- Global Voices teny Malagasy - https://mg.globalvoices.org -

Nanao fihetsiketsehana tao Baku ny vehivavy taorian'ny famonoana olona mahatsiravina

Sokajy: Eoropa Afovoany & Atsinanana, Azerbaijan, Mediam-bahoaka, Vehivavy sy Miralenta

Vondrom-behivavy milanja sora-baventy «Politika ny famonoana olona.» Sary avy amin'ny pejy Facebook-n'i Gulnara Mehdiyeva, tamin'ny alàlan'ny OC Media ary nahazoana alàlana.

Tao amin'ny OC Media ity lahatsoratra ity no nivoaka voalohany tamin'ny teny Anglisy [1]. Navoaka eto indray ny lahatsoratra nasiam-panovana tamin'ny alàlan'ny fifanarahana fifampizarana votoaty.

Nanao fihetsiketsehana nanoloana ny Lapam-panjakana tamin'ny 4 Febroary ho setrin'ny famonoana vehivavy tamin'ny fomba feno habibiana tany Bakò ireo feminisista any Azerbaijan.
“Na eo aza ny toe-javatra mampahonena iainan'ny vehivavy any Azerbaijan dia tsy mandray andraikitra matotra ary tsy mijery ny toe-java-misy ankehitriny ny Komitim-panjakana misahana ny raharaha momba ny Fianakaviana, ny Vehivavy ary ny Ankizy”, hoy [2] ny iray tamin'ireo mpanao fihetsiketsehana tamin'ny Voice of America.
Nilanja sora-baventy mivaky hoe “politika ny famonoana vehivavy” ireo mpanao fihetsiketsehana, sora-baventy nalain'ny [2]polisy rehefa nahita ny zava-niseho nandritra ny minitra vitsy. Namoaka ireo vehivavy hiala ilay toerana ihany koa ny polisy.
Nilaza ny mpanao hetsi-panoherana fa ny famonoana [3] feno habibiana an'i Banu Maharramova, vehivavy 32 taona, no nahatonga ny fihetsiketsehana izay hita tao anaty daba-pako tany amin'ny distrikan'i Nasimi, Bakò ny vatany voarasarasa ny 27 Janoary. Nilaza [4]ny polisy tany an-toerana fa maty novonoin'ny rafozan-dahiny 75 taona, Idris Maharramov izy.

Nilaza ny polisy fa rehefa avy namono ity vehivavy ity i Maharramov dia norasarasainy ny vatany, ary nataony tao anaty kitapo plastika sy natsipiny tany anaty fitoeram-pako tany amin'ny distrika teo akaiky teo. Raha ny filazan'ny mpifanila vodirindrina aminy, miara-mipetraka amin'ny zanany kely roa  i Banu Maharramova sy ny rafozany ihany koa, ary ny vadiny kosa mipetraka any ivelany.

Taorian'io tranga io, notanan'ny polisy i Idris Maharramov. Mbola any am-ponja vonjimaika izy, ahiahiana ho ninia namono olona. Mbola mitohy ny famotorana.

Niteraka fahatezerana tao amin'ny tambajotra sosialy ity vaovao momba ny famonoana olona ity niaraka tamin'ny tenirohy #banuüçünsusma (aza mangina ho an'i Banu).

Nilaza i Aghazadeh fa efa nanomana mialoha ny fihetsiketsehana izy ireo ho valin'ny famonoan-tena roa nataon'ny tovovavy roa tamin'ny volana Janoary. “Mariky ny herisetra miseho matetika sy ny tsy fisian'ny fanampiana ara-tsosialy atrehin'ireo vehivavy ao Azerbaijan” hoy izy ny fahafatesan'izy ireo.

“Mahatsiaro ho voafandrika ny vehivavy,” hoy i Aghazadeh, “vitsy loatra ny trano fialofana ho an'ny herisetra an-tokantrano ary misalasala izy ireo manao antso avo amin'ny polisy satria matetika manao fampihavanam-pianakaviana ny polisy, raha sady mamerina ireo niharam-boina any am-pelan-tànan'ireo mpanararaotra azy ireo fotsiny.”

“Ny hisarihana ny sain'ny Mpanelanelana sy ny Komitim-panjakana misahana ny Raharaham-pianakaviana, ny Vehivavy ary ny Ankizy no tanjon'ny fihetsiketsehana ataonay manoloana ny Lapam-panjakana izay manana birao ato amin'ity tranobe ity, ary tompon'andraikitra mivantana amin'ny ady amin'ity olana ity ao amin'ny firenena.” hoy i Aghazadeh.