Tonizia: Fampielezan-kevi-pifidianana tsy avela ho hita

Voadika ny 13 Jona 2018 3:08 GMT

(Marihana fa efa tamin'ny volana Oktobra taona 2009 ny lahatsoratra teny Anglisy)

Miomana amin'ny fifidianana filoham-pirenena i Tonizia amin'ny 25 Oktobra 2009. Nanomboka tamin'ny 11 Oktobra ny fampielezan-kevi-pifidianana, saingy tsy ny antoko politika sy ny mpanao politika rehetra no afaka nandray anjara tamin'izany. Iray amin'izany antoko izany ny Attajdid (Ny Fanavaozana), izay tsy tazana tamin'ny sora-baventy momba ny fifidianana ny afisin'izy ireo. Nosakanana tsy hanomboka ny fampielezan-keviny ihany koa ny antoko. Ary tsy izany ihany, nosivanin'ny manampahefana tsy misy antony maharesy lahatra ny gazetin'ny antoko “Attariq Al Jadeed” (Lalana Vaovao), araka ny fanazavan'ilay bilaogera Sofiene Chourabi :

حجزت مصالح وزارة الداخلية العدد 149 من جريدة الطريق الجديد بجمع كلّ الأعداد الموجودة بالمطبعة مساء السبت 10 أكتوبر وإشعار صاحب المطبعة بحجز العدد بدعوى تضمنه للبيانين الانتخابيين لحركة التجديد في حين أنه مؤرخ يوم 10 أكتوبر أي قبل انطلاق الحملة الانتخابية وهي تعلات واهية باعتبار أن العدد كان بصدد الطبع مساء السبت 10 أكتوبر ليوزع على الأسواق ابتداء من يوم الأحد 11 أكتوبر الذي تنطلق فيه الحملة الانتخابية.

Ny harivan'ny 10 oktobra, nogiazan'ny minisiteran'ny atitany ny famoahana laharana faha-149 tamin'ny gazety Attariq Al Jadeed. Nalain'izy ireo avokoa ny gazety rehetra natonta tany amin'ny fanontàna gazety ary nampahafantatra ny tompon'ny fanontàna izy ireo fa ny antony fakàna ireo gazety ireo dia noho izy ahitana afisim-pifidianan'ny antoko Attajdeed ao amin'ny gazety natonta ny datin'ny 10 oktobra kanefa mbola amin'ny 11 oktobra vao manomboka ny fampielezan-kevi-pifidianana ofisialy. Mahatsikaiky izany fanazavana izany, satria natonta ny 10 oktobra ny gazety mba hivoaka ny 11 oktobra, andro fisokafan'ny fampielezan-kevi-pifidianana.

Etsy andaniny, hita na aiza na aiza ny sarin'ny kandidàn'ny antokon'ny fitondrana – ny filoha Toniziana Zine El Abidine ben Ali -, ary indraindray amin'ny fomba tsy ara-dalàna. Nipoitra imbetsaka tamin'ny fahitalavitra ihany koa izy mba hampiroborobo ny fampielezan-keviny, ary tsy azo atao anefa izany araka ny fehezan-dalàna mifehy ny fifidianana. Kisses from Tunisia nanoratra momba izany ary nampiseho sary misy ny fehezan-dalàna mifehy ny fifidianana sy ny sarin'ny kandidàn'ny antokon'ny fitondrana manao fampilezan-kevitra ho an'ny antokony ao amin'ny fantsona fahitalavitra tsy miankina.