Fiovàn'ny Kolontsaina Fampakarambady Bangladeshi Midika Ihany Koa Ho Fiovàna Amin'ny Karazan-Tsakafo Aroso

Ny ampakarina sy ny mpampakatra, maka sary mandritra ny fampakarambady. Sary an'i Sanim Haque. Nahazoana alàlana

Samy tia fampakarambady daholo ny rehetra, ary raha olona tia misakafo ianao dia tsy te-hamela handalo fotsiny ny vintana ahafahana manatrika fampakarambady Bangladeshi. Raha raisina ny fankafizan'ireo Bengalis ny haify any aminy, dia tsy mahagaga raha mahavita mandeha kilaometatra maro ry zareo ho fankalazany ny fampakarambady.

Desambra hatramin'ny Janoary no fotona fampakarambady ao Bangladesh raha ny mahazatra, amin'ilay maha-tonitony kokoa ny maripàna. Ny lisitra sakafo fandroso dia ahitàna ny Pulau, Biryani, Akoho voaendy, Korma, Kebab, Rezala sy Borhani ankoatry ny hafa. Ny tsindrin-tsakafo mamy dia ahitàna ny habobo nomamiana, Payesh, Jorda ary karazanà sakafo mamy isankarazany. Rehefa tonga ao amin'ny fampakarambady ny mpampakatra, dia tsenaina amin'ny vatomamy sy sorbet.

Hatramin'ny taompolo vitsy lasa izay, efa nahazatra ny fampakarambady karakaraina anaty toerana ao an-tanàna ihany na eo amin'ny manodidina, ary ny fianakaviana sy ny namana no mifandrimbona amin'ny fandrosoana sakafo. Amin'izao androntsika izao, nikisaka ny toerana ka lasa any amin'ireo foibenà vondrom-piarahamonina sy ireo trano malalaka hafa izay ireo matianina amin'ny resaka sakafo sy ireo ‘chef’ mpahay izany manokana no mikarakara ny sakafo. Mahatsiaro ny fahazazàny ilay mpanoratra tantara foronina sady mpanao gazety, Iraj Ahmed :

গলির মুখে লাল, সাদা আর সবুজ মেশানো কাপড়ের গেট। চনমনে রোদের মধ্যে হয়তো বাড়ির ভেতরের উঠানে বিরিয়ানির হাঁড়ি চড়েছে ইটের চুলার ওপর, লাকড়ির ধোঁয়ায় চারদিক অন্ধকার। ছাদে টানানো ত্রিপল অথবা সামিয়ানার নিচে ভাঁজ খুলে বসানো হয়েছে হালকা খয়ের রঙের চেয়ার, টেবিল। অনেক মানুষের ব্যস্ত ছোটাছুটি, কিছু মানুষ দুপুরের রোদে উদোরপূর্তি শেষে কাপড়ে ঝোলের দাগ মেখে বের হয়ে গলির মোড়ের দোকানে গলায় ঢালছে সেভেন আপ অথবা চিবাচ্ছে পান। বাতাসে ভাসছে কেমন এক আনন্দের সুর। বলছি অনেক বছর আগে এই ঢাকা শহরে বিয়ের অনুষ্ঠানের কথা।

Nisy vavahady lehibe iray norakofana lamba mena, fotsy ary maitso nijoro teo amin'ny fiandohan'ny làlana (fandraisana ny vahiny). Tao anatin'ny hazavana mandoron'ny masoandro, ireo vilany goavana feno Biryani no napetraka teo amin'ilay fàtana fahandroana vonjimaika vita tamin'ny biriky. Feno setroka afon-kitay avy ao am-pàtana ny toerana. Teny an-tafontrano, seza tsotra mivolom-batolalaka sy latabatra navondrona teo ambaninà labasy. Olona mivezivezy manao raharaha toy ny tantely amperinasa no hitanao. Ary ny sasany hitanao mivoaka avy amin'io toerana io rehefa avy namoky tena, miaraka amin'ny mariky ny ‘curry’ hita mameno ny fitafiana fitondrany milanona. Nandeha tsy sazoka ry zareo nividy Seven Up (zavapisotro) na “paan” teo amin'ny toerana fivarotana eo an-toerana. Feno hafaliana ny rivotra niainana. Izany no endriky ny fampakarambady nampiavaka an'i Dhaka taona maro lasa izay.

Amin'ireny andro ireny, mety hilaza ny olona hoe fomba ratsy ny mandroso sakafo nokarakarain'ny vahiny, kanefa, ankehitriny toa efa maka volonandro manaraka ny zavamisy sy ny vanimpotoana ny olona. Siddhratha Mukhopaddhay avy any Bengal andrefana, ao Indiano manoratra momba ireo fiovàna hita anatin'ny fampakarambady Bengali:

এখন অবশ্য নিজেদের ক্ষমতা মত গৃহকর্তা ক্যাটারারের হাতে এই সব দায়িত্ব সঁপে দিয়ে নিশ্চিন্তে থাকতে চান৷ আসুন বসুন বলে খাওয়ানোর মানসিকতা বদলেছে ৷ আগে তো বাড়ি এসে নিমন্ত্রণ না করলে অনেকে আসতেনই না৷ কর্মব্যস্ততার কথা মাথায় রেখে এখন তো ফোন অথবা ফেসবুক- হোয়ার্টস অ্যাপ মারফতও নিমন্ত্রণ গ্রহণ করা হচ্ছে।

Amin'izao fotoana ny tompontrano dia maniry ny hahazo antoka ny fandraisana vahiny amin'ny fanomezana ny andraikitra rehetra ho an'ireo mpikarakara sakafon-danonana. Niova ilay fironana hoe ny tena ihany no mamahana ireo vahiny. Tany am-boalohany dia tsy nety nanatrika fampakarambady ireo vahiny asaina raha tsy aleha any an-tranony anaterana ny fanasàna azy. Ankehitriny, matetika amin'ny alàlan'ny antso an-telefaona, ary misy aza ny olona no manaiky fanasàna alefa amin'ny Facebook na  Whatsapp!

Topimaso ao anatin'ny lisitra vaovaon'ireo sakafo aroso rehefa fampakarambady Bangladeshi

Miaraka amin'ny fiovàna'ny kolontsain'ny fampakarambady, nisy fiovàna ny karazany hita any anatin'ny sakafo aroso amin'ny fampakarambady ao anatin'ny haify Bangladeshi. Tany aloha tany, sakafo tsotra toy ny Pulau arahana akoho natono, ondry be laro rezala (curry), hena omby nendasina, Tikia (hena ondry nofiraina manify tsara), salady misy tabia sy kôkômbira ary borhani, ary tsindrin-tsakafo toy ny jorda na pudding vita tamin'ny vary no nahazatra. Ankehitriny betsaka sakafo isankarazany sy sakafo matsiro toy ny Biryani, haify Mughal, no safidy miha-mitombo ho ao anaty lisitry ny sakafo.

Misy mihitsy aza ny fikarakaràna manokana ho an'ny mpampakatra. Ho an'ireo fianakavian'ny mpanankarena, ny fenitra dia ny manolotra ho azy sy ireo mpanotrona azy ondrilahy iray manontolo voatono.

Tolorana vatomamy eo am-pahatongavana ny mpampakatra. Sary an'i Sanim Haque. Nahazoana alàlana.

Ondrilahy manontolo natono

Voaroso sakafo ny mpampakatra. Sary an'i Sanim Haque. Nahazoana alàlana

Pulau Tokambolo

Nahazatra ny nahita ity sakafo malaza ity aroso saika mandritra ireo fampakarambady Bengali. Vita avy amin'ny vary mani-pofona (Basmati, chinigura sns.) asiana tongolobe, sakay maitso, pitipoà, ary ghee ny Pulau Tokambolo ary indraindray misy fanampiny hafa. Aroso miaraka amin'ny tononkena sy curry (sarahana anaty lovia samihafa).

Pulau Tokambolo – vary tsotra nolaroina zavamanitra sy tsiro. Sary an'i Sanim Haque. Nahazoana alàlana

Biryani

Efa lasa fenitra izao ny fandrosoana Biryani, sakafo Aziatika Tatsimo ifangaroan'ny vary. Ireo zavamanitra, vary mani-pofona, hena (akoho, ondry, omby na trondro), Ghee (avy nohalefahana) ary laro hafa no ampifanaingenina sy miaraka andrahoina mba hanamboarana ny Biryani. Tsy toy ny Pulau (izay hanina miaraka amin'ny tononkena sy curry), fa sakafo feno misy hena sy zavamanitra (sy legioma) ao anatiny ny Biryani.

A post shared by PaThaN swrov (@imfoysalpathan) on

Mutton Rezala (curry feno tsiro sy hanitra)

Mutton Rezala dia sakafo misy curry manana ny fiaviany avy any Bengal, nokarakaraina avy amin'ny ondry sy legioma. Aroso miaraka amin'ny vary na Pulau.

Rezala, midika hoe ondry malefaka ambony saosy. Ho tsaroanao mandritry ny fotona ela ny tsirony. Io no iray amin'ireo endrika mahazatra ao anaty lisitry ny sakafo amin'ny fampakarambady Bangladeshi. Sary an'i Sanim Haque. Nahazoana alàlana.

Akoho natono

Sakafo iray hafa mahazatra amin'ny fampakaramnìbady Bangladeshi ny akoho natono. Sary an'i Sanim Haque. Nahazoana alàlana.

Tikia (hena ondry nofiraina manify )

Tikia dia matetika no hanina miaraka amin'ny Pulau na Biryani. Araka izany, mandeha ho azy ny fisafidianana azy ho anaty lisitra rehefa fampakarambady.

Tikia, sakafo iray mahazatra rehefa fampakarambady. Sary an'i Sanim Haque. Nahazoana alàlana

Borhani

Borhani dia zavapisotro anafangaroana ny yogurt (iaorta) aminà ravina maitso nopotehana, dipoavatra, sakay maitso ary rano. Manampy amin'ny fandevonana ireo sakafo mavesatra naroso nandritra ny fampakarambady.

A post shared by Maisur (@abumaisur) on

Jorda

Vary Jorda, fantatra amin'ny maha-tsindrin-tsakafo mamy azy rehefa fampakarambady.

ny vary Jorda dia vita tamin'ny vary, ghee, siramamy, saffran miloko na ranomboasary, ankoatra ny laro hafa. Sary an'i  Sanim Haque. Nahazoana alàlana.

Paan

Paan, fikarakarana sakafo iray anafangaroana ny ravina betela amin'ny voanà areca, ravim-paraky sy tsiro hafa.

ny fandrosoana paans aorian'ny fihinanana sakafo dia efa fomba tranainy fanao rehefa fampakarambady. Sary an'i Sanim Haque. Nahazoana alàlana

Na nanomboka niova aza ny lisitry ny sakafo aroso rehefa fampakarambady Bangladeshi, zavatra iray no mitoetra tsy miova — matsiro izy rehetra.

Atombohy ny resaka

Mpanoratra, azafady Hiditra »

Torolalana

  • Miandry fanekena ny hevitra rehetra. Aza alefa in-droa ny hevitra.
  • iangaviana ianao haneho fifanajàna amin'ny hevitra rehetra. Tsy ekena ny hevitra feno fankahalàna, vetaveta, mamely olona manokana.