Akatòny

Fitia Tsy Mba Hetra Hampijoro Tsara Hatrany Ny Global Voices

Mila fanohanana avy amin'ny namana sy ny mpamaky toa anao ny fikambananay hitoerany ho mahaleotena, maimaim-poana, ary hahazaka miasa maharitra!

Manomeza anio

Tetikasa vaovao ahitana loharanom-piarovana nomerika amin'ny fiteny Aymara avy amin'ny Global Voices teny Aymara

Vao haingana no nahazo fanampiana ara-bola avy amin'ny Internews ny Global Voices Aymara mba hananganana hoenti-manana fiarovan dizitaly amin'ny fiteny Aymara ho an'ny tetikasa vaovao antsoina hoe Apthapi Digital. Milaza ny fomba fanao nentin-drazana amin'ny kolontsaina Andeana izay iarahan'ny fianakaviana mifampizara ny ampahany amin'ny vokatra notazany amin'ny hafa ao amin'ny vondrom-piarahamonina amin'ny alàlan'ny fanangonana sy fametrahana izay azon'izy ireo atolotra mandritra ny fomba nentim-paharazana aguayo (na lamba) ny teny hoe “Apthapi” . Ao anatin'izany toe-tsaina mizara izany ihany, ankoatra ny fizarana fahalalana amin'ny hafa, dia kinasan'ity tetikasa ity ny hanatratra mpandray anjara vaovao izay tsy mba nahazo tamin'ny fomba mahazatra ny torohay fototra momba ny fiarovana nomerika.

Fiteny ampiasain'ny olona manakaiky ny roa tapitrisa ao amin'ny faritra Andeana ny Aymara, ao anatin'izany ny firenena Bolivia, Però ary Shily.

Nanomboka tamin'ny fiandohan'ny volana Oktobra, mpikambana roa ao amin'ny ekipa GV Aymara dia ilay mpitantana ny tranonkala Victoria Tinta sy ilay mpandika teny Elias Quispe Chura no handika sy hanitsy ny lahatsoratra miisa dimy mifantoka amin'ny fiarovana fototra amin'ny finday, ny teny miafina saro-patarina, ny fitandremana amin'ny rindrampisompatra sy ny fisolokiana amin'ny aterineto, ny fomba fitetezana tranonkala azo antoka, ary momba ny maha-zava-dehibe ny fiarovana ny lahatahirin'ny tena manokana. Havoaka ao amin'ny pejy GV Aymara ireo loharanom-piarovana ireo miaraka amin'ny sary fandravahana manokana ataon'i Nicaela León, mpanakanto iray avy ao an-toerana izay mpiara-manorina ny tetikasa Phuyu. Nanoro hevitra momba io dingana io ihany koa ny mpikambana GV teny Espaniôla Jacobo Nájera noho ny haizatra betsaka hitany teo amin'ny sehatry ny fiarovana nomerika. Hanampy amin'ny fandrindrana ny fampitaovana ny tetikasa ny Rising Voices.

Raha tokony nanangana hoentimanana vaovao hatrany am-boalohany dia hiara-hiasa amin'ireo fikambanana isa-paritra roa ny tetikasa, Código Sur, izay mamokatra loharanom-piarovana nomerika amin'ny teny Espaniola amin'ny alàlan'ny tetikasa antsoina hoe Milpa Digital. Ankoatra izay ny fikambanana ao Ekoadaoro Huaira no nampiasa ireo loharanom-piarovana voalaza teo aloha ireo ary nandika azy ireo tamin'ny fiteny Kichwa tamin'ny alàlan'ny tetikasan'izy ireo Shigra Digital. Hanangana ireo loharanom-piarovana ireo ity tetikasa vaovao ity ary azo ampiasaina amin'ny lisansa Creative Commons.

Koa satria maro amin'ireo mpampiasa ny fiteny Aymara any Bolivia, Però ary Shily no sady tsy mamaky no tsy manoratra ilay fiteny dia tena zava-dehibe tokoa ny hanaovana izay ahafahana mahazo ireo hoentimanana vaovao voafangitra ireo. Hisy ny dikan'ny rakipeo fohy amin'ny fiteny Aymara ho an'ny mpihaino kinendry amin'ny alàlan'ny fiaraha-miasa amin'ny fikambanana mpamokatra fandaharana an'onjam-peo CEPRA ao Cochabamba raha vantany vao vita ny fandikan-teny.

Avy amin'ny tetikasa teo aloha notantanan'ny GV Aymara tamin'ny famokarana dika rakipeo tamin'ny fandikan-teny ny ampahany lehibe tamin'ny fandalinana ao ambadik'ity tetikasa ity. Fantatry ny ekipa fa ilaina ny fanatrarana ireo mpampiasa ny fiteny Aymara ireo izay mety tsy manana fifandraisana amin'ny aterineto matetika ary mampiasa sy mizara vaovao amin'ny alàlan'ny fantsom-pifandraisana am-bava.

Ary farany, hitarika hetsika fanentanana eo anivon'ireo fikambanana Aymara any Bolivia, Però ary Shily ny ekipa rehefa mandeha ny fivoaran'ny hoentimanana ka hangataka azy ireo hizara ireo hoentimanana ireo any amin'ny tambajotran'izy ireo sy ny mpikambana ao aminy. Hisy ny fifantohana manokana amin'ireo onjampeon'ny vondrom-piarahamonina izay mandefa fandaharana matetika amin'ilay fiteny.

Araho hatrany ny vaovao momba ilay tetikasa izay ho vita amin'ny voalohan'ny volana Novambra!

Atombohy ny resaka

Mpanoratra, azafady hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.