Akatòny

Fitia Tsy Mba Hetra Hampijoro Tsara Hatrany Ny Global Voices

Mila fanohanana avy amin'ny namana sy ny mpamaky toa anao ny fikambananay hitoerany ho mahaleotena, maimaim-poana, ary hahazaka miasa maharitra!

Manomeza anio

Hijery ny Tenim-Pirenena rehetra? Mandika ny tantaran'ny Global Voices izahay mba ho hitan'ny rehetra ny fitantaran'olo-tsotra manerantany.

Shina: CCTV ambanin'ny afon'ny… tsikera

(Fanamarihana: lahatsoratra anglisy nivoaka tamin'ny Febroary 2009)

Ny alin'ny 9 hifoha 10 febroary, nirehitra ny ampahany iray tamin'ny Tilikambon'ny CCTV, ny Fahitalavitra Foibe ao Shina, raha teo ampiitifirana afomanga ho fankalazana ny fetin'ny Harendrina ny ekipana mpahay momba ny afo (pyrotechniciens) iray. Nahafatesana olona iray, mpamonjy voina, ary naharatràna olona fito sy nahasimbana fotodrafitrasa sy fitaovana mitentina miliara yuan maro izany afo izany.

Tena nitsongo tsara ireo fanehoankevitra an-tambajotra nalefan'ireo shinoa mpampiasa aterineto mikasika ilay firehetan'ny CCTV ireo very tamin'ny tombantombana. Fa, raha ny marina, tamin'ny fotoana nanombohan'ny manampahefana nanivana ireo vaovao marimpototra tao amin'ny tontolon'ny aterineto shinoa, nampiasa ireo fomba fiseraserana hafa mba hizarana ny hevitr'ireo olontsotra.

Ny 10 febroary, nahazo SMS avy amin'ny iray amin'ireo namako akaiky aho, izay ahitana laharan'andalan-tononkalo nentim-paharazana shinoa, izay miparitaka ao amin'ny aterineto amin'izao fotoana izao :

上联:除夕夜捧红小沈阳
下联:元宵节火烧大裤衩
横批:央视不差钱

Andininy voalohany : Nampalaza an'i Xiao Shenyang ny ‘gala’-n'ny Fetin'ny Lohataona
Andininy faharoa : Nampirehitra ilay tranobe miendrika baoty ny afomanga natao tamin'ny fetin'ny Harendrina
Lohateny : tsy mba lany vola mihitsy ny CCTV

Mifarana amin'ity famintinana ity ilay hafatra :

做人不能太CCTV啦!否则,躲得过初一,也躲不过十五!

Ho an'ny olombelona iray, aza mba CCTV be loatra. Raha tsy izany, tsy maintsy ho voasazy na dia afaka hovelona aorian'ny Taombaovao shinoa aza.

Ny 12 febroary, nahazo imailaka avy amin'i Atoa. Yue (岳先生) aho, izay manambatra karazana fanehoankevitra sy sary mivantana momba ilay afo. Nilaza ny iray tamin'ireo maribolana hoe:

央视真有钱啊,人家元宵节放焰火,丫元宵节烧大楼。

ena manankarena loatra i CCTV ka afaka mandrehitra ireo tranobeny mba hankalazana ny Fetin'ny Harendrina, raha toa ka tsy afaka na dia hividy tsipoapoaka aza ny sasany.

Lazaina ao anatin'izany ny fanehoankevitry ny mpampiasa aterineto iray hafa momba ny asa ratsin'ny CCTV :

主流媒体一直在教育我们诚实做人、遵纪守法,可你们却违规。我们的心情很凝重。

Nampianatra antsika hatrany hanao ny marina sy hanaja ny lalàna ireo haino aman-jery nentim-paharazana shinoa. Fa ankehitriny, ianareo no nanolana izany lalànantsika izany tamin'ny fomba miseho mibaribary loatra. Tena mahatsapa ho tsy manana fanantenana mihitsy izahay izao !

Amin'ny fomba tsy nampoizina, feno fanantenana mikasika izay ho vokatr'ilay afo ny mpaneho hevitra iray :

一拆一建GDP又上去了,拉动了内需,又解决了大量农民工的临时饭碗问题。当事人立功受奖!

Mety hamporisika ny fangatahantsika ato anatiny ary hanohana ny fitomboan'ny Harin-karena Faobe antsika amin'ny fotoana mahamety azy ny fahasimbana sy ny fanarenana ny tranoben'ny CCTV. Amin'izany fotoana izany ihany, hiteraka asa an-tselika ho an'ireo mpiasa mpifindra monina maro izany. Mila omena valisoa goavana ireo nahavanon-doza.

Misy olona tsy faly amin'ny fahombiazana arak'asa vitan'ny CCTV :

CCTV 报道美国911大火是第一时间且连续滚动报道,而对自家的大火却只在十几小时后哼了一下。这是什么精神?这是无私忘我的精神!

Tonga ara-potoana ary tsy tapaka ireo vaovao natolotry ny CCTV mikasika ny 11 septambra amerikana, fa tena fohy sy manidintsidina ireo vaovao natolotry ny CCTV momba ny firehetany. Mba toetsaina inona izany ? Avy amin'ilay toetsaina be voninahitry ny «fanadinoana ny tena amin'ny fitiavana ny hafa» ve ?

Mba hisintonana anatra avy tamin'ilay firehetana, manolo-kevitra amin'ny fomba politika ny olona iray :

“喉舌”上火,请用“民主牌”润喉片!

Mba mihinana pilina misy ny soratra hoe Demokrasia rehefa mijaly noho ny fivontosana ny mikrô !

Fa tena atahorako ny handraisana ireo eson'ny shinoa ireo ho toy ny ratsy, mafy fo sy ho feno habibiana. Raha ny marina, maneho ny ahiahin'ireo olontsotra momba iny firehetana iny, ny fangorahany ny maty sy ny naratra, ny hatezerany amin'ny CCTV sy ny fitiavany ny tanindrazany ireo esoeso miendrika hatsikana eo ambony ireo.

Atombohy ny resaka

Mpanoratra, azafady hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.