Akatòny

Fitia Tsy Mba Hetra Hampijoro Tsara Hatrany Ny Global Voices

Mila fanohanana avy amin'ny namana sy ny mpamaky toa anao ny fikambananay hitoerany ho mahaleotena, maimaim-poana, ary hahazaka miasa maharitra!

Manomeza anio

Mihamanakaiky ny fanovàna ny lalànany momba ny fitoviana ny ao Trinidad & Tobago, tafiditra amin'izany ny fironana ara-pananahana

Saina miloko avana marevaka. Sary an'i Marco Verch,mpakasary matihaninana tao amin'ny Flickr, CC BY 2.0.

Tsirairay, nanitsy tsikelikely ny boky mirakitra ny lalànany ireo firenena ao Karaiba mba hahatsinjovana fitoviana lehibe kokoa ho an'ireo olona LGBTQ+, amin'ny tsy fametrahana ho heloka ireo ampahany miresaka sôdômia tamin'ny fotoanan'ny fanjanahantany. Tamin'ny 2016, i Belize. Taona roa taty aoriana, Trinidad & Tobago no nanaraka ny diany, saingy nihisatra vao tonga ny fiantraikan'ilay fandravàna ireo andinin-dalàna mifandraika amin'izany. Taona telo taorian'ny namoahan'ny fitsaràna fa tsy araka ny lalàm-panorenana ireo lalàna momba ny sôdômia ao amin'ny firenena, toa vonona ihany hanova ny lalàny mifandraika amin'ny fironana ara-pananahana ny  Equal Opportunity Act (EOA) ao Trinidad & Tobago (Lalàna momba ny Fitoviana).

Ny tanjona ambaran'ilay Lalàna dia ny “handràra ireo karazana fanavakavahana sasantsasany” ary “hampiroborobo ny fitovian'ny vintana ho an'ny olona rehetra samihafa sata”. Hahatongavana amin'izany, noforonina ny Komitin'ny fitoviana sy ny Tribonalin'ny fitoviana mba handray an-tànana ny olana tahàka izany, saingy hatreto, tsy misy na iray aza amin'ireo rantsana ireo afaka miatrika ireo olan'ny fanavakavahana mitofotra amin'ny fironana ara-pananahana. Ny olana momba ny taovam-pananahana, ny foko niaviana, ny fivavahana, ny sata ara-panambadiana, na ny fahasembanana eo amin'ny resaka asa, fiofanana, fanabeazana, sns…. no hany voarakotr'ireo lalàna misy amin'izao fotoana izao.

Taorian'ny 14 Aprily nanambaran‘ny Scotiabank ao Trinidad & Tobago fa ho hitariny ny fiahiana ara-pahasalamàna ataony mba hankany amin'ny vadin'ireo mpiasa mifanambady amin'ny mitovy aminy (lahy samy lahy, vavy samy vavy), toy ny fomba efa nataony ihany tamin'ny vadin'ireo mpiasa mifanambady vavy sy lahy,  dia nitombo ny tsindry ho fanovàna ny lalàna amin'izao fotoana.

Niteraka adihevitra nanerana ny firenena ilay fanambaràna, ary niarahaba izany ny  Tranoben'ny Varotra Amerikàna (AMCHAM) sy Ian Roach, lehiben'ny Komitin'ny Fitoviana, izay samy nanamarika tao anaty antsafa iray ho an'ny  “Trinidad and Tobago Newsday“:

Hetsika tsara nataon'ny sehatra tsy miankina io ary indrindra indrindra fa hoe banky, izay manana mpiasa avy amin'ny lafivalo samihafa. Tena zava-dehibe tokoa ny  fanarahan'ny hafa ny diany, mihoatra noho ny fisisihan'ny lalàna.

Nilaza ny  Lehiben'ny Fampanoavana, Faris Al-Rawi, fa nandrisika azy ny fandraisana andraikitra fampiatiana nataon'ny Scotiabank ary manokatra varavarana izy ho an'izay rehetra ilaina hanoherana ny “dindon'ny fanavakavahana” misy. Ny fijoroan'i Al-Rawi dia somary samihafa amin'ny heviny taorian'ny didin'ny Fitsaràna Avo tamin'ny 2018; tsy ela akory taorian'ny nanambaràna ilay didy ho “tsy mifanaraka amin'ny lalàm-panorenana”, nilaza ny fikasàny hampakatra ny raharaha ny fanjakàna.

Raha tsy azo lavina fa nahavita dingana goavana i Trinidad & Tobago tamin'ny resaka fanavakavahana ireo mpikambana anatin'ny vondrompiarahamonina LGBTQ+ ao an-toerana, mbola misy hatrany ny fankahalàna pelaka—ny ankabeazany dia natosiky ny antony ara-pivavahana. Tany anatin'ireo tambajotra media sôsialy toy ny Facebook, fanakianana maro no nitsena ireo fanehoankevitry ny vahoaka momba ilay fanambaràn'ny Scotiabank.

Mandritra izany fotoana izany, tsy hoe fotsiny mitohy miatrika fanavakavahana ireo olona LGBTQ+,  fa ireo fihetsika miharo herisetra, izay ny ankamaroany dia miafara amin'ny fahafatesana. Ny akaiky indrindra, ny namonoana an'i Marcus Anthony Singh, mpikambana iray avy amin'ny vondrompiarahamonina LGBTQ+ ao an-toerana, niteraka adihevitra tety anaty tambajotra momba ny tena zavamisy atrehan'ny maro amin'ireo  olona LGBTQ+ manoloana ny resaka fiarovana / fitoniana sy fanavakavahana. Maro amin'ireny fifanakalozan-kevitra ireny no nitranga tao amin'ny Twitter Spaces, izay sehatra natao hifampiresahana amin'ny feo mivantana monja ihany mba hisian'ny fifampiresahana sy fifanabeazana azo antoka / am-pitoniana.

Na tsy nanome ny tetiandro hanaovana ny fanovàna ilay lalàna aza ny Lehben'ny Fampanoavana, Al Rawi, ho an'ny vondrom-piarahamonin'ireo LGBTQ+ sy ny mpiaradia aminy dia mbola misy ny fanantenana hoe ho arahan'ny fanjakàna ato ho ato ny hetsika nataon'ireo orinasa avy amin'ny sehatra tsy miankina toy ny Scotiabank, mitondra mankany amin'ny fiovàna sôsialy.

Atombohy ny resaka

Mpanoratra, azafady hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.