Notorian'ny praiminisitr'i Singapaoro ho manala baraka ny tranokalam-baovao tsy miankina iray

Ny kopian'ny fiantsoana navoaka ho an'ny lehiben'ny tonian-dahatsoratry ny The Online Citizen. Terry Xu. Loharano: pejy Facebook an'ny TOC

Notorian'ny praiminisitr'i Singapaoro Lee Hsien Loong i Terry Xu, lehiben'ny tonian-dahatsoratry ny tranonkalam-baovao tsy miankina The Online Citizen (TOC), noho ny fanalam-baraka nifandraika tamin'ny lahatsora-baovao iray navoakany, miresaka momba ny disadisam-panjakana eo amin'ny mpitarika sy ireo mpiray tampo aminyy. Nilaza ireo mpitsikera fa ohatra iray hafa amin'ny famaizana henjana ataon'ny governemanta amin'ny haino aman-jery tsy miankina sy vondrona hafa izay mitantara fomba fijery tsy mitovy amin'ny manampahefana ao amin'ny firenena izany. Any Singapaoro, heloka hahazoana sazy henjana mandritra ny roa taona an-tranomaizina sy onitra ny fanalam-baraka.

Tamin'ny 15 Aogositra 2019, namoaka lahatsoratra mitondra ny lohateny hoe “namoaka lahatsoratra momba ny fahatapahan'ny fifandraisana amin'ny olona ao amin'ny fianakaviana ny vadin'ny PM Lee, Ho Ching “, izay navoaka tao amin'ny Facebook ihany koa. Manamarika ny fanesoan'i Ho mizara lahatsoratra momba ireo olona manaratsy endrika ny fianakaviana izany:

Although there’s nothing particularly wrong with the article and the points raised by the author, but the irony of Madam Ho sharing the article is what’s interesting and amusing to us. This is because everyone knows that she has a sour relationship with her husband’s family members – particularly her brother-in-law Lee Hsien Yang (LHY) and sister-in-law Dr Lee Wei Ling (LWL).

Na dia tsy misy diso aza ny lahatsoratra sy ny hevitra nolazain'ny mpanoratra, fa ny esoeson'ny Ramatoa Ho mizara ilay lahatsoratra no mahaliana sy mahafinaritra antsika. Izany dia satria fantatry ny rehetra fa manana fifandraisana ratsy amin'ny mpianakavin'ny vadiny izy – indrindra fa ny zaodahiny Lee Hsien Yang (LHY) sy ny zaobaviny Dr Lee Wei Ling (LWL).

Nanatsonga ny fanambarana ampahibemaso teo aloha nataon'i LHY sy LWL izay niampanga ny mpiray tampo amin'izy ireo ho nanohitra ny fanirian'ny rain'izy ireo efa maty, ny praiminisitra voalohany tao Singapaoro, Lee Lee Kuan Yew ny lahatsoratry ny TOC. Nilaza i LHY sy LWL fa tokony harodana ny tranon'ny fianakavian'izy ireo ao amin'ny Oxley Road taorian'ny nahafatesan'ny rainy tamin'ny taona 2015 saingy nilaza izy ireo fa te-hitazona ny trano mba “handova ny fitokisana an'i (Lee Kuan Yew”) ny rahalahin'izy ireo. Nolavin'ny praiminisitra izany ary nilaza tamin'ny parlemanta izy tamin'ny taona 2017 fa nisokatra tamin'ny fomba hikolokoloana ny fananana na velarina ho amin'ny tombontsoam-bahoaka ny rainy.

Tamin'ny Alahady 1 septambra, nandefa taratasy ho an'i Xu ny sekreteran'ny praiminisitra Chang Li Lin mpifandray amin'ny gazety, mangataka azy hanala ilay lahatsoratra ao amin'ny tranokalan'ny TOC sy ny pejy Facebook satria “ahitana fanambarana diso sy tsy misy fotony ary raisina ho fanaratsiana sy fanalam-baraka ny PM Lee ary koa ny toerany amin'ny maha praiminisitra.” Nilaza ilay taratasy fa namerimberina ” fiampangana diso maro momba ny PM Lee” izay nataon'ny anabaviny teo aloha ilay lahatsoratra. Nanazava ny anton'ny fangatahan'ny praiminisitra fialan-tsiny tamin'ny TOC sy ny antony nitoriany momba izany raharaha izany ihany koa ilay lahatsoratra:

PM Lee’s restraint in suing his siblings should not be misinterpreted by others as free licence to repeat and spread false and defamatory allegations against him, as the Article and Post have done. He has to rebut and deal publicly with such scurrilous attacks on his integrity and character, if necessary through legal action. This is especially as such attacks are also directed at his fitness to hold office as Prime Minister and to lead the Government.

Tsy tokony heverin'ny hafa ho fahazoan-dàlana malalaka hamerimberenana sy hanelezana fiampangana diso sy manala baraka azy ny  fisalasalan'ny PM Lee hitory ireo mpiray tam-po aminy, araka ny nataon'ny Article sy Post. Tsy maintsy mandà sy miatrika ampahibemaso ny fanafihana mahatsiravina ny fahatokisany sy ny toetrany toy izany izy, amin'ny alàlan'ny hetsika ara-pitsarana raha ilaina. Natao indrindra hamelezana ny fahaizany mitazona ny maha-praiminisitra azy sy hitarika ny governemanta ihany koa ny fanafihana toy izany.

Namaly ny TOC tamin'ny fanesorana ilay lahatsoratra tao amin'ny tranonkalany rehefa nandinika ny fiantraikan'ny taratasy azony tamin'ny praiminisitra izy ireo. Saingy naverin'izy ireo ilay lahatsoratra ary nohamafisiny fa tsy fanalam-baraka izany fa ‘fanehoan-kevitra ara-drariny’. Nanoratra tany amin'ny praiminisitra indray i Xu mba hanazava ny fomba fijeriny, manazava ny hevitra sasany ao amin'ilay lahatsoratra, ary manamafy ny fanoloran-tenan'ny TOC hilaza ny marina amin'ny fahefana.

Although I do fear that the cost stemming from the possible legal suit from you may be hefty, that is a price that I am willing to pay to not only uphold my principles, but also to uphold my obligations to Singapore and my fellow Singaporeans.

Na dia tokony hatahotra aza aho fa mety ho henjana ny fiantraikan'ny fitoriana ataonao, dia vonona aho hiatrika izay fiantraikany mba hanaja ny fitsipika hijoroako sy hanaja ny adidiko ho an'ny Singapaoro sy ny mpiray tanindrazana Singapaoreana.

Tamin'ny 5 Septambra, nahazo taratasy fampiantsoana avy amin'ny mpisolovavan'ny praiminisitra i Xu, manana valo andro hamaliana ny fiampangana fanalam-baraka nataony izy.

Nilaza ireo mpikatroka sasany fa «famoretana» ireo mpitsikera antserasera izany. Kirsten Han, mpanao gazety sady mpikatroka, namerina ny fanontanian'ireo mpaneho hevitra marobe momba ny fanapahan-kevitry ny praiminisitra henenjika ireo olona hafa izay mamerina fotsiny ny fanambarana nataon'ireo mpiray tam-po aminy:

If the comments are so harmful to his reputation, why is he not suing his siblings and allowing their comments to remain up online? If those comments can remain publicly available, why is it that repeating them will attract a lawsuit claiming that one has harmed his reputation?

Raha manimba ny lazany ireo fanehoan-kevitra, nahoana izy no tsy mitory ny mpiray tampo aminy ary mamela ny fanehoan-kevitr'izy ireo hijanona ao anaty aterineto? Raha afaka mijanona ho hitan'ny daholobe ireo fanehoan-kevitra ireo, nahoana ny famerenana azy ireo no hiteraka fitoriana amin'ny filazana fa nanimba ny lazany ny olona iray?

Mpamokatra sarimihetsika Lynn Lee, manontany ny fetezan'ny fampiasana ny biraon'ny praiminisitra amin'ity raharaham-pitsarana ity:

As a private citizen, Lee Hsien Loong can of course choose who he wants to sue. But as PM of Singapore, he shouldn’t have one standard for his family and another for the rest of us. And if LHL is acting in his personal capacity, he shouldn’t be using PMO resources. All this mixing of private and public is deeply disturbing.

Amin'ny maha olon-tsotra azy, mazava ho azy fa afaka misafidy izay tiany hotoriana i Lee Hsien Loong. Saingy amin'ny maha-PM ao Singapaoro, tsy tokony hanana fenitra iray ho an'ny fianakaviany izy ary iray hafa ho antsika vahoaka. Ary raha mampiasa ny tenany manokana i LHL, dia tsy tokony hampiasa ny loharanon'ny kabinetran'ny PM, ny PMO, izy. Manelingelina tanteraka ity fifangaroana rehetra amin'ny tsy miankina sy ny fanjakana ity.

Tsy vao sambany no niatrika olana ara-pitsarana i Xu sy ny TOC noho ny tatitra ataon'izy ireo momba ny governemanta. Tamin'ny volana Desambra 2018, voampanga ho nanao fanalam-baraka heloka bevava izy ireo rehefa namoaka taratasy miampanga ireo manampahefana ambony noho ny kolikoly. Efa nitory bilaogera nanao fanehoan-kevitra “manala-baraka” azy sy nizara lahatsoratra Facebook voalaza fa manimba ny lazany ihany koa ny praiminisitra.

Atombohy ny resaka

Mpanoratra, azafady Hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.