Akatòny

Fitia Tsy Mba Hetra Hampijoro Tsara Hatrany Ny Global Voices

Mila fanohanana avy amin'ny namana sy ny mpamaky toa anao ny fikambananay hitoerany ho mahaleotena, maimaim-poana, ary hahazaka miasa maharitra!

Manomeza anio

Hijery ny Tenim-Pirenena rehetra? Mandika ny tantaran'ny Global Voices izahay mba ho hitan'ny rehetra ny fitantaran'olo-tsotra manerantany.

Antarktika : Bilaogera Avy Ao Amerika Latina Tonga Any Amin'ny Tendrontany Atsimo, Faritra Mangatsiaka Indrindra Eto An-tany

Fanamarihana: Ampahany voalohany amin'ny lahatsoratra roa natao ho an'ny bilaogy avy ao Amerika Latina voasoratra avy any amin'ny Antarktika na miresaka momba azy ity

Ny tontolo mamirifiy any amin'ny Antarktika angamba no tsy isalasalàna fa toerana farany indrindra eritreretina hahitàna bilaogera. Nefa dia nisy azo nisaina tamin'ny rantsan-tànana ry zareo avy ao Amerika Latina no babon'ny hevitra hizara ny zavatra niainany, ny dia ary ny asa atao any amin'io tanibe babangoana io. Ny sasany tena avy any amin'ny Antarktika mihitsy no manoratra ny bilaoginy, mametraka ho an-tserasera ireo saripika sy lahatsary mba hanampiana ireo mpamaky azy hahatakatra izany hoe miaina lavitra ny tany niaviana izany ; ny sasany indray miandry ny fiverenany any amin'ny tanibe amerika atsimo vao milaza ny heviny any anatin'ny bilaoginy manokana na iraisana.

Marobe ireo firenena voasolo tena ety anaty tontolon'ny bilaogy miresaka momba ny Antarktika. Shily, ankoatra ny tranonkalan'ny ivontoerana shiliana ho an'ny Antarktika [esp], dia mamoaka vaovao ao amin'ny bilaogy Antarctic Air Base Presdent E. Frei M [esp]. Saingy indrisy, lahatsoratra iray ihany no nivoaka tao amin'ilay bilaogy, natokana indrindra indrindra ho an'ny fifandraisana amin'ny ‘radio’. Atokan'i Roberto Bravo Vidal ny bilaoginy Terra Australis Incognita [esp] ho an'ireo torohay sy fanadihadiana mifandraika amin'i Antarktika.

Efa maherin'ny roapolo taona i Però no miasa  sy manao fikarohana mainga avy any amin'ny toby siantifika ao Machu Picchu [ang], tantanan'ny ivontoerana peroviàna ho an'i Antarktika ary atolotra ao amin'ny bilaogy Vida y Futuro [esp], iray amin'ireo bilaogin'ny gazety El Comercio. Farany, ilay peroviàna mpanatontosa sarimihetsika, Humberto Saco, dia nametraka ety an-tserasera ny fanadihadiana iray notontosainy momba ny fisian-dry zareo peroviàna ao amin'ilay tanibe mangatsiaka [esp].

Manana bilaogy marobe natokana hiresahana ny Antarktika i Orogoay, izay ny iray antsoina hoeSentires antarticos [esp], mamoaka tononkalo momba ilay tanibe, ary iray hafa ny bilaogin'ny fikambanana ho an'ny Antarktika [esp]. Samy tsy nisy natsangana tao an-toerana izy roa ireo, saingy ny sasany kosa dia avy any mihitsy taorian'ireo iraka roa natao tany an-toerana: Antarkos 23 [esp] sy Antarkos 25 [esp]. Nandritra ilay iray voalohany, nisy zavatra iray nanaitra tsikaritra, nantsoina hoe “prisme de glace”:

Sarin'ilay prisme de glace nopihana nandritra ny iraka  Antarkos 23 ary nahazoana alàlana ny fampiasàna azy

En la noche del 5 de setiembre de 2007, tuvimos el privilegio de observar un Hidrometeoro poco común, llamado “Prisma de hielo”. Este fenómeno consiste en la precipitación de cristales de hielo que tienen forma de agujas, placas o columnas, normalmente muy tenues y que dan la sensación de estar en suspensión en la atmósfera los cuales al observarlos sobre un foco de luz, producen reflejos como el que se aprecia en la foto. Estos cristales de hielo pueden caer de una nube o con una situación de cielo despejado y se producen a temperaturas inferiores a -10ºC.

Ny alin'ny 5 Septambra 2007, nanam-bintana izahay nanatri-maso ny “hydrométéore” iray nanana endrika tsy fahita firy antsoina hoe “prisme de glace”. Io tranga tsy fahita firy io dia firotsahana kristalin-dranomandry miendrika fanjaitra, kioba na tsanganana, amin'ny ankapobeny dia toy ny mihantona eny amin'ny rivotra. Rehefa jerena akaiky amin'ny takamoa mandeha herinaratra izy io, dia miteraka ilay zavatra manelatrelatra azonao jerena amin'ny sary. Ireo kristalin-dranomandry ireo dia mety ho avy amin'ny rahona na nilatsaka tamin'ny andro mazava raha toa ny maripàna ka ambanin'ny -10°C.

Ao amin'ilay bilaogy faharoa, ilay Orogoaiàna Waldemar Fontes mitantara ny fomba nataon'ny ekipany ho fankalazàna ny Noely [esp] tao amin'ny toby siantifika ao Artigas:

Sarin'ny sakafon'ny Noely tao amin'ny toby siantfika tao Artigas, nopihana nadritra ny Antarkos 25 ary nahazoana alàlana ny fampiasàna azy.

El 24 de diciembre de 2008, la dotación Antarkos 25, más un grupo de científicos alemanes y uruguayos, celebramos la Navidad en familia. Compartimos una cena con turrones, pan dulce y tortas alemanas y degustamos un delicioso lechón al horno. A las doce la noche, sin distinción de origen o nacionalidades, levantamos las copas y brindamos. Lo mejor de la velada, fue la llegada de Papá Noel, que viajando en la pala del tractor de la Base, llegó hasta nuestro comedor y uno a uno, fue entregando regalitos a quienes se habían portado bien.

Ny 24 Desambra 2008, ny ekipa Antarkos 25, izay mihoatra lavitra noho ny maha-vondron'olona siantifika alemà sy orogoaiàna azy, dia nankalaza ny Noely toy ny fianakaviana iray. Niaraka nihinana ny sakafo hariva izahay nasiana ireo vatomamy nentim-paharazana, brioches, mofomamy alemà, ary dia nankafy hena kisoa natono tanaty lafaoro. Tamin'ny sasakalina, tsy nijerena izay fiavian'ny tsirairay na ny zom-pireneny, dia samy nanandratra ny verany sy nisotro. Ny fotoana tsara indrindra tamin'iny hariva iny dia ny fahatongavan'ny Dadabe Noely. Tonga teny aminay nikiraviravy tamin'ny “pelleteuse” fampiasan'ny toby, niditra tao amin'ny efitrano fisakafoanana izy ary nizara fanomezana ho an'ny tsirairay izay hendry taminay.

Ny ampahany faharoa, natokana ho an'ireo bilaogera arzantina any amin'ny Antarktika, dia ho avoaka amin'ity herinandro ity.

Atombohy ny resaka

Mpanoratra, azafady hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.