Naminavina ny fitsapan-kevitra nataon'ny Williams and Associates, fikambanana mpikaroka sy mpanadihady ao Etazonia fa handresy amin'ny fifidianana ho filoham-pirenena ao Nizeria ny 16 Febroary 2019 i Atiku Abubakar, kandidà mpanohitra avy ao amin'ny Antokom-bahoaka Demokratika (PDP). Abubakar sy ny filoha amperinasa Muhammadu Buhari ao amin'ny Kongresin'ny Liam-pandrosoana (APC) no mpifaninana roa lehibe indrindra amin'ilay fifaninanana.

Nanatontosa antsafa miisa 1.550 izay namoaka ny “elanelana 12% amin'ny vatom-pifidianana ho an'i Atiku raha mitaha amin'i Buhari” ny Williams and Associates ny 11 ka hatramin'ny 16 Janoary 2019.

Ireo ekipa sy paikady izay nampiasaina tamin'ny faminavinana marina ny fandresen'i Buhari tamin'ny taona 2015 ihany no nampiasaina tamin'ity fitsapan-kevitra ity . Naneho ny valin'ny fanadihadiana fa 64 isan-jato tamin'ireo olona namaly no nanamafy fa tsy mendrika ny ho voafidy  intsony ny Filoha Buhari noho ny tsy fahombiazan'ny tamin'ny fanomezana asa. Ny 53 isan-jaton'ireo nohadihadiana ihany koa dia somary manahy momba ny hoavin'ny toe-karenan'i Nizeria.

Maro tamin'ireo namaly no nanaiky fa ny tsy fisian'ny asa, ny fahantrana, ny kolikoly, ny tsy fandriampahalemana amin'io filaharany io no hamolavola ny fizotran'ity fifidianana ity. Nahitana fitomboana 11 isanjato tamin'ny isan'ireo olona vonona hifidy amin'ny fifidianana filoham-pirenena 2019 ihany koa ny valim-pifidianana raha ampitahaina tamin'ny taham-pahavitrihana tamin'ny fifidianana ny taona 2015.

Vakio bebe kokoa ny fitantaranay ny #NizerianoManapakevitra2019:

• Fantaro ireo kandidà ho filoham-pirenen'i Nizeria amin'ity taona 2019 ity [mg]
• Moa ve ny governemanta Nizeriana manampim-bava ny fitsarana mialoha ny fifidianana filoham-pirenena amin'ity volana Febroary ity?
• Efa antitra, kabarim-pankahalana, fahalalahan'ny gazety: lohahevitra goavana resahana amin'ny fifidianana filoham-pirenena 2019 ao Nizeria[mg]
• Ahoana no fomba hamolavolan'ny fanentanam-pifidianana filoham-pirenena any Nizeria taona 2019?
• Miady amin'ny fiantraikan'ny fifidianana filoham-pirenena 2019 ireo jeneraly miaramila misotro ronono ao Nizeria
• Matahotra ny fanakatonana aterineto ny Nizeriana amin'ny toe-draharaha miha-henjana mialoha ny fifidianana filoham-pirenena 2019

Vao tsy ela no nitsidika an'i Etazonia i Abubakar (17 sy 18 Janoary 2019) efa ho folo taona lasa taty aoriana. Tafiditra amin'ny raharaha fanodikodinam-bola an -tapitrisany dolara maro nahatafiditra mpikambana iray ao amin'ny Kongresy Amerikana i Abubakar. Niampanga azy ho nanao famotsiam-bola sy nanao kolikoly ihany koa ny Komitin'ny Loholona Amerikana misahana ny fiarovam-pirenena sy ny raharahan'ny governemanta ao Etazonia. Nandeha be ny resaky ny olona maro noho izany fa voarara ny hitsidika an'i Etazonia izy

Nilaza ny Reuters fa “navoakan'ny Departemantam-panjakana Amerikana vonjimaika taorian'ny nikarakaran'ny laobista fanentanana” ity fandraràna an'i Abubakar ity.  Nilaza tamin'ny Reuters ny loharanom-baovao iray tsy mitonona anarana  fa navela hiditra an'i Etazonia i Abubakar satria

… the United States saw little benefit to creating bad blood with the man who might be the next leader of Africa’s most populous nation and the continent’s biggest oil producer.

… tsy mahita tombontsoa firy amin'ny fananganana ady amin'ny lehilahy izay mety ho mpitondra manaraka ny firenena Afrikana be mponina indrindra sy ilay mpamokatra solika lehibe indrindra ao amin'ny kaontinanta i Etazonia .

Nanambara ireo laobista mpanohana an'i Abubakar fa manana adidy handrisika ny demokrasia ao amin'ny firenena be mponina indrindra fahafito manerantany ny tompon'andraikitra ambony Amerikana misahana ny raharaha Afrikana, Sekretera mpanampy Tibor Nagy.