Akatòny

Fitia Tsy Mba Hetra Hampijoro Tsara Hatrany Ny Global Voices

Mila fanohanana avy amin'ny namana sy ny mpamaky toa anao ny fikambananay hitoerany ho mahaleotena, maimaim-poana, ary hahazaka miasa maharitra!

Manomeza anio

Hijery ny Tenim-Pirenena rehetra? Mandika ny tantaran'ny Global Voices izahay mba ho hitan'ny rehetra ny fitantaran'olo-tsotra manerantany.

‘Ho rakotry ny hiranao ireo toeram-pisotroana': Faraveloma ataon'i Karaiba ho an'i Kenny Rogers

Sunset horse.

Sary an'i Yatheesh Gowda tao amin'ny Pixabay

Fanamarihan'ny mpamoaka lahatsoratra:  Manana ny lazany tokoa any amin'ny faritra miteny anglisy ao Karaiba ny gadona “Country”  sy ny mozika tandrefana. Raha tsaraina avy amin'ireo an-jatony  namerenana milalao gadona reggae an'ireo hira “country” mahazatra,  sy ireo fetibe toy ny Pure Country Fest fanao ao St. Lucia ary ny isanjato ambony be azon'ny mozika “country” eny anatin'ireo “jukeboxes” sy fandaharana hira rentsika eny amin'ireo lavaka fantsakàna any ambanivohitra, misy zavatra mikasika ny fifamatorana mafin'ireo tarikevitra sy tantaran'ny mozika “country” amin'ny maripamantarana sasantsasany an'ny vahoaka Karaibiàna. Ny dika niandohana amin'ny tantara eto ambany dia tao amin'ny pejy Facebook-n'ny mpanoratra no navoaka. 

Andriamanitra ô ry akama, Kenny Rogers. Raha misy teny azon'i Trinidad ambara amin'izao fotoana izao, ny “The Gambler” no mety hameno ny tweeter sy ireo famoahampeo goavana miala avy amin'ny Icacos mankamin'ny Matelot. Maivamaivana ry zareo miditra amin'io miaraka amin'ilay dika nalaina avy amn'ny Busy Signal somary karikary sy midobodoboka  — fomba entin'ny ao Karaiba mijoro vavolombelona hanehoany ny fitiavany anao — sy mampiako ilay gadona lalainao, ary ilay kalo ankamamianao, fa tsy hisy feo na iray aza hangina ao anatin'ny hira amin'ilay gadona mampihetsi-po tianao, ny kliobanao be korontana hiparitaka toy ny roatran-dranomasina miantefa amin'ny harambato, harambaton'ny fiainana. Fa iza no niteny taminao tompokolahy hoe amin'izao vaninandron'ny valanaretina izao no matesa? Ahoana no fomba azon'ireo toeram-pisotroana goavana sy ireo hitsikitsika madinika 868 aty aminay maneho ny fisaonana mendrika sy sahaza anao, tsy ilàna mivorivory na mandrairay kely, na mifokafoka kely, na manokatra toaka White Oak sy mitsingoangoana ho anao?

Ny fandaozana ny fiainana toy izao nataonao izao, mialoha ny faran'ny herinandro, dia midika fa ireo reniranom-boasary makirana sy ireo fety teny amin'ireo ampahana torapasika tsy azo aleha amin'izao fotoana izao no mety hipoaka hanatitra anao eny amin'ny lanitra avo, hotohatohanan'ny fandroandraotry ny gana nasiana ‘curry’ arahan'ny kapoka dipoavatra ao anaty sakafo, ny fikasokasoky ny ranomandry amin'ny siny mifanaraka amin'ny gadon'ny “country” fitendrinao. Na tsy ireo bandy ao an-tànana ihany aza no mirevy ny tononkiranao (vitsy no nosoratanao, saingy iza no miraharaha izany, rehefa tonga eny am-bavanao izy ireny?), tsara ny vintana hoe mianatra ny momba anao ireo sipakely andalam-pitomboana, sambany nihaino anao tanaty fampielezampeo sy ireo fiventesana nitabataba nataon'ny rainy, ny raibeny, ny dadatoany, mampiakatra ny feo ho mafimafy kokoa no sady miventy ny beso rehefa ilay ianao mba makamaka fotoana milamina iny ny tolakandro mba hihainoana eny am-pamiliana handeha hody avy any an-tsekoly.

Satria ve lehilahy ianao no antony, ry Kenny? Ekeko hoe tsy mahafantatra betsaka momba anao aho, izaho manokana, ary somary matahotra kely ihany hitady anao ao amin'ny Google sao dia hahita zavatra tsy ho azoko tsinontsinoavina. Satria ve nitia anao sy norotsirotsianao tamin'izay fomba rehetra azo eritreretina ireo lehilahy monina eto amin'ny fireneko, ireo lehilahy izay tsy vitako akory ny manopy maso in-droa any amin-dry zareo raha tsy te-hahita angano —  feo garagara nifanekena, nomamiana tantely sy whisky ary ampy tanjaka mbola hijoro ho lehilahy hatrany, iray miaraka aminà fahatsapàna izay mba tàkany, raha toa fotsiny afangaro halavàna miaraka amin'ny “The Gambler”, “Islands in the Stream” ary ny “Coward of the County”?

Nijery an'ireo tompona trano fisotroana nanangana faribolana somary miaina anaty fiarahamonina mirindra aho, ny sandrin'izy ireo mihodidina ireo tavoahangy misy Carib sy Stag fandrosony rehefa fotoana miavaka, na ireo Mackesons notapohana Supligen, nidradradradràna ela ny mozikanao efa nilaozan'ny zon'ny mpamorona, ny endriny mivoara-mena, ny kibon-dabierany mivilavila miaraka amin'izay fahatsapàny, ireo varavaranà fiara sy kamiao mivoha mandra-pihovitrovitr'ireo varavarankelin'ny trano fisotroana natao ho an'ireo fiara, miantso ny ozona rehetra alefan'ireo eo amin'ny manodidina mila torimaso satria mbola handeha hiasa ny ampitso. Reko ry zareo, ary indraindray hàlako, liana ny amin'izay fihevitry ny hafa azy ireo aho, mbola matahotra hatrany sady ratsy fitondra azy ireny no sady mitandrina ny tenako ihany koa rehefa manodidina azy ireny — saingy Kenny. Kenny, ny hany zavatra tokana marina dia, indray alina izay, lavitra an'ireo karazana toerana fisotroana rehetra mahazatra, taona maro lasa izao, nandefa iray tamin'ireo hiranao aho (tsy voatery ho ambarako anao hoe iza) ary navelako niverimberina tao amin'ny Youtube tao, dia iny aho fa. … Iny aho fa latsa-tomany tsy nisy fiafarany, ny alina.

Niankina tamin'iny, Kenny Rogers, mbola ho rakotry ny hiranao ireo toerana fisotroana, rehefa mandao ny latabatra lavabe filokàn'ny fiainana ny “coronavirus”, maka ny marobe aminay hiaraka aminy. Mbola hihira ny hiranao ry Prakash sy Forbes, Ramdial sy Chan, Rishi sy Salty Bag ary Harry zanany, ary ilay lehilahy roa endrika avy ao Quito, fa tsy izaho (na nihaino aza aho), tena hataony mafy be, satria tsy hisy olona hitoroka azy noho ny fanabatabàna aminà feo mafy ao amin'io toerana io, ary ao amin'io toerana io, voabahana sy voafefin'ny heloka bevava, ny kolikoly, fiandrasana pasipaoro efa ho taonjato enina, bobol (= firaisana tsikombakomba hanodinkodina volambahoaka), ireo lavaka be eny an'arabe, tsy fisian'ny rano anaty anaty fantsona, ny masoandro mandoro, ny fifamoivoizana maimbo, ary ireo olona nangàla ny mango taminao, ianao nanome ny fahendren'ny “fahalalàna”. Fahalalàna ny fotoana hitazonana azy ireny. Hampirimana azy ireny. Hihatahana. Hihazakazahana.

Ary indraindray, na gaigy sy be di-doha ary malahelo tahaka ny inona aza izahay rehetra  (izaho sy ry zareo lehilahy mpamonjy toerana fisotroana), noraisinay ireo torohevitrao.

Atombohy ny resaka

Mpanoratra, azafady hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.