika. Mpampianatra lalàna ao amin'ny Sekoly fianarana Lalàna ao Columbia sady Profesora mpanampy ao amin'ny Sekolim-panjakana Blavatnik ao amin'ny Oniversite Oxford ihany koa i Nani.
Dr. Rasha Abdulla dia mpampianatra asa fanaovan-gazety sy ny fampitam-baovao ho an'ny daholobe ao amin'ny Oniversite Amerikana ao Kairo. Anisan'ny mahaliana azy ny fikarohana momba ny tambajotra sosialy sy ny fanetsehana olona maro, ny fahasamihafana amin'ny fampitam-baovao, ny fahalalahana maneho hevitra ary ny fandrindrana votoaty. Mpikambana teo aloha tao amin'ny Vondrona Mpanolo-tsaina Marosahanina ao amin'ny Seha-Dinika Fitantanana an'Aterineto (IGF MAG) tohanan'ny Firenena Mikambana izy ary nanoratra boky sy mônôgrafia miisa valo, anisan'izany ny “The Internet in the Arab World: Egypt and Beyond,” (ny aterineto amin'ny tontolo arabo: Ejipta sy ny mihoatra) ary lahatsoratra fikarohana maro, tatitra sy ny toko marobe amin'ny boky. Nahazo mari-pankasitrahana ara-pikarohana marobe ny fikarohana nataony momba ny tambajotra sosialy sy ny fikatrohana politika nitondra sy nandritra ny revolisiona tao Egypta, anisan'izany ny lokan'ny fikarohana AUC Excellence.