(Marihina fa tamin'ny volana Aprily 2010 no nivoahan'ny lahatsoratra teny Anglisy)
Nahavita nanao fanadihadiana ireo mpisera aterineto Shinoa mampiasa ny fitaovana fandinganana ny Rindrin'Afo Lehibe i Jason Ng avy ao amin'ny Kenengba [1]. Nahavita nanangona lahatahiry miisa 5.300 izy tao anatin'ny 10 andro tao amin'ny Twitter, bilaogy bitika 163, bilaogy bitika Tencent, Renren.com ary ny bilaoginy manokana. Ireto ny zavatra hitany voalohany:
1. Lahy sy Vavy: 92% no lehilahy ary 8% fotsiny ny vehivavy
2. Ny fianarana vita: Nandia fianarana ambony ny ankamaroany – manana diplaoma avy amin'ny oniversite ny 73%, manana mari-pahaizana maîtrise ny 11% , manana mari-pahaizana avy amin'ny lisea ny 9%, nandia fanabeazana fototra ny 4%, manana diplaoma doktôrà ny 2% ary ambaratonga faharoa 2%.
3. Taona – Eo anelanelan'ny 19 ka hatramin'ny 28 taona ny 77% .
4. Asa atao – Mpianatra ny ankamaroany – 49.34%, arahin'ny matihanina amin'ny teknolojia vaovao (manodidina ny 20%) ary avy eo ny sehatra ara-bola (3.55%) ary ny miahy tena (3.11%).
5. Ny fitaovana fandinganana – Mampiasa fitaovana fandinganana toy ny Freegate, Puff ary Ultra Surf ny ankamaroany (mihoatra ny 70%), arahin'ny Proxy, SSH ary VPN. Mampiasa fomba hafa toy ny GAppProxy ny 15%.
6. Fiampitana – miampita ny rindrina isan'andro ny 2/3-n'ny mpisera, indray mandeha na intelo isan-kerinandro ny 17%, 8% isaky ny andro hafa.
7. Fandaniana – Mandany latsaky ny 10 yuan amin'ny fitaovana fandinganana ny 88%, mandany 10 ka hatramin'ny 50 yuan ny 10%.
8. Tantara – 52% amin'ireo mpisera no manana fizàran-draharaha 3 taona amin'ny fampiasana ny fitaovana fandinganana. Manana fizàran-draharaha 9 taona ny 2.24% izay hoe nanomboka tamin'ny taona 1998 rehefa nanomboka ny tetikasa ampinga volamena.
9. Antony – 80% no te-hiditra amin'ny tolotra aterineto fototra toy ny Google. Ny 75% no te hiditra amin'ny tranonkalan'ny tambajotra sosialy toy ny Twitter. 72% no te-hiditra amin'ny fampitam-baovao vahiny. Ny 60% no mitsidika ny tranonkala fialamboly toy ny Youtube ary 30% no te-hiditra amin'ny tranonkala ho an'ny olon-dehibe.
10. Fanaparitahana ny teny – 85% no nampianatra ny namany ny fomba fampiasana ny fitaovana fandinganana.
11. Ny hevitra manoloana ny Rindrin'Afo Lehibe- 38% no mino fa tokony hesorina ny Rindrin'Afo Lehibe ary manodidina ny 50% no nanome soso-kevitra mangarahara kokoa sy mazava kokoa momba ny fitsipiky ny sivana amin'ny aterineto.
12. Ahoana no nahafantaran'izy ireo ny fisian'ny Rindrin'Afo Lehibe- 37% no nahazo vaovao avy tamin'ny bilaogy, 28% avy amin'ny milina fikarohana ary 19% avy amin'ny sehatra fifanakalozan-kevitra.
Tsidiho ny Kenengba [1] ho an'ny tatitra feno amin'ny teny Shinoa