- Global Voices teny Malagasy - https://mg.globalvoices.org -

Shina: Voasakana ao Shina ny Twitter, Flickr, Bing.

Sokajy: Shina, Hafanàm-po nomerika, Mediam-bahoaka

Fanamarihana: lahatsoratra nivoaka tamin'ny jona 2009

Tamin'ny alina alohan'ny faha-roapolo taona nitsingerenan'ny 4 jona (tranga tao Tiananmen) , nitatitra ireo sinoa mpampiasa aterineto fa tambajotra sosialy sy serasera maro no voasakana ao Shina, anisan'izany ny Twitter, Flickr, Bing, Youtube, Blogspot,  sns.

Ao amin'ny  Herdict [1], tranonkala fanarahamaso ny sivana an-tambajotra, manamarina ny fanakanana ny Twitter [2] efa hatramin'ny omaly (2 jona 2009) ny tatitra maro manerana an'i Shina [2]. Voasakana efa hatramin'ny tapaky ny volana May ny sehatra fanaovana blaogy Blogspot ary afaka nidirana ary avy eo nosakanana ny Youtube [3] nandritra ny fotoana lava. Tafiditra tao anatin'ny lisitr'ireo tranonkala voasakana tamin'ny alina talohan'ny fitsingerenan'ny 4 jona ny Windows Live [4], Flickr [5] sy ny Bing [6] .

Voasakana nandritra ny fotoana fohy ny imailaka Hotmail [7] ary avy eo naverina ny fahafahana miditra aminy taorian'ny ora roa. Novelomin'ny Twitter ny fidirana amin'ny https (fidirana tsy fantatra anarana) ho valin'ny antson'ireo sinoa mpampiasa aterineto. Ankoatra izany, mbola azo idirana foana ny fanitarana sasany avy amin'ny Twitter, fitaovana toy ny  Twitterfox.

crab-and-twitter

Tao anelanelan'izany, ny tenifototra #fuckGFW [8] no lasa tenifototra nampiasaina indrindra tao amin'ny Twitter. Ampiasain'izy ireo ity tenifototra ity mba hanehoana ny hatezerany, hifanakalozany vaovao any amin'ny fitaovana fialàna ilay GFW (Fanamarihana: ”Great Firewall of China”, ilay Rindrinafo Lehibe mpiambina ny aterineto ao Shina) [9] ary hizarany ny fanavaozana farany mikasika ilay fanakanana.

Niantso ny 2 jona ho andron'ny GFW (amin'ny teny sinoa) ny blaogera TSW, satria miatrika mivantana ny herisetran'ny fanjakana amin'ny fanarahamaso ny vaovao ireo mpampiasa aterineto. Ny sasany mizara vaovao amin'ny fomba hialàna amin'ilay GFW.

Manoro [10] ny fampiasana ireo tambajotra manokana virtoaly an-tambajotra i Wodingdong: Tor, Hotspot Shield Launch sy ny OpenVPN GUI. Manolo-kevitra amin'ny fampiasana ireo fidirana amin'ny tolotra kilasy fahatelo [11] mba hidirana amin'ny Twitter i  Kenengba.

Efa nandrasana hatramin'ny nanakanana ny Blogspot tamin'ny tapaky ny volana May ny fanakanana ny Twitter. Ny manahirana ireo sinoa mpampiasa aterineto amin'izao fotoana izao dia ny hoe: oviana vao ho azo idirana indray ireo tranonkala ireo ?

(Sary fanaingoana [12] noforonin'ny mpampiasa Twitter junde, [13] avy amin'i Rebecca MacKinnon [14])

Lahatsoratra momba izany ihany (amin'ny teny anglisy):

Rebecca MacKinnon – China Mibahana Ny  Twitter, Flickr, Bing, Hotmail, Windows Live, etc. Mialoh ny Faha-20 taonan'ny Tiananmen [14]

Danwei – Twitter sy Tranonkala Hafa Boabahana ao Shina Mandraka androany. [15]

Guardian – China misakana ny Twitter, Flickr sy Hotmail mialha ny tsingerintaonan'ny Tiananmen [16]